Abrahanqa sinchi nunam karqan

Canaán markaman ëwakuyänampaq familiankunawan sirveqkuna alistakïkaqtam Abrahan rikarëkan (Génesis 12:1-5). Mëtsikaqmi cargonchö kayan, y llapankunata pushëqa manachi fäciltsu kanqa. ¿Imanöraq mana reqinqan markachö wanayanqankunata qonqa? Imëka kanqan Ur markachö tukï wayïkaptin, y yakupis y qewapis këkaptinqa, ¿manatsuraq más alli kanman tsëllachö pëpa kaqkunata wätanan? ¿Imaraq pasanqa tsë ëwëkäyanqan markachö pë qeshyakurkuptinqa? ¿Piraq familianta rikanqa? Itsachi Abrahanqa tsëkunapaq yarpachakurqan. Tsënö kaptimpis, manam tsëman yarparäkurtsu kakun. Ima kanan kaptimpis, Diosta wiyakunampaqmi listo këkan. ¡Imanö sinchi o jinchi nunam karqan!

¿IMATAQ SINCHI KËQA? Sinchi nunaqa, ruranampaq kaqkunatam sasa kaptimpis ruran, y tukï sasakunapa pasarpis allim tsarakun. Manam ni ichikllapis mantsapakuntsu. Pero tsëqa manam imëpis mana mantsakunampaq kaqtatsu rikätsikun. Sinöqa Diosmi kallpata qon mantsapakurpis alli tsarakunampaq.

¿IMANÖTAQ ABRAHAN TSËTA RIKÄTSIKURQAN? Abrahanqa wakinkuna mana rurayanqantam rurarqan. Winanqan markachö nunakunaqa mëtsika dioskunata y ïdolokunatam adorayaq. Pero pëqa, manam wakinkuna imatapis niyänanta mantsartsu alli rurëkanqanta haqirirqan. Pëqa kallpata tsarirmi wakinkunanöqa karqantsu y rasumpa kaq Diosta adorarqan, tsë Diosqa “llapampa hanampa këkaq” Jehovämi (Génesis 14:21, 22).

Imëkayoq këta kuyanampa rantinmi, Jehová Dios adorëta puntaman churarqan. Dios mana haqinampaq kaqman markäkurmi, Ur markachö yamë kawakunqanta haqirir mana imapis kaq sitiokunapa ëwakurqan. Itsachi tiempo pasariptinqa Ur markachö llapan kapunqankunaman yarparqan. Tsënö kaptimpis, llapan shonqunwanmi markäkurqan pë y familian llapan wanayanqankunata Jehová qonampaq kaqman. Pipitapis más precisaqtanömi Jehoväta rikarqan, y tsëmi kallpata qorqan mandanqankunata wiyakunampaq.

¿IMATATAQ YACHATSIMANTSIK? Puntataqa, nuna mayintsikkuna ruranqantsikkunata mana rurayaptimpis sinchi kanapaq y Diosta wiyakunapaqmi. Bibliaqa nimantsik Jehová ninqankunata wiyakoqkunataqa amïgonkuna y kastankuna alli këninkunawan michäyänampaq kaqtam (Juan 15:20). Pero Diospita yachakunqantsikkuna rasumpa kanqanman markäkurqa, manam mantsashuntsu respëtowan rasumpa kaqpita parlakïta (1 Pedru 3:15).

 Hinamampis, pëman markäkoqkunataqa llapan wanayanqanta qonampaqmi Dios awnikun. Tsëmi tsëman markäkurqa kallpata tarishun imëkayoq këta ashinapa rantin, Diospa kaqta puntaman churanapaq (Mateo 6:33). Rikärishun tsëta kananqa witsan huk familia imanö ruranqanta.

Ishkë pishillaraq wambrayoq këkarmi, Dougwan Beckyqa Bibliachö shoqakoq willakïkunapita yachatsikoqkunata wanayanqan nacionman ëwëta munayarqan. Tsëman alli pensëkur y Diosman mañakurirmi, tsëta rurayarqan. Dougmi kënö nin: “Imanö kayänäpaq kaqta mana musyëkar, llapannïkunata y wambräkunata apakurkur ëwakuyänäpaqqa sinchiraqmi kayänä karqan. Tsëmi yarquyänäpaq kaqta pensar Abrahanwan Sara llapan rurayanqampita yachakuyarqä. Jehoväman alläpa markäkuyanqanta y pë mana imëpis haqinqanta yarpäyanqäqa alläpam yanapayämarqan”.

