At’akí un otro esena: Abraham, su famia i su sirbidónan ta preparando pa muda pa Kanan. (Génesis 12:1-5) Segun ku Abraham ta opservá e grupo grandi di hende akí, kendenan ta dependé riba dje pa nan nesesidatnan básiko, e ta sinti ku e tin un gran responsabilidat. Kon lo e bai perkurá pa nan den un pais ku e no konosé? Lo no tabata mas fásil p’e perkurá pa nan den Ur, un área próspero ku sabana grandi, tera fértil i abundansia di awa? Kiko si e bira malu òf muri na Kanan? Ken lo kuida su famia? Si Abraham tabatin e preokupashonnan akí mes, e no a laga esakinan strob’é. E tabata determiná pa obedesé Dios su mandamentunan kueste loke kueste. Esei sí ta un demostrashon di berdadero kurashi.

KIKO TA KURASHI? Un persona ku kurashi no ta un persona tímido ni kobarde. Pero e echo ku un persona tin kurashi no nesesariamente ta nifiká ku nunka e no tin miedu. Al kontrario, ta e kurashi ku Dios ta duna ta yuda un persona asina tuma akshon apesar di miedu.

KON ABRAHAM A DEMOSTRÁ KURASHI? Abraham no tabatin miedu di ta diferente. Abraham a lanta den un ambiente kaminda hende tabata adorá yen di dios falsu i ídolo. Tòg, e no a laga miedu di loke otronan lo a bisa strob’é di hasi loke e tabata sa ku ta korekto. Mas bien, ku kurashi Abraham a skohe un otro rumbo den bida: El a skohe pa adorá solamente “e Dios Haltísimo,” Yehova.—Génesis 14:21, 22.

Pa Abraham, adorashon na Yehova tabata mas importante ku kos material. E tabata dispuesto pa bandoná un bida kómodo na Ur pa bai biba den desierto, ku e pleno konfiansa ku Yehova lo a perkurá pa su nesesidatnan material. Segun ku e añanan tabata pasa, ta natural ku Abraham lo a pensa riba algun di e komodidatnan ku e tabatin na Ur. Pero e tabatin konfiansa ku Yehova semper lo a perkurá p’e i pa su famia. Abraham tabatin un bon relashon ku Yehova, kende tabata e Persona di mas importante den su bida. I esei a dun’é kurashi pa obedesé Dios su mandamentunan.

LÈS PA NOS: Nos tur por imitá Abraham, kultivando kurashi pa obedesé Yehova asta si hende rònt di nos no ta hasi esei. Dikon nos mester di kurashi? Pasobra Beibel ta bisa bon kla ku esnan ku para firme na banda di Yehova lo haña nan ku oposishon, kisas di amigu òf famia ku tin bon intenshon. (Huan 15:20) Pero si nos ta konvensí di loke nos ta siña tokante Yehova, na  un manera respetuoso nos lo para firme pa loke nos ta kere.—1 Pedro 3:15.

Ademas, nos por tin konfiansa ku Dios lo kumpli ku su promesa, esta, ku lo e perkurá pa esnan ku pone fe den dje. E konfiansa ei ta duna nos kurashi pa pone aktividatnan spiritual na promé lugá den nos bida i no kosnan material. (Mateo 6:33) Esei ta presis loke Doug i Becky a hasi.

Aunke e famia akí tabatin dos yu hòmber chikitu, nan kier a muda bai un pais kaminda tabatin mas nesesidat di predikadó di e bon notisia di Beibel. Despues di a buska informashon i hasi orashon tokante e asuntu, nan a dal bai ku nan plan. Doug a bisa: “No tabata fásil pa muda ku dos yu sin sa kon kos lo a resultá pa nos. Ma promé ku nos a tuma e desishon ei, nos a analisá e ehèmpel di Abraham ku Sara. Nos a mira bon kla kon nan a konfia den Yehova i ku Yehova nunka a laga nan desampará, i esei a enkurashá nos mashá.”

Relashoná ku nan bida den un pais stranhero, Doug a bisa: “Nos a ser bendishoná rikamente. Debí ku nos bida ta muchu mas simpel, nos tin mas tempu awor; nos por pasa mayoria di e dia huntu komo famia: Nos ta prediká huntu, kòmbersá i hunga ku nos yunan. Nos ta kontentu ku nos tin e oportunidat akí.”

Ta klaru ku no ta tur hende por hasi kambio drástiko asina. Tòg, nos tur por imitá Abraham. Kon asina? Nos por pone adorashon na Dios na promé lugá den nos bida i konfia ku lo e sostené nos. Ora nos hasi esei, nos ta sigui Beibel su konseho pa “ta yen di ánimo i bisa: ‘Yehova ta mi ayudante; lo mi no tin miedu.’”—Hebreonan 13:5, 6.

[Komentario na página 7]

E kurashi ku Dios ta duna ta yuda un persona tuma akshon apesar di miedu

[Kuadro/Plachi na página 7]

Un Esposa Ekselente i Deboto na Dios

Sara tabata kasá ku un hòmber ku tabatin un fe sobresaliente. Pero Sara mes tambe a pone un ekselente ehèmpel. De echo, tres biaha Beibel ta menshoná Sara komo ehèmpel ku hende muhé deboto mester imitá. (Isaías 51:1, 2; Hebreonan 11:11; 1 Pedro 3:3-6) Aunke Beibel ta papia masha poko biaha di e muhé ekstraordinario akí, tòg nos por mira ku e tabatin bon kualidat.

Pensa, por ehèmpel, riba e manera ku Sara lo a reakshoná na promé instante ora Abraham a inform’é di Dios su mandato pa bandoná Ur. Lo el a puntra su mes unda nan lo a bai i dikon? Lo el a preokupá tokante nan nesesidatnan material? Lo el a sintié tristu ku e mester a bandoná su amigu- i famianan, sin sa ki dia òf si lo el a mira nan atrobe? Sin duda, e kosnan akí mester a pasa den Sara su mente. Apesar di esei, e tabata dispuesto pa bandoná Ur. El a konfia ku Yehova lo a bendishon’é si el a obedesé.—Echonan 7:2, 3.

Sara no solamente tabata un fiel sirbidó di Dios, ma un ekselente esposa tambe. Na lugá di kompetí ku su kasá den asuntunan di famia, ku amor i rèspèt el a apoyá Abraham segun ku Abraham a guia e famia. Di e manera ei, su adorno, esta su kualidatnan, a hasié un bunita persona.—1 Pedro 3:1-6.

E kualidatnan akí por benefisiá esposanan awe? Sí. Jill, kende tin mas ku 30 aña felismente kasá, a bisa: “E ehèmpel di Sara a siña mi ku mi mester sinti mi liber pa ekspresá mi punto di bista na mi esposo. Pero mi a komprondé tambe ku ta mi esposo, e kabes di famia, tin ku tuma desishon final. Anto ora e tuma un desishon, mi trabou ta pa hasi tur loke ta nesesario pa esaki resultá un éksito.”

Kisas loke a impreshoná nos mas di Sara ta esaki: Aunke e tabatin bunita aparensia, nunka el a bira orguyoso. (Génesis 12:10-13) Mas bien, humildemente el a apoyá Abraham, den tempu bon i malu. Sin duda, Abraham ku Sara tabata un pareha fiel i humilde ku a stima otro; nan bunita kualidatnan a kontribuí na nan felisidat.