Abraham—Man i Gat Strongpela Bel

Abraham i lukluk long famili na ol wokboi bilong em taim ol i redi long go long Kenan. (Stat 12:1-5) Taim Abraham i skelim dispela bikpela lain, em i save olsem em i gat bikpela wok long lukautim ol long ol samting ol i mas kisim. Ol bai go long ples ol i no save long en, olsem na hau bai em i lukautim ol long haus, kaikai, na klos samting? Ating dispela wok bai isi moa sapos ol i bin stap bek long Ur, we i gat gutpela gras bilong ol sipsip i ken kaikai, gutpela graun, na ol hulwara. Olsem wanem sapos em i sik o dai long dispela nupela hap? Husat bai lukautim famili bilong em? Ating Abraham i tingting planti long ol dispela samting, tasol em i no larim dispela i pasim em, nogat. Em i tingting strong long bihainim tok bilong God maski wanem samting i kamap—dispela i soim olsem em i gat strongpela bel.

 STRONGPELA BEL EM WANEM SAMTING? Em pasin bilong man i no save pret long mekim wanpela samting em i mas mekim—na dispela i narapela kain long pasin bilong sem na pret. Pasin bilong strongim bel i no makim olsem man i no save pret, nogat. Taim God i strongim bel bilong man, dispela man inap mekim samting maski em i pret.

OLSEM WANEM ABRAHAM I SOIM OLSEM EM I GAT STRONGPELA BEL? Abraham i redi long stap narapela kain long olgeta arapela manmeri. Abraham i kamap bikpela long hap we ol manmeri i lotuim planti god na ol imis samting. Tasol em i no larim pasin bilong pret long ol narapela i pasim em long mekim samting em i save olsem i stret long mekim. Abraham i strongim bel na bihainim narapela rot, em i makim olsem em i laik lotuim wanpela God tasol—em “Bikpela Antap Tru,” Jehova.—Stat 14:21, 22.

Abraham i putim pasin bilong lotuim God tru i stap namba 1 samting, winim pasin bilong kisim ol samting bilong skin. Em i redi long lusim gutpela sindaun bilong em long Ur na i go long ples drai nating, na em i bilip tru olsem Jehova bai lukautim em long haus, kaikai, na klos samting. Taim ol yia i kamap na i go pinis, ating Abraham i tingim bek gutpela sindaun bilong em long Ur. Tasol Abraham i save tru olsem Jehova bai lukautim em na famili bilong em long ol samting ol i mas kisim. Em i pas gut wantaim Jehova na putim Jehova i stap olsem nambawan Man long laip bilong em, olsem na em i strongim bel na bihainim tok bilong God.

YUMI KISIM WANEM SKUL LONG DISPELA? Yumi ken bihainim pasin bilong Abraham long strongim bel na bihainim tok bilong Jehova, maski ol man i stap klostu long yumi ol i no mekim olsem. Olsem: Baibel i tok taim wanpela man i bilip long God Jehova, ating sampela pren o ol wanblut bai birua long em na ol i ting dispela i bilong helpim em. (Jon 15:20) Tasol taim yumi bilip tru long save yumi kisim long Jehova, yumi bai sanap strong na sambai long bilip bilong yumi.—1 Pita 3:15.

Yumi ken bilip tru long tok promis bilong God olsem em bai lukautim ol manmeri i bilip long em. Kain bilip olsem i strongim bel bilong yumi long putim ol samting bilong spirit i stap namba wan long laip bilong yumi, na i no ol samting bilong skin. (Matyu 6:33) Tingim samting wanpela famili i bin mekim.

Doug na Becky i gat tupela liklik pikinini man, tasol ol i laik go sindaun long kantri i sot long ol man bilong autim gutnius bilong Baibel. Bihain long ol i beten planti na skelim gut ol samting, ol i kirap mekim ol samting em ol i bin plen long mekim. Doug i tok: “Mipela i mas strongim bel na kisim ol pikinini na i go, mipela i no save long wanem samting bai painim mipela long hap mipela i go long en. Tasol paslain long mipela i mekim disisen, mipela i bin skelim gut stori bilong Abraham na Sara. Mipela i tingim pasin bilong ol long bilip long Jehova na olsem wanem Jehova i bin lukautim ol na em i no lusim ol, na dispela i helpim tru mipela.”

