Abrahán chixku tiku ni xpekuan

Abrahán kaʼakxilha la takaxmakgo xfamilia chu xlakskujnin xlakata naʼankgo kCanaán (Génesis 12:1-5). Putum tiku nakalin lipawankgo chu makgkatsi pi lhuwa tuku lakgaya. ¿La nakamaxki tuku maklakaskinkgo kʼakgtum kachikin niku ni lakgapasnan? ¿Ni tlakg tlan xwa komo anta xkatatamakgxtakgli kʼUr niku anan putum tuku xmaklakaskinkgo la chuchut chu sekget chu tiyat niku lhuwa makgalanan? ¿Tuku nala komo natatatla o nani kkachikin niku ama? ¿Tiku nakakuentajtlawa xfamilia? Max chuna lakapastakli. Maski chuna, ni makgapekualh. Maski katuwa tuku natitaxtu, xla liwana lakapastaknit nakgalhakgaxmata Dios. ¡Uma chixku nipara tsinu pekuan!

¿TUKU WAMPUTUN NI PEKUANKAN? Wa tuku tlawa pi chatum lataman liwana nakatsi tuku natlawa, chu ni maxanan. Pero uma ni wamputun pi nikxni pekuan. Wa Dios tiku matliwakglha maski pekuan.

¿LA LIMASIYALH ABRAHÁN PI NI XPEKUAN? Ni pekuanilh tuku xʼama lakgmin. Anta niku stakli Abrahán xkakninanikan lhuwa dioses chu imágenes. Pero xla putum kilhtamaku tlawalh tuku tlan, ni pekuanilh tuku xlakpuwankgolh amakgapitsin. Chu ni latamalh la amakgapitsi, kajwatiya kakninanilh chatum Dios: Jehová, «Dios xala Talhman» (Génesis 14:21, 22).

Pulana wililh takaknin nema xmaxki xaxlikana Dios chu ni wa tuku xkgalhiputulh. Makgxtakgli xatlan latamat nema xkgalhi kʼUr chu alh kʼdesierto, liwana xkatsi pi Dios ni xʼama makgxtakga. La titaxtutilhalh kilhtamaku max lakapastakli tuku xkgalhi anta kʼUr. Maski chuna nikxni lakpuwa pi Jehová ni xʼama maxki tuku xmaklakaskin chu tuku xmaklakaskin xfamilia. Xʼakxilha Jehová la tuku tlakg xlakaskinka kxlatamat, chu uma tlawalh pi xkgalhakgaxmatli xlimapakgsin.

¿TUKU KINKAMASIYANIYAN XLIʼAKXILHTIT? Pulana, kinkamasiyaniyan pi ni napekuanaw chu nakgalhakgaxmataw Jehová maski amakgapitsi tlawakgo tuku nitlan. Biblia wan pi tiku tatayakgo Jehová max wi tuku nakawanikgo xʼamigoskan chu xparienteskan xlakata nialh nakgalhtawakgakgo (Juan 15:20). Pero komo liwana kanajlayaw tuku katsiyaw xlakata xaxlikana Dios, ni napekuanaw natatayayaw tuku kanajlayaw (1 Pedro 3:15).

Nachuna, Dios wan pi nakamaxki tuku maklakaskinkgo tiku kanajlanikgo. Wa xlakata,  komo nakanajlaniyaw tuku wan Dios, ni katipekuaw naskujniyaw chu ni lhuwa tuku nakgalhiputunaw (Mateo 6:33). Kaʼakxilhwi la tlawanit akgtum familia la uku.

Maski Doug chu Becky kgalhikgo chatiy laktsu kaman, xʼamputunkgo kʼatanu país niku tlakg talakaskin tiku nalichuwinankgo Dios. Akxni liwana lakapastakkgolh chu tlawanikgolh oración Dios, tlawakgolh tuku xlakapastakkgonit. Doug wan: «Lu xtalakaskin ni xakpekuaw xlakata xakkalimaw laktsu kinkamanankan chu ni xakkatsiyaw la xʼama kinkakitaxtuniyan. Akxni ktsukuw lakapastakaw uma, klikgalhtawakgaw tuku tlawakgolh Abrahán chu Sara. Lu kinkamakgtayan akxni klakapastakwi la xlipawankgo Jehová chu la putum kilhtamaku kamakgtayalh».

