Aperaamo—O se Tagata Lototele

Na mātauina e Aperaamo lona aiga ma ana auauna, a o sauniuni e malaga atu i Kanana. (Kenese 12:1-5) A o vaavaai atu i nei tagata e toʻatele o loo faalagolago iā te ia le tausiga, na lagona ai e Aperaamo e telē lona tiute tauave mo i latou. Po o le a faapefea ona maua mea e manaʻomia i lenei nuu e lē masani ai? Faamata e faigofie lenei galuega telē pe ana nonofo pea i Uro, o se nuu e tamaoaiga i le tele o laufanua lafulemu ma le tele o vai? Ae e faapefea pe a maʻi ma maliu ai i lenā nuu fou? O ai o le a tausia lona aiga? E leʻi faavaivaia Aperaamo i na popolega. Sa maumauaʻi o ia e gaoioi ma le usiusitaʻi i le Atua, po o ā lava faatonuga e fetalai mai ai, ma o se faailoga moni lea o le lototele.

 O LE Ā LE LOTOTELE? O se uiga o le malosi, toa ma le lē fefe—o le tuufaafeagai o le lotovaivai ma le palaai. O le lototele, e lē faapea ai o le a lē taitai ona tatou lē fefefe. Nai lo o lea, o le tagata e maua le lototele mai i le Atua, e na te faia se gaoioiga e tusa lava pe e fefe.

NA FAAPEFEA ONA FAAALIA E APERAAMO LE LOTOTELE? Sa lotomalie Aperaamo e fai le finagalo o le Atua e tusa lava pe ese olaga e ola ai isi tagata. Sa soifua aʻe Aperaamo i se siʻomaga e tapuaʻi tagata i le tele o atua ma tupua. Peitaʻi, e leʻi avea le fefe i isi ma mea na taofia ai o ia mai i le faia o le mea saʻo. Nai lo o lea, na lototele Aperaamo e uia se isi auala o le olaga, i lona filifili e tapuaʻi i le Atua e toʻatasi—“o le Atua Silisili Ese,” o Ieova.—Kenese 14:21, 22.

Sa faamuamua e Aperaamo lana tapuaʻiga i le Atua moni nai lo o manaʻoga faaletino. Sa lotomalie o ia e tuua se olaga sologa lelei i Uro, ae malaga atu i le toafa ma lona faatuatuaina atoatoa o Ieova, o le a na tausia ona manaʻoga uma. E moni, a o faagasolo tausaga, atonu sa toe manatua e Aperaamo le olaga manaia sa olioli ai i Uro. Ae na mautinoa, o le a tausia pea o ia ma lona aiga e Ieova. O le pipii mau atu iā Ieova o Lē e sili ona tāua i lona olaga, na lototele ai Aperaamo e usiusitaʻi i faatonuga a le Atua.

O Ā NI LESONA MO I TATOU? E mafai ona tatou faaaʻoaʻo iā Aperaamo, i le atiaʻe o le lototele e usitaʻi ai iā Ieova e tusa lava pe e lē o faia faapea e isi. O se faaaʻoaʻoga, ua aʻoaʻo i le Tusi Paia o ē ua taofimau i o latou talitonuga iā Ieova le Atua, atonu o le a tetee mai i ai a latou uō ma tauaiga alolofa. (Ioane 15:20) Afai ua tatou talitonu i mea ua aʻoaʻoina e uiga iā Ieova, o le a tatou lē faavaivai la e faailoa atu o tatou talitonuga i se auala faaaloalo.—1 Peteru 3:15.

E mafai foʻi ona tatou faatuatua i le folafolaga a le Atua, o le a ia saunia mea mo i latou e faatuatua iā te ia. O lenā faatuatua, ua tatou maua ai le lototele e faamuamua mea faaleagaga i o tatou olaga, nai lo o le popole i meafaitino. (Mataio 6:33) Sei iloilo se mea faapena na faia e se tasi o aiga.

E ui e toʻalua la la fanau tama lāiti, ae na mananaʻo Doug ma Becky e siitia atu i se isi atunuu o loo manaʻomia tele ai ni tagata talaʻi o le tala lelei o le Tusi Paia. Ina ua uma ni saʻiliʻiliga ma ni tatalo faatauanau, ona la filifili loa lea e faaauau la la fuafuaga. Ua faapea ma Doug: “Sa manaʻomia le lototele e tapena ai tamaiti ma ō, e ui e leiloa tonu po o le ā le mea o le a oo iā i matou. Ae i le taimi muamua lava na filifili ai o le a matou siitia, na matou talanoaina ai le faaaʻoaʻoga a Aperaamo ma Sara. I le mafaufau atu i le auala na la faatuatuaina ai Ieova—ma le auala na fesoasoani ai o Ia iā i laʻua—na matuā fesoasoani lenā mea iā i matou.”