Long sindaun bilong ol long nupela kantri, Doug i tok: “Mipela i kisim planti gutpela blesing.” Em i tok moa: “Mipela i no gat planti samting na sindaun bilong mipela i isi moa, olsem na planti taim mipela famili olgeta i mekim samting wantaim, olsem autim tok, toktok wantaim narapela narapela, na pilai wantaim ol pikinini man bilong mipela. Mipela i kisim bikpela amamas tru long dispela sindaun bilong mipela.”

Tru, i no olgeta man inap mekim kain bikpela senis olsem long sindaun bilong ol. Tasol yumi olgeta inap bihainim gutpela pasin bilong Abraham na putim pasin bilong lotuim God i stap namba 1 samting na bilip tru olsem Em bai lukautim yumi. Taim yumi mekim olsem, yumi bihainim tok bilong Baibel long i “gat strongpela bel na tok: ‘Jehova em i helpim bilong mi. Mi no inap pret.’”—Hibru 13:5, 6.

[Rait long pes 7]

Taim God i strongim bel bilong man, dispela man inap mekim samting maski em i pret

 [Blok\Piksa long pes 8]

Em i Pret Long God na Stap Gutpela Meri Marit

Sara i maritim wanpela man i gat strongpela bilip long God. Tasol em tu i save pret long God, na pasin bilong em i stap olsem gutpela piksa. Inap 3-pela taim Baibel i kolim em olsem meri i stap gutpela piksa em ol narapela meri i ken bihainim. (Aisaia 51:1, 2; Hibru 11:11; 1 Pita 3:3-6) Maski Baibel i no stori planti long dispela bilipmeri, yumi inap luksave olsem em i gat ol gutpela pasin tru.

Tingim, Sara i gat wanem tingting taim Abraham i tokim em long tok bilong God olsem ol bai lusim Ur? Yu ting em i tingting planti long ol bai go we na bilong wanem ol i go? Yu ting em i tingting planti long ol samting olsem haus, kaikai, na klos samting? Yu ting em i bel hevi long lusim ol famili na pren bilong em, long wanem, em i no save em bai lukim ol gen o nogat? Ating em i tingim ol dispela samting. Tasol em i redi long lusim olgeta dispela samting, long wanem, em i bilip olsem Jehova bai blesim pasin bilong em long bihainim tok.—Aposel 7:2, 3.

Em i stap gutpela wokmeri bilong God, na tu, em i stap olsem gutpela meri marit. Em i no resis wantaim man bilong em long bosim ol samting long sindaun bilong famili, em i rispek tru long man bilong em na sapotim wok em i mekim bilong stiaim na lukautim famili. Long dispela rot, em i kamapim ol gutpela pasin we i stap olsem naispela bilas bilong em.—1 Pita 3:1-6.

Yu ting ol dispela pasin inap helpim ol meri marit long nau? Jill, husat i marit inap 30 yia na em i stap amamas, em i tok: “Gutpela piksa bilong Sara i skulim mi olsem mi no ken surik long autim tingting bilong mi long man bilong mi. Tasol long wankain taim, man bilong mi em i het bilong famili na em i gat wok long wokim ol fainol disisen. Taim em i mekim olsem, orait mi mas mekim olgeta samting mi inap mekim bambai disisen bilong em i wok gut.”

Nambawan gutpela skul yumi kisim long Sara em olsem: Maski em i luk naispela tru, em i no larim gutpela skin bilong em i mekim em i kisim pasin antap, nogat. (Stat 12:10-13) Long laip bilong ol, Sara i mekim pasin daun na sapotim Abraham long gutpela taim na taim nogut. Yumi ken save tru olsem Abraham na Sara i stap gut wantaim, ol i gat pasin daun, na ol i gat pasin bilong laikim tru narapela narapela—tupela i stap olsem gutpela poroman tru.