E Abrahamu—Umonsi Umusipe

Yelenganyani ukuti e Abrahamu akulolecesya ulupwa lwakwe na wawomvi wakwe pano wakuyipekanizizya ukuya ku Kenani. (Intaliko 12:1-5) Pano akuwalolecesya, watalika ukwelenganya pa mulimo uwukulu uwa kuwasakamala, amuno wonsinye wasintilizile pe weliwe. Uzye walinji nu kulawasakamala wuli ku ncende yino atamanyile nu kumanya? Uzye calinji nu kuwa acipepuke ndi vino calinji mu Uri muno mwalinji umulemvwe, umusili wa muvundo na minzi? Weni walinji nu kuwasakamala ulupwa nga acakuti walwala nanti wafwila ku ncende yino watamanyile? Nga cakuti e Abrahamu wasakamile pe vimwi vino twalandapo, atalesile ukusakamikwa kulenge apotwe ukucita vino Yehova wamunenile. Lelo walanjizizye ukusipa ukupitila mu kwivwila asamulandu ni vili vyonsinye vino vingacitika.

UZYE UKUSIPA ACANI? Ukusipa, akuwa umusinge swinya umuwome, asa wucantete. Ukuwa umusipe kusisula mu kuti tutaliwa twatina. Lelo umuntu wino Leza akawomya akacitapo cimwi asa mulandu nu kuti ali nintete.

UZYE E ABRAHAMU WALANJIZIZYE WULI UKUSIPA? E Abrahamu wayikundizile ukucita vino Yehova wamunenile asa mulandu nu kuti vyapusineko na vino wanji wacitanga. E Abrahamu wakulizile ku ncende kuno awantu wapepanga twaleza twa wufi. Atakanile ukucita cino wamanyile ukuti acizima pa mulanduvye nu kutina vino awantu walinji nu kumulola. Lelo wasozilepo ukucita vino vyapusineko na wantu wanji, akuli ukuti ukuwombela ‘Imfumu e Leza umupulisyemo.’​—Intaliko 14:21, 22.

E Abrahamu wawisile ukupepa Yehova pa nkolelo mu wumi ukucila ku vyuma. Wayikundizile ukusya imikalile imizima yino yalinji mu Uri nu kuya mukwikala mu mayonde nu kusuwila ukuti e Yehova walinji nu kulawasakamala mwe vyonsinye vino walondekanga. Mu kupita kwa mpindi, ncepamwi e Abrahamu watalisile ukwelenganya pe vino wikalanga icete mu Uri. Lelo wasuwizile ukuti e Yehova walinji nu kulawasakamala. E Abrahamu wasintilizile sana pe Yehova swinya wakonkanga na masundo yakwe.

AVYANI VINO TUKUSAMBILILAKO? Tungakolanya e Abrahamu ukupitila mukuwa awasipe nu kwivwila e Yehova nanti acakuti wanji asa vino wakacita. Ku cakulolelako, e Baibolo yikalanda ukuti wano wakatunjilila e Yehova ncepamwi wangawacuzya kwa lupwa ni viwuza. (Yohani 15:20) Nga twasuwila ukuti vino twasambilila pe Yehova avya cisinka, tukacindika vino twazumilamo nu kwikalilila kwe vyovyonye.​—1 Peter 3:15.

Tungasuwila ukuti Leza alificilisya vino walaya wano wamusuwila. Isuwilo lya musango wo-o, lingatwavwa ukuwa awasipe nu kuwika amano ku vya kwe Leza ukucila ku vya pa lwitu. (Mateyu 6:33) Lekani tulandeko pe vino ulupwa lumwi lwacisile wo-o.

E Doug ne Becky walondanga ukuya mu kuwombela kunsi yinji kuno wakawizya wacepa nanti acakuti wakweti awana wawili awatici. Pa nsizi ya kuvwambilizya ivyewo nu kupepelapo, wizile awasolapo ukucita vino wapanzile. E Doug watili “palondekanga ukusipa pa kuti tupite ponga na wana ukwasowa nu kumanya na vino ivintu viliya viwe. Lelo pano twatalisilevye ukwelenganya pa kucintila kunji, twalanzinye pa cakulolelako ca kwe Abrahamu ne Sera. Ukwelenganya pe vino wasuwizile e Yehova na vino nawe watwalilizile ukuwavwa, kwatwavwizye nkaninye.”