¿Tuku kitaxtulh xlakata ankgolh atanu país? Doug wan: «Lu lhuwa tasikulunalin kmakglhtinanitaw». Chu na wan: «Xlakata la uku ni lhuwa tuku kkgalhiyaw, tlakg lhuwa kilhtamaku akxtum ktawilayaw: akxtum klichuwinanaw Dios, kkgalhchuwinanaw chu kkatakgamananaw kinkamanankan. Ni anan tuku xtachuna tuku kmakgkatsiyaw».

Pero, ni putum tlan lakgpalikgo xlatamatkan chuna la tlawakgolh Doug chu Becky. Kimputumkan tlan natlawayaw la Abrahán wa pulana nawiliyaw xtaskujut Dios chu nalipawanaw pi xla nakinkamaxkiyan tuku namaklakaskinaw. Chuna namakgantaxtiyaw xtastakyaw Biblia «ni anan ntamakpuwan: “Wa nkimPuchinakan nkimakgtayana; ni kaktimakpuwa[”]» (Hebreos 13:5, 6).

[Recuadro/Dibujo xla página 7]

Puskat tiku xkgalhakgaxmata Dios chu lu tlan xlikatsi

Sara xtamakgaxtokga chatum chixku tiku lu tliwakga xkgalhi takanajla, pero Sara nachuna xwanit. Biblia makgtutu lichuwinan pi xla kawilinilh lu tlan liʼakxilhtit lakpuskatin tiku kakninanikgo Dios (Isaías 51:1, 2; Hebreos 11:11; 1 Pedro 3:3-6). Maski kBiblia ni lu lhuwa lichuwinankan, tlan nakatsiyaw la xlikatsi Sara.

Kalakpuwaw xliʼakxilhtit, la kgalhtinalh Sara akxni Abrahán wanilh pi Dios xwaninit pi xmakgxtakgkgolh Ur. ¿Xkatsiputun niku xʼamakgolh chu tuku xlakata? ¿Xkatsiputun komo xkgalhikgolh tuku xwakgolh? ¿Lilipuwa o lilakgaputsalh xlakata ni xkatsi komo xʼamapa kaʼakxilha xʼamigos chu xfamilias? Max chuna lakpuwa. Maski chuna, makgxtakgli Ur xlakata liwana xkatsi pi Jehová xʼama sikulunatlawa xlakata xkgalhakgaxmatma (Hechos 7:2, 3).

Pero Sara ni kajwatiya xkgalhakgaxmata Dios, nachuna lu tlan puskat xwanit. Sara nikxni pulalimputulh xchik. Putum kilhtamaku maxkilh kakni xchixku chu xlakata xpaxki xatapaxuwan xmakgtaya tuku xtlawa. Xlikana, tuku stlan xmasiya uma puskat wa la xlikatsi (1 Pedro 3:1-6).

¿Na kamakgtaya lakpuskatin xala uku uma lakwan tayat? Jill chatum puskat tiku puxamakaw kata la tamakgaxtokgnit chu lu paxuwa wan: «Xliʼakxilhtit Sara kimasiyaninit pi tlan nakwani kinchixku tuku akit klakpuwan. Pero na liwana kkatsi pi wa xakgxakga familia, wa xlakata wa wan tuku natatlawa. Akxni xla laksaka tuku naktlawayaw, akit kmakgtaya».

Pero, atanu tuku tlakg xlakaskinka kinkamasiyaniyan Sara, wa pi: maski lu stlan puskat xwanit, nikxni lanka limakgkatsika (Génesis 12:10-13). Putum kilhtamaku makgtayalh Abrahán akxni tlan chu akxni nitlan xtitaxtukgo. Xlikana pi Abrahán chu Sara ni makgatsankgananikgolh Dios, ni lanka xkamakgkatsikan chu xpaxkinankgo, chu xtamakgaxtokgatkan lu tlan xwanit.