¿Imatataq tariyashqa huk nacionpa ëwakuyanqampita? “Mana yupëpaq bendicionkunatam chaskiyarqö” ninmi Doug. Y nïkurmi kënö nin: “Wanayanqäkunallawanna kawakuyaptïmi kananqa más tiempökuna kan llapäkuna Diospita yachatsikuyänäpaq, parlakuriyänäpaq y wambrakunawan pukllayänäpaqpis. Precisaq kaqkunapaq tiempota tariyanqäpita imanö sientekuyanqätaqa manam imanö entiendetsikïta puëdeyätsu”.

Musyëmi, manam llapan nunakunatsu tsëkunata rurëtaqa puëdeyan. Pero Abrahannö Diospa kaqta puntaman churëta, y llapan wananqantsikta qomänapaq kaqman markäkïtaqa llapantsikmi puëdentsik. Tsëta rurarmi Biblia ninqannöpis, markäkurnin “Diosmi yanapaman y manam mantsacushaqtsu” nishun (Hebreus 13:5, 6).

[7 kaq päginachö dibüju y recuadru]

Diosta wiyakoq y alli warmi

Säraqa alläpa markäkoq o yärakog nunapa warminmi karqan, pero pëpis alläpa alli kawëninwan yachatsimantsikmi. Bibliaqa kima kutim rikätsimantsik Diosta sirweq warmikuna pëpita yachakïta puëdeyanqanta (Isaías 51:1, 2; Hebreus 11:11; 1 Pedru 3:3-6). Pëpaq Biblia alläpa mana willakuptimpis, puëdentsikmi imakunachö alli warmi kanqanta rikëta.

Pensarishun Ur markapita ëwakuyänampaq Dios Abrahanta niptin tsë llapanta imanö rikanqanta. ¿Musyëta munarqantsuraq mëta y imanir ëwayänampaq kaqta? ¿Yarpachakurqantsuraq imata mikuyänampaq kaqman? ¿Llakinarqantsuraq familiankunata y amïgonkunata haqinan kaptin, y imëllapis yapë tinkuyänampaq kaqta mana musyar? Mëraq tsëkunapaq yarpachakurqan. Tsënö kaptimpis, wiyakuptin Jehová bendecinampaq kaqta markäkurmi ëwakunampaq listo këkarqan (Hechos 7:2, 3).

Pero Säraqa manam Diospa wiyakoq sirweqninllatsu karqan, hina alli warmim karqan. Manam ni imëpis nunanwan igual këta tïrarqantsu. Imëpis llapan shonqunwanmi nunanta respetarqan y kuyëpam llapan ruranqanchö yanaparqan. Awmi, masqa shumaqyätseq imanö warmi kanqanmi (1 Pedru 3:1-6).

¿Säranö këqa yanapanku kanan witsan casada warmikunata? 30 watana casakushqa Jill shutiyoq warmim kënö nin: “Särapitam yachakurqö nunäta pensanqäkunata willë o musyatsiqa allilla kanqanta. Tsënö kaptimpis, manam ni imëpis qonqätsu pë familiäta rikaq kanqanta y tsënöpa pë ninqanta wiyakunä precisanqantaqa. Imatapis rurayänäpaq niptinqa, imëkanöpam yanapä”.

Tsënö kaptimpis, Särapitaqa huk precisaq yachatsikïtam yachakuntsik: alläpa shumaq warmi karpis, manam ni imë allishtukurqantsu (Génesis 12:10-13). Qollmi shonqu karmi allita y mana allita pasayanqanchöpis Abrahanta yanaparqan. Awmi, Abrahanwan Säraqa manam ni imëpis Diosta haqiyarqantsu, qollmi shonqu y kuyakoqmi kayarqan, y casado këninkunaqa ishkampaqpis huk bendicionmi karqan.