Abraham​—Makpel so Linawa To

Sankanengneng nen Abraham so pamilya tan dakel ya aripen to legan iran ompipikal paonlad Canaan. (Genesis 12:1-5) Sarayan totoo et akadepende ed sikato, kanian amta ton baleg so responsabilidad tod sikara. Pangalaan to kasi pambilay da no wala la rad sananey a lugar? Anggapoy problema komon no diad Ur, ta maaligwas so bilay diman, maawang so panagpastolan, mabunay dalin, tan agproblema so danum. Panon to no sikatoy biglan mansakit odino ompatey ed Canaan? Siopay mangasikasod pamilya to? Nayarin sankanonot iratan nen Abraham, balet agnampadaeg ed saray kapagaan to. Sikatoy desididon unorey ganggan na Dios, antokaman so nagawa​—pakapatnagan a talagan makpel a too.

 ANTO SO PAKPEL? Sayan kualidad et napatnagan ed mabiskeg a liknaan tan inkasibeg​—kabaliktaran na saya so inkapayakot odino inkakemeg. Balet, aglabay ya ibaga na saya a say makpel ya too et aglan balot ontakot. Imbes, say toon walay pakpel ton nanlapud Dios et onaksion tan agmanpadaeg ed takot.

PANON YA IMPANENGNENG NEN ABRAHAM SO PAKPEL? Sikatoy agtinmumbok ed karaklan. Diad lugar ya binalegan nen Abraham, saray totoo et mandadayew ed dakel a dirios tan imahen. Balet, agtinmakot ed no antoy isipen na arum tan ag-itan angamper ed sikaton gawaen so duga. Imbes, makpel ton pinili so duman panagbilay, tan say dinayew to et say alenleneg a Dios​—say “Dios a Sankatageyan,” si Jehova.​—Genesis 14:21, 22.

Inyuna nen Abraham so panagdayew tod tuan Dios nen say kayamanan. Bulos ed linawa ton tinaynan so mainawan bilay ed Ur tan linmad kadesiertoan, ta sikatoy matalek ya iter nen Jehova iray pankaukolan da. Siempre, diad inlabas na taotaon, ompan wala ray panaon ya anonotan met nen Abraham so inawad Ur. Balet, segsegurado si Abraham ya sikato tan say pamilya to et agbalot paulyan nen Jehova. Say nanmatalekan nen Abraham et si Jehova, say sankaimportantian a Persona ed bilay to. Satan so rason no akin ya awalaay pakpel ya unorey ganggan na Dios.

ANTORAY NAARALAN TAYO? Naalig tayoy Abraham no makpel tayo met ya unorey Jehova anggano ag-itan gagawaen na totood kaliberliber tayo. Singa bilang, ibabaga na Biblia a saramay manisiad Jehova a Dios et sumpaen na arum. Tan satan ya isusumpa et nayarin manlapud anggan saray kakaaro tan kakanayon, a parad sikara et iyaansakit da ti’ met labat. (Juan 15:20) Balet, no kombinsido itayod saray nanaaralan tayo nipaakar ed si Jehova, ipaliwawa tayoy pananisia tayo diad marespeton paraan.​—1 Pedro 3:15.

Makapanmatalek tayo met ed sipan na Dios ya iter toy pankaukolan na saramay walaan na pananisia ed sikato. Satan ya talek so mangiter ed sikatayo na pakpel ya iyunay panagdayew ed si Jehova nen say materyal. (Mateo 6:33) Nengnengen tayo pa no panon iyan agawaan na sakey a pamilya.

Anggano angkelag ni duaran anak a lalaki di Doug tan Becky, labay day onalis ed bansan kakkaukolan so dakel nin managpulong na maong a balitan walad Biblia. Nan-research iran maong tan talagan impikasi ra itan ed si Jehova, insan nandesisyon iran ituloy so plano ra. “Kaukolay pakpel na linawa ed sayan desisyon min onalis tan awiten iray ugugaw, ta agmi amta no anton talagay pansumpalan mi diman,” so kuan nen Doug. “Balet antis kamin nandesisyon, nantongtongan mi so alimbawa di Abraham tan Sara. Ninodnonot mi impanmatalek dad si Jehova​—tan no panon ya agto ran balot pinaulyan​—satan so talagan akatulong ed sikami.”