E Doug walanzile pa mikalile yino wikalanga ku ncende yino wacintizile ukuti: “E Yehova watupazile nkaninye.” Walanzile nu kuti: “Pa mulandu wakuti twapepusizye imikalile, twasumbanga impindi inkulu ponga nu lupwa, twawizyanga, ukusimika amalyasi nu kwizizya ponga na wana. Ukucita wo-o, kwalenzile swensinye mu lupwa tuzanemo ivizima ivivule.”

Kweni, asa we wonsi wano wangasolapo ukucita ndi vino lo-o ulupwa lwacisile. Lelo swensinye tungakolanya e Abrahamu ukupitila mu kuwika ivya kwe Leza inkolelo nu kusuwila ukuti aliwatwavwa. Nga twacita wo-o, lyo tungalanda ndi vino Baibolo yikalanda ukuti “lekani tuvwange ninsimpo tuti: ‘Imfumu wekavwa wane, ntandi ndatina.’”​—Waheberi 13:5, 6.

[Icikope]

Umuntu wino Leza akawomya akacitapo cimwi asa mulandu nu kuti ali ni ntete

[Box/Icikope]

Umwanaci Wino Wasecelesyanga Leza Swinya Umuci Umuzima

E Sera watwazilwe ku monsi wino walinji ni suwilo. Lelo we-e umwanaci wino wasecelesyanga e Leza wawa acakulolelako icizima. E Baibolo yalanda pe Sera imiku yitatu ukuti wawa acakulolelako cino awanaci wano wakatina Yehova wangakolanya. (Ayizeya 51:1, 2; Waheberi 11:11; 1 Peter 3:3-6) Nanti acakuti e Baibolo yitalanda ivivule pa lupwa lwe we-e umwanaci, twamanya ukuti walinji ni miwele imizima nkaninye.

Teyelenganyani pe vino e Sera wacisile pano e Abrahamu wamunenilevye ukuti e Leza atili wafume mu Uri. Uzye watalisile ukwelenganya kuno walinji nu kuya na vino walinji nu kuya mukucita? Uzye wasakamile pa vyuma vino walinji navyo? Uzye wayivwile uwuwi ukumanya ukuti walinji nu kusya walupwa ni viwuza wano atamanyile nga cakuti walilolanapo naswinya? Ukwasowa nu kuvwilika, afwile welenginye pe vyonsinye vyo-o. Lelo nanti ciwe wo-o, wayikundizile ukupita nu kusuwila ukuti e Yehova walinji nu kumulambula nga wivwila.​—Imilimo 7:2, 3.

Ukulunda pa kuwa ni civwila kwe Leza, e Sera walinji amuci umuzima. Ukucila ukuwacimvyanya nu mulume pa kutungulula ulupwa, e Sera wamucindikanga nu kumutunjilila mwe vyonsinye vino wapingulapo. Imiwele yakwe imizima yalenzile awe amuyembe.​—1 Peter 3:1-6.

Uzye yo-o imiwele yingavwa wuli awaci mwe ya-a amanda? E nkazi uwizina lyakuti Jill wino wamala imyaka ukucila 30 mwitwala watili, “Icakulolelako cakwe Sera cikanjavwa ukumanya ukuti ninganena e wakwane vyonsinye vino nkuyivwa pe cimwi.” Walanzile nu kuti, “Namanya ukuti wo-o vino e wakwane amutwe walupwa, wawa ni nsambu zyakupingulapo ivyakucita. Nga wacita wo-o, nani nkacita vino ningakumanisya pa kuti vino tewapingulapo viwombeke.”

Cino tukusambililako kwe Sera acakuti: nanti acakuti e Sera walinji amuyembe atalesile ukuyemba kwakwe kuleke awe ni cilumba. (Intaliko 12:10-13) Lelo watunjililanga e Abrahamu mwe vyonsinye pano wali ni ntazi na pano wasi nazyonye. Ukwasowa nu kuvwilika, e Abrahamu ne Sera walinji ni suwilo, walinji awayicefye swinya wakundine, na co-o calenzile wapalwe.