Abrahama—Wanuna Wa Xivindzi

Abrahama u languta ndyangu wakwe ni malandza yakwe loko va ri karhi va lunghiselela ku ya eKanana. (Genesa 12:1-5) Loko a ri karhi a langute ntlawa lowu, lowukulu wa vanhu lava a va titshege hi yena leswaku a va wundla, Abrahama u vone vutihlamuleri byakwe eka vona. Xana a ta va wundla njhani hi tlhelo ra nyama etikweni leri va nga ri tiviki? Xana ku va khathalela a swi ta n’wi olovela ku fana ni le Ura, endhawini leyi fuweke leyi nga ni madyelo yo tala, misava leyi noneke ni mati yo tala? Xana a ku ta endleka yini loko o vabya kumbe a fa etikweni lerintshwa? I mani loyi a ta khathalela ndyangu wakwe? Hambileswi Abrahama a a ri ni mivilelo yo tano, a nga ku pfumelelanga ku chava kakwe ku n’wi heta matimba. A tiyimisele ku yingisa swileriso swa Xikwembu, ku nga khathariseki leswi a swi ta endleka—ku nga mfungho lowu kombisaka xivindzi xa xiviri.

 I YINI XIVINDZI? I mfanelo yo va ni matimba ni vurhena—ku nga ri ku khomiwa hi rhumbyana kumbe ku va toya. Ku va ni xivindzi a swi vuli swona leswaku a hi nge kali hi chava. Ematshan’weni ya sweswo, munhu loyi Xikwembu xi n’wi nyikeke xivindzi u teka goza ku nga khathariseki ku chava kakwe.

XANA ABRAHAMA U XI KOMBISE NJHANI XIVINDZI? Abrahama a tiyimisele ku endla ku rhandza ka Xikwembu hambileswi munhu un’wana ni un’wana a a hanya hi ndlela leyi hambaneke ni ya yena. Abrahama u kulele endhawini leyi eka yona vanhu va kona a va gandzela swikwembu ni swifaniso swo tala swa hava. Kambe, a nga pfumelelanga leswaku ku chava leswi van’wana a va ta swi ehleketa swi n’wi tshikisa ku endla leswi a swi tiva leswaku a swi ri swinene. Ematshan’weni ya sweswo, hi xivindzi Abrahama u hlawule leswi hambaneke, u hlawule ku gandzela Xikwembu xin’we ntsena ku nga Yehovha “Xikwembu Lexi nge Henhla-henhla.”—Genesa 14:21, 22.

Abrahama u rhangise vugandzeri byakwe bya Xikwembu xa ntiyiso ematshan’weni ya swilaveko swa nyama. A tiyimisele ku siya vulovolovo bya le Ura kutani a ya emananga, a ri ni ntshembo lowu tiyeke wa leswaku Yehovha u ta khathalela swilaveko swakwe swa nyama. I ntiyiso leswaku loko malembe ma ri karhi ma famba, Abrahama a nga ha va a ehlekete hi swilo swin’wana swa vulovolovo leswi a tiphineke ha swona eUra. Kambe Abrahama a tiyiseka leswaku Yehovha minkarhi hinkwayo u ta n’wi wundla swin’we ni ndyangu wakwe. Hikwalaho ko namarhela Yehovha tanihi Munhu wa nkoka swinene evuton’wini byakwe, Abrahama u kume xivindzi xo yingisa swileriso swa Xikwembu.

I YINI LESWI HI SWI DYONDZAKA? Hi nga tekelela Abrahama hi ku hlakulela xivindzi xo yingisa Yehovha, hambiloko vanhu lava hi rhendzeleke va nga endli tano. Hi xikombiso, Bibele yi dyondzisa leswaku lava yimelaka ripfumelo ra vona eka Yehovha Xikwembu va nga ha kanetiwa, kumbexana hi vanghana kumbe maxaka ya vona. (Yohane 15:20) Hambiswiritano, loko hi khorwiseka hileswi hi swi dyondzaka hi Yehovha, hi yimela ripfumelo ra hina hi ndlela leyi xiximekaka.—1 Petro 3:15.

Nakambe hi nga tshemba xitshembiso xa Xikwembu xa leswaku xi ta wundla vanhu lava kombisaka ripfumelo eka xona. Ntshembo wolowo wu hi nyika xivindzi xo rhangisa swilo swa moya evuton’wini bya hina ematshan’wini ya swilo swa nyama. (Matewu 6:33) Xiya leswaku ndyangu wun’wana wu swi endle njhani sweswo.

Hambileswi a va ri ni vana vambirhi, Doug na Becky, a va lava ku rhurhela etikweni leri a ri ri ni xilaveko lexikulu xa vachumayeri va mahungu lamanene ya Bibele. Endzhaku ko endla vulavisisi hi vukheta ni ku khongela hi mbilu hinkwayo, va endle xiboho xo ya emahlweni ni makungu ya vona. Doug u ri: “A swi lava xivindzi ku rhurha ni vana va hina, hi nga swi tivi kahle leswaku swilo swi ta hi fambela njhani. Kambe loko hi sungula ku ehleketa hi ku rhurha, hi bule hi xikombiso xa Abrahama na Sara. Hakunene swi hi pfunile ku ehleketa hi ndlela leyi va tshembeleke eka Yehovha ha yona ni ndlela leyi a va pfuneke ha yona minkarhi hinkwayo.”