Oniay imbaga nen Doug nipaakar ed bilay dad inalisan dan bansa: “Talagan abendisyonan kamin maong.” Akin et ontan so nibaga to? Oniay intuloy to: “Mas simpli bilay mi, kanian mas dakel so panaon ya sikamin sanpamilya et saniiba​—manpulong, maniistoryaan, tan manggagalaw kami kaiba ray anak mi. Anggapoy salitan makapangideskribe ed liket ya nalilikna mi.”

Siempre, aliwan amin et sarag toy manggawa na ontan a baleg ya pananguman. Balet, sarag tayon amin ya aligey alimbawa nen Abraham no iyuna tayoy pandayew ed Dios, a manmatalek itayon wadtay Jehova ya ontulong. No ontay gawaen tayo, gagawaen tayo iyan panamaseseg na Biblia: “Mataletalek itayon mangikuan: ‘Si Jehova so mananulong ko; agak ontakot.’”​—Hebreos 13:5, 6.

[Blurb ed pahina 7]

Say toon walay pakpel ton nanlapud Dios et onaksion tan agmanpadaeg ed takot

 [Kahon/Litrato ed pahina 8]

Matulok ed Dios tan Pinabpablin Asawa

Makapadinayew so pananisia na lakin akiasawaan nen Sara. Balet, sayan bii ya matulok ed Dios et marakep met so alimbawa to. Diad tua, amitlon atukoy ed Biblia a say alimbawa nen Sara et maong ya aligen na bibiin matulok ed Dios. (Isaias 51:1, 2; Hebreos 11:11; 1 Pedro 3:3-6) Anggano daiset labat so impormasyon ya ibabaga na Biblia nipaakar ed sikato, sankaimano nin siansia iray marakep ya ugali na sayan makapadinayew a bii.

Alimbawa, isip yo pa no anto kasi reaksion nen Sara sanen kakkapangibaga ni labat nen Abraham ed sikato imay ganggan na Dios ya taynan day Ur. Inisip to lagi no iner so laen da tan antoy rason na iyakar da diman. Ompan nanaburidoan to met no anto kasi pambilay da. Nayarin maer-ermen ta taynan to ray kakaaro tan kakanayon to, ya agto amta no kasin napinengnengan to ni ra lamet. On, seguradon ontan so naisip tan alikna nen Sara. Anggaman ontan, bulos ed linawa to so impila tod asawa to, tan nanmatalek ya sikatoy bendisyonan nen Jehova no sikatoy ontulok.​—Gawa 7:2, 3.

On, si Sara et matulok ya lingkor na Dios, tan maong ya asawa. Imbes ya mikompetensia ed si Abraham diad panangidaulod pamilya, talagan baleg so respeto tod masiken to, tan impapuso ton sinuportaan diad impangigiya tod pamilya ra. Sarayan balibalin ugali to so lalon nampagangganad sikato.​—1 Pedro 3:1-6.

Antoy maong a resulta no aligen na kaasawaan a bibii so alimbawa nen Sara? “Naaralan kod alimbawa nen Sara ya bulos ak a mangibalikas na opinyon kod si masiken ko,” so kuan nen Jill, ya masulok a 30 taon lan kasal. Oniay intuloy to: “Balet, say ulo na pamilya et say masiken ko, kanian sikato so makanepegan a mandesisyon. No akapandesisyon la, manepeg met labat ya gawaen koy anggaay nayarian kon suportaan so desisyon to pian maong so resulta na satan.”

Balet nia so sankaabigan ya naaralan tayod si Sara: Anggano agaylay ganggana to, agto inisip ya rason la itan pian mantangsit. (Genesis 12:10-13) Imbes, mapaabeba ton sinuportaan si Abraham diad irap man o inawa. On, si Abraham tan Sara et sanasawan mapaabeba, maaro, tan makapadinayew so pananisia ra​—talagan bendisyon ira na Dios ed sakey tan sakey.