Abraiau Omulume Wakola Omutima

Abraiau utala tyina ombunga yae novaundapi velipongiya pala okuenda ko Kanaa. (Gênesis 12:​1-5) Tyina atala ovanthu ovo ovanyingi esukisa okutekula, Abraiau wimbuka okuti una otyilinga otyinene. Oñgeni mevetekula motyilongo ehei? Okuti otyilinga otyo ankho tyapepuka vali ko Ur, epundaumbo limwe ankho lina ohika onene yokulisa, noohi itavela okulima, nomeva omanyingi? Matyikala ñgeni inkha Abraiau uvela ine unkhila motyilongo otyo otyipe? Olie matekula ombunga yae? Inkha Abraiau wasukalalele novipuka ovio, oe kayekele owoma umusoyese. Oe watokola okutavela ovitumino via Huku, tyilekesa okuti ankho wakola omutima.

OKUKOLA OMUTIMA OITYI? Okukala tyapama, nondundo, otyo tyelikalela nokukala nohonyi ine nowoma. Okukola omutima katyilekesa okuti nalumwe matukala nowoma. Anthi, omunthu ukoleswa omutima na Huku, ulinga etyi tyesukisa namphila ena owoma.

OÑGENI ABRAIAU ALEKESILE OKUTI WAKOLA OMUTIMA? Abraiau watokolele okuhalandula otyinyingi tyovanthu. Abraiau wekulila pokati kovanthu ankho vafenda ono huku ononyingi novilolo. Mahi, oe kayekele owoma wetyi vakuavo mavapopi umutyilike okulinga etyi ankho ei okuti tyaviuka. Anthi, Abraiau nomutima wakola walandula ondyila yelikalela, okuholovona okufenda vala Huku wike​—⁠“Huku Omukulami,” Jeova.​—⁠Gênesis 14:​21, 22.

Abraiau wapakele komutwe efendelo lia Huku yotyotyili tyipona omalumono. Ankho watokola okusapo omuenyo omuwa mo Ur, akakala moluhandya, nonthumbi yokuti Jeova memuavela atyiho esukisa. Mahi, mokueenda kuomanima, Abraiau hamwe wasoka konthele yomuenyo omuwa asapo ko Ur. Anthi, Abraiau ankho una onthumbi yokuti Jeova apeho memutekula kumwe nombunga yae. Mokonda wakakatela mu Jeova Ngomunthu wakolela vali momuenyo wae, Abraiau, wakala nomutima wakola alandula ovitumino via Huku.

OTYO TYITULONGESA TYI? Tupondola okuhetekela Abraiau okukala nomutima wakola opo tutavele Jeova, namphila vakuavo kavetyilingi. Mongeleka, Ombimbiliya ilongesa okuti vana valandula ovitumino via Jeova Huku, vapondola okuyalwa nomapanga nombunga. (João 15:​20) Mahi, tyina tutavela umwe nawa etyi tuelilongesa konthele ya Jeova, tuamena omatavelo etu nehumbilo.​—⁠1 Pedro 3:⁠15.

Tupu, tupondola okuyumba onthumbi momulao wa Huku wokuti matekula aveho vena ekolelo mwe. Onthumbi oyo itukalesa nomutima wakola opo tusuke vali unene novilinga via Huku tyipona omalumono. (Mateus 6:​33) Tala oñgeni ombunga imwe yetyilinga.

Namphila vena ovana vevali ovatutu, Doug na Becky, ankho vahanda okuilukila kotyilongo kuesukisa vali ovaivisi vonondaka onongwa Mbombimbiliya. Etyi vasoka nawa, nokulikuambela unene, vatokola okuiluka. Doug wati, “nakolesa omutima wange, andyikuate ovana, atuende, tyihetyii oñgeni ovipuka maviende. Mahi, etyi tuahimbika okusoka okuiluka, tuatomphola konthele ya Abraiau na Sara. Okusoka oñgeni ovo vayumbile onthumbi mu Jeova, noñgeni evetekula, tyetukuatesako unene.”

Doug wapopia konthele yomuenyo wavo kotyilongo vailukila okuti: “Tuayambwa unene-nene.” Oe uhangununa okuti: “Mokonda pahe tuna onkhalelo yapepuka yomuenyo, tupondola okukala omuvo omunyingi nombunga, movilinga viokuivisa, nokutomphola, nokunyana novana vetu. Tuakala nehambu limwe enene, tuhevili okupopia.”

Tyotyili, haveho vapondola okulinga ngotyo. Mahi, atuho tupondola okuhetekela Abraiau okupaka komutwe efendelo lia Huku, nonthumbi yokuti oe apeho metukuatesako. Tyina tulinga ngotyo, tukahi nokulandula elondolo Liombimbiliya “liokukala nomutima wakola iya atuti: ‘Jeova oe omuvateli wange, himakala nowoma.’”​—⁠Hebreus 13:​5, 6.

 [Okakasa/​Olutalatu pefo]

Omukai Uhole Huku Nokuna Ovituwa Oviwa

Sara wanepelue nomulume wekolelo enene. Mahi, omukai oo wekolelo waava ongeleka ongwa. Tyotyili Ombimbiliya ipopia ovikando vitatu okuti Sara omukai ankho una ongeleka ina okuhetekelwa novakai vehole Huku. (Isaías 51:​1, 2; Hebreus 11:11; 1 Pedro 3:​3-6) Namphila Ovihonekwa vipopia vala katutu konthele yomukai oo, tupondola okutala okuti ankho una ovituwa oviwa.

Nkhele soka oñgeni Sara akala etyi Abraiau emupopila okuti Huku weveita vatunde mo Ur. Okuti oe wapulile opi mavaende ine omokonda yatyi? Okuti wasukalalele nomalumono avo? Okuti wanumanene tyina asoka okusapo omapanga nombunga yae, tyehetyii inkha nthiki imwe mevemono vali? Tyotyili, Sara wakalele nomalusoke oo. Nongotyo, oe wakalele nomutima weliola aende, nonthumbi yokuti Jeova memuyambe mokonda yokuetavela.​—⁠Atos 7:​2, 3.

Sara ankho ketavela vala ku Huku, tupu ankho omukai wovituwa oviwa. Oe ankho kaovola okupita komutwe womulume wae, anthi ankho una onthilo yotyotyili nomulume wae, nokumukuatesako okuhongolela ombunga. Moluotyo, oe ankho omukai omuwa mokonda yovituwa viae oviwa.​—⁠1 Pedro 3:​1-6.

Okuti otyo tyipondola okukuatesako ovakai vokuanepwa hono? Jill omukai umwe una otyinepo tyehambu omanima 30, wati: “Ongeleka ya Sara indongesa okuti ndyipondola okupopila omulume wange etyi ndyisoka, mahi, mokonda oe onkhalamutwe yombunga, oe una okulinga etokolo liahulililako. Iya ame ndyina okumukuatesako opo etokolo liae liende nawa.”

Ongeleka yavilapo tulilongesila ku Sara, oyei: Namphila ankho omuwa unene, Sara kayekele otyo tyimukalese nomalityindailo. (Gênesis 12:​10-​13) Anthi, Sara nomutima weliola wakuatesako omulume wae, pomuvo omuwa no pomuvo wononkhumbi, mokueenda kuomuenyo wavo. Tyotyili, Abraiau na Sara ankho ovalinepi vena ekolelo, nokueliola omutima, noluembia​—⁠ankho ovalinepi velikuatesako.