Aborahama—Monna yo a Nago le Sebete

Aborahama o lebeletše lapa la gagwe le bahlanka ba gagwe ge ba dutše ba lokišeletša go hudugela Kanana. (Genesi 12:1-5) A lebeletše sehlopha se se segolo sa batho seo maphelo a sona a ithekgilego ka yena, Aborahama o ile a ikwa a ikarabela ka bona. O tla hlokomela dinyakwa tša bona tša nama bjang ge a dula nageng yeo a sa e tsebego? Na go ba hlokomela go ka ba go be go le bonolo kua Uri, e lego lefelo leo le nago le mafulo a magolo, mobu o nonnego le meetse a mantši? Go thwe’ng ge e ba a ka babja goba a hwela nageng yeo e mpsha? Ke mang yo a bego a tla hlokomela lapa la gagwe? Gaešita le ge Aborahama a tshwenyegile ka dilo tše, ga a dumelele dipelaelo tša gagwe di mo dira gore a boife. O ikemišeditše go tšea kgato, go kwa ditaelo tša Modimo, go sa šetšwe seo se diregago, e lego leswao la sebete sa kgonthe.

 SEBETE KE ENG? Ke seka sa go ba matla, sa go beta pelo le go ba mogale—se se fapanego le go ba boi goba bofšega. Go ba le sebete ga go bolele gore le ka mohla ga re boife. Go e na le moo, motho yo a nago le sebete se se tšwago go Modimo o tšea kgato go sa šetšwe poifo ya gagwe.

ABORAHAMA O ILE A BONTŠHA SEBETE BJANG? Aborahama o be a ikemišeditše go se ye le mogofe. Aborahama o goletše tikologong yeo batho ba bego ba rapela medimo e mentši le diswantšho. Lega go le bjalo, ga se a ka a dumelela go boifa seo ba bangwe ba bego ba tla se nagana ka yena go mo šitiša go dira seo a bego a tseba gore se nepagetše. Go e na le moo, ka sebete Aborahama o ile a kgetha go tšea tsela e fapanego ya bophelo, e lego go rapela Modimo o tee feela—“Modimo Yo Godimodimo,” Jehofa.—Genesi 14:21, 22.

Aborahama o be a etišitše borapedi bja gagwe go Modimo wa therešo pele ga dilo tše di bonagalago. O be a ikemišeditše go lahlegelwa ke bophelo bja gagwe bja manobonobo bja kua Uri gomme a ye lešokeng, a botile Jehofa ka mo go feletšego gore o tla hlokomela dinyakwa tša gagwe tša nama. Ke therešo gore ge nywaga e dutše e eya, Aborahama a ka ba a ile a nagana ka bophelo bjoo a bego a bo phela kua Uri. Eupša Aborahama o be a kgodišegile gore Jehofa o be a tla dula a hlokomela yena le lapa la gagwe. Ka ge a be a kgomaretše Jehofa e le Motho yo bohlokwa kudu bophelong bja gagwe, Aborahama o ile a ba le sebete sa go kwa ditaelo tša Modimo.

RE ITHUTA ENG? Re ka ekiša Aborahama ka go hlagolela sebete sa go kwa Jehofa, gaešita le ge ba bangwe bao ba re dikologilego ba sa dire bjalo. Ka mohlala, Beibele e ruta gore bao ba emelago tumelo ya bona go Jehofa Modimo ba ka ganetšwa, mohlomongwe ke bagwera goba ba leloko bao ba nago le maikemišetšo a mabotse. (Johane 15:20) Lega go le bjalo, ge re kgodišegilego ka seo re ithutilego sona ka Jehofa, re emela ditumelo tša rena ka tlhompho.—1 Petro 3:15.

Gape re ka bota kholofetšo tša Modimo ya gore o tla hlokomela bao ba dumelago go yena. Kholofelo e bjalo e re nea sebete sa go thea maphelo a rena dilong tša moya go e na le go a thea dilong tše di bonagalago. (Mateo 6:33) Ela hloko kamoo lapa le lengwe le dirilego se ka gona.

Gaešita le ge ba ena le barwa ba babedi, Doug le Becky ba be ba nyaka go hudugela nageng yeo e bego e ena le tlhokagalo e kgolo ya baboledi ba ditaba tše dibotse tša Beibele. Ka morago ga gore ba dire dinyakišišo ka kelohloko le ka thapelo, ba ile ba phetha ka go tšwela pele le leano la bona. Doug o re: “Go be go nyakega sebete gore re tšee bana re sepele, re sa tsebe gabotse gore dilo di tla re sepelela bjang. Eupša re ile ra ahlaahla mohlala wa Aborahama le Sara ge re be re thoma go naganišiša ka go huduga. Go naganišiša kamoo ba ilego ba holofela Jehofa ka gona—le kamoo a ilego a ba hlokomela ka gona—go ile gwa re thuša.”