Loko a vulavula hi vutomi bya vona bya le tikweni rimbe, Doug u ri: “Hi vuyeriwe hi ndlela leyikulu. Leswi hi hanyaka vutomi byo olova, ha swi kota ku heta nkarhi wo tala hi siku hi ri swin’we tanihi ndyangu—hi chumayela, hi bula swin’we ni ku tlanga ni swifanyetana swa hina. Hikwalaho ko hanya vutomi byo olova hi ni ntshunxeko wo tala wo endla swilo leswi nga swinene eka ndyangu wa hina ni vugandzeri bya hina.”

I ntiyiso leswaku a hi munhu un’wana ni un’wana loyi a nga vaka exiyin’weni xo endla ku cinca ko tano lokukulu. Kambe hinkwerhu hi nga tekelela xikombiso xa Abrahama hi ku rhangisa ku gandzela Xikwembu, hi ri ni ntshembo wa leswaku xi ta hi seketela. Loko hi endla tano, hi yingisa xitsundzuxo xa le Bibeleni xo “va ni xivindzi lexikulu kutani hi ku: ‘Yehovha i mupfuni wa mina; ndzi nga ka ndzi nga chavi.’”—Vaheveru 13:5, 6.

[Marito lama tshahiweke exihlokweni lama nga eka tluka 7]

Munhu loyi Xikwembu xi n’wi nyikeke xivindzi u teka goza ku nga khathariseki ku chava kakwe

 [Bokisi/Xifaniso lexi nga eka tluka 8]

Wansati La Chavaka Xikwembu Tlhelo Wansati Wa Risima

Sara a tekiwe hi wanuna la nga ni ripfumelo lerikulu. Kambe wansati loyi, loyi a chavaka Xikwembu u veke xikombiso lexinene. Entiyisweni, Bibele yi n’wi boxa ku ringana minkarhi yinharhu tanihi xikombiso lexi vavasati lava chavaka Xikwembu va faneleke va xi tekelela. (Esaya 51:1, 2; Vaheveru 11:11; 1 Petro 3:3-6) Hambileswi Matsalwa ma nga vuliki swo tala hi wansati loyi, loyi a xiyekaka, hi nga swi vona leswaku a a ri ni timfanelo letinene.

Hi xikombiso, ehleketa hi ndlela leyi Sara a anguleke ha yona ro sungula loko Abrahama a n’wi byela hi xileriso xa Xikwembu xa leswaku va rhurha eUra. Xana u tivutisile leswaku va ya kwihi naswona ha yini? Xana a karhateka hi swilaveko swa vona swa nyama? Xana u ve ni gome hikwalaho ka leswi a va ta siya vanghana ni swirho swa ndyangu wakwe, handle ko tiva leswaku a ta tlhela a va vona rini? Handle ko kanakana, u anakanye hi swilo swo tano. Hambiswiritano, a tiyimisele ku rhurha, a ri ni ntshembo wa leswaku Yehovha a ta n’wi katekisa hikwalaho ka ku yingisa kakwe.—Mintirho 7:2, 3.

Ku engetela eka leswi a ri nandza wo tshembeka wa Xikwembu, Sara a a ri nsati lonene. Ematshan’weni yo phikizana ni nuna wakwe eka vulawuri bya ndyangu, u hlakulele ku xixima nuna wakwe hi mbilu hinkwayo, a n’wi seketela hi rirhandzu loko a ri karhi a kongomisa ndyangu wa vona. Hi ku endla tano, u tisasekisile hikwalaho ka vumunhu byakwe.—1 Petro 3:1-6.

Xana mikhuva yo tano yi nga vuyerisa vavasati namuntlha? Wansati un’wana la vuriwaka Jill, loyi a veke ni ntsako evukatini byakwe ku ringana malembe yo tlula 30 u ri: “Xikombiso xa Sara xi ndzi dyondzise leswaku ndzi fanele ndzi titwa ndzi ntshunxekile ku vulavula ni ku phofula vonelo ra mina eka nuna wa mina. Hi nkarhi lowu fanaka, tanihi nhloko ya ndyangu, nuna wa mina u ni vutihlamuleri byo endla xiboho xo hetelela. Loko se a xi endlile, i ntirho wa mina ku endla hinkwaswo leswi ndzi nga swi kotaka leswaku xiboho xexo xi va lexi tirhaka.”

Kumbexana dyondzo leyi khumbaka swinene leyi hi yi dyondzaka eka Sara hi leyi: Hambileswi a a sasekile swinene, a nga ku pfumelelanga ku saseka kakwe ka nyama ku n’wi endla a va la tikukumuxaka. (Genesa 12:10-13) Ematshan’weni ya sweswo, u seketele Abrahama hi ku titsongahata eka minkarhi leyinene ni ya mangava ya vutomi bya vona va ri swin’we. Handle ko kanakana, Abrahama na Sara a va ri mpatswa lowu tshembekeke, lowu titsongahataka ni lowu nga ni rirhandzu—ku nga mpatswa lowu endleke leswaku ha un’we wa vona a kuma mikateko.