Na faapea mai Doug e tusa ai ma lo latou olaga i lenā atunuu ese: “E tele faamanuiaga na ma maua. Talu ai ua sili atu ona faigofie lo matou olaga, ua mafai nei ona faaalu faatasi le tele o le taimi o se aiga—e talaʻi ai, talanoa, ma taaalo faatasi ai ma la ma fanau. O se faalogona o le saʻolotoga e lē lava upu e faamatala ai.”

O le mea moni, e lē o tagata uma e mafai ona faia nei suiga tetele. Peitaʻi, e mafai e i tatou uma ona faataʻitaʻi i le faaaʻoaʻoga a Aperaamo, e ala i le faamuamua o le tapuaʻiga i le Atua, ma faatuatua o le a ia fesoasoani mai iā i tatou. Pe a faia faapea, ua tatou utagia ai le apoapoaʻiga a le Tusi Paia, “ina ia tatou lototetele ma faapea atu: ʻO Ieova o loʻu fesoasoani ia; ou te lē fefe lava.’”—Eperu 13:5, 6.

[Faamatalaga faaopoopo i le itulau 7]

O le tagata e maua le lototele mai i le Atua, e na te faia se gaoioiga e tusa lava pe e fefe

 [Pusa i le itulau 8]

O se Fafine e Amioatua ma o se Avā Tautele

Na faaipoipo atu Sara i se tamāloa e maoaʻe lona faatuatua. Ae na faataatia e lenei fafine amioatua, se faaaʻoaʻoga lelei e tatau ona faataʻitaʻi i ai. O le mea moni, e faatolu ona taʻua o ia i le Tusi Paia i lona igoa o Sara, o sē e tatau i fafine amioatua ona faataʻitaʻi i lana faaaʻoaʻoga. (Isaia 51:1, 2; Eperu 11:11; 1 Peteru 3:3-6) E ui e lē tele ni faamatalaga i le Tusi Paia e uiga i lenei fafine mataʻina, ae e tatou te iloa e iai ona uiga matagofie.

O se faaaʻoaʻoga, seʻi manatu i lana tali mai ina ua taʻu atu e Aperaamo iā te ia faatonuga a le Atua ina ia tuua Uro. Pe na masalosalo o ia po o fea o le a agaʻi i ai, ma aiseā? Pe na popole e uiga i o latou manaʻoga faaletino? Pe na faanoanoa ona o le a tuua uō ma aiga, ma le lē iloa po o afea o le a latou toe fevaaiaʻi ai? E mautinoa sa mafaufau o ia i na mea. E ui i lea, sa lotomalie e alu ma le faatuatua o le a faamanuia o ia e Ieova ona o lona usiusitaʻi.—Galuega 7:2, 3.

E lē gata o Sara o se auauna usiusitaʻi a le Atua, ae o ia foʻi o se avā e sili ona lelei. Nai lo o le tauvā ma lana tane po o ai e pulea mataupu o le aiga, na atiaʻe e Sara se faaaloalo mai i le loto mo lana tane, ma lagolagosua ma le alofa iā te ia i le taʻitaʻiga o le aiga. O lea, sa ia teuteu faaaulelei iā te ia—e lē gata i fafo, a o le tagata lilo i totonu.—1 Peteru 3:1-6.

Pe e aogā na uiga i aso nei? Ua faapea mai se fafine e suafa iā Jill, o lē ua silia i le 30 tausaga o loo fiafia pea lana faaipoipoga: “O le faaaʻoaʻoga a Sara ua aʻoaʻoina ai aʻu, ina ia saʻoloto e tautala atu ma faailoa atu oʻu manatu i laʻu tane. I le taimi e tasi, ona o laʻu tane o le ulu o le aiga, o lona tiute tauave la le faia o faaiʻuga, ae o laʻu vaega, o le faia o so o se mea ina ia taulau ai lenā faaiʻuga.”

Atonu o le lesona lenei e sili ona faagaeeloto e tatou te aʻoaʻoina mai iā Sara: E ui o se fafine e sili ona lalelei, ae e leʻi avea lona aulelei ma mea e mimita ai. (Kenese 12:10-13) Nai lo o lenā, sa lagolagosua ma le lotomaulalo o ia iā Aperaamo, i taimi e sologa lelei ai ma taimi faigatā i lo la olaga. E mautinoa o Aperaamo ma Sara o se ulugalii faamaoni, lotomaulalo, ma agalelei—ma o na uiga na avea ma faamanuiaga mo i laʻua uma.