Doug o bolela mabapi le bophelo bja bona bja nageng e šele gore: “Re šegofaditšwe ka tsela e makatšago kudu.” O hlalosa ka gore: “Ka ge re phela bophelo bjo bonolo, re kgona go fetša mo e ka bago letšatši ka moka re le lapa—re bolela ka Beibele, re boledišana le go bapala mmogo le bašemane. Re ikwa re lokologile ka tsela yeo e sa hlalosegego.”

Ke therešo gore ga se batho ka moka bao ba ka kgonago go dira diphetogo tše bjalo tše dikgolo. Lega go le bjalo, ka moka ga rena re ka ekiša mohlala wa Aborahama ka go etiša borapedi bja rena go Modimo pele, re holofetše gore o tla re hlokomela. Ge e ba re dira bjalo, re tla be re latela keletšo ya Beibele ya gore “re be le sebete kudu gomme re re: ‘Jehofa ke mothuši wa ka; nka se boife.’”—Baheberu 13:5, 6.

[Ntlhakgolo go letlakala 7]

Motho yo a nago le sebete se se tšwago go Modimo o tšea kgato go sa šetšwe poifo ya gagwe

 [Lepokisi/​Seswantšho go letlakala 8]

Mosadi yo a Boifago Modimo le yo Bohlokwa

Sara o be a nyetšwe ke monna yo a kgethegilego wa tumelo. Eupša mosadi yo yo a boifago Modimo o beile mohlala o mobotse kudu. Ge e le gabotse, Beibele e bolela ka leina la gagwe gararo e le motho yoo basadi bao ba boifago Modimo ba swanetšego go mo ekiša. (Jesaya 51:1, 2; Baheberu 11:11; 1 Petro 3:3-6) Gaešita le ge Mangwalo a sa bolele gakaalo ka mosadi yo yo kgahlišago, lega go le bjalo re kgona go bona gore o be a ena le dika tše dibotse.

Ka mohlala, nagana kamoo Sara a ilego a arabela ka gona mathomong ge Aborahama a be a mmotša ka taelo ya Modimo ya gore ba tloge Uri. Na o ile a ipotšiša gore ba be ba lebile kae le gona ka baka la’ng? Na o ile a tshwenyega ka dilo tša nama? Na o ile a nyamišwa ke taba ya gore o tlogela bagwera le ba leloko, a sa tsebe gore o be a tla ba bona neng gape—ge e ba go be go ka direga? Ga go pelaelo gore o ile a nagana ka dilo tšeo. Lega go le bjalo, o ile a huduga ka go rata, a holofetše gore Jehofa o be a tla mo šegofatša bakeng sa go kwa ga gagwe.—Ditiro 7:2, 3.

Go oketša go beng ga gagwe mohlanka yo a kwago wa Modimo, Sara e be e le mosadi yo botse. Go e na le go phenkgišana le monna wa gagwe ka go laola ditaba tša lapa, Sara o ile a hlagolela tlhompho e tšwago pelong bakeng sa monna wa gagwe, gomme a mo thekga ka lerato ge a dutše a hlahla lapa la bona. Ka go dira bjalo, o ile a ikgabiša—a ipotsefatša—ka dika tša gagwe tše dibotse tša ka gare.—1 Petro 3:1-6.

Na dika tše bjalo di ka hola basadi bao ba nyetšwego lehono? Mosadi yo a bitšwago Jill, yo a nago le nywaga ya ka godimo ga e 30 a nyetšwe, o re: “Mohlala wa Sara o nthutile gore ke swanetše go ikwa ke lokologile go bolela le go hlalosetša monna wa ka pono ya ka.” O oketša ka gore: “Ka nako e swanago, ka ge monna wa ka e le hlogo ya lapa, o na le boikarabelo bja go dira phetho ya mafelelo. Ka morago ga gore a dire bjalo, ke mošomo wa ka go dira sohle seo nka se kgonago gore phetho yeo e atlege.”

Mohlomongwe thuto e kgomago kudu yeo re ithutago yona go Sara ke ye: Gaešita le ge e be e le yo mobotse kudu, Sara ga se a dumelela bobotse bja gagwe bo mo dira gore a ikgantšhe. (Genesi 12:10-13) Go e na le moo, ka boikokobetšo o ile a thekga Aborahama dinakong ka moka tše dibotse le tša mathata bophelong bja bona ba le gotee. Ka ntle le pelaelo, Aborahama le Sara e be e le banyalani ba botegago, ba ikokobeditšego le ba nago le lerato—banyalani bao ba ilego ba tlišetšana ditšhegofatšo e le ka kgonthe.