Abraham​—e Ir Be’ nib Mudugil Laniyan’

I yaliy Abraham chon e tabinaw rok nge pi tapigpig rok u nap’an ni yad be fal’eg rogorad ni nga ranod nga Kanaan. (Genesis 12:1-5) Nap’an ni guy Abraham ni yad boor ma yad be taga’ ngak ma ke nang nib gel e maruwel nib milfan ngak. Uw rogon me yog ni pi’ e tin nib t’uf rorad u nap’an ni yad bay ko fare binaw ni ke yog Jehovah ni nga ranod ngay? Gur, kab mom ni nge ayuwegrad ni faanra ngar pared u Ur, nreb e binaw nib fel’ rogon, ma bay e ted riy nib ga’ yang nib galunglung e pan riy ni fan ko gamanman rorad, maku boor e ran riy? Ma uw rogon ni faanra yim’ Abraham u lan fare binaw ni nga ranod ngay, mini’ e ra ayuweg chon e tabinaw rok? De pag Abraham e magafan’ rok nge taleg ndabi yan ko re binaw nem. Kari mudugil laniyan’ ni nge fol ko n’en ni ke yog Got ngak ni demtrug ko mang e ra buch rok.

MANG E BE YIP’ FAN NI KE MUDUGIL LANIN’UY? Ra bay e re fel’ngin ney rok be’ ma der maruwar laniyan’, machane gathi aram e be yip’ fan nder ma rus, ya be’ ni aram rogon e ma athamgil ni nga i rin’ e tin ni manang nib fel’ ni yugu aram rogon ni be rus.

UW ROGON NI DAG ABRAHAM NI KE MUDUGIL LANIYAN’? Da i rus Abraham ni nge rin’ ban’en nib thil ko n’en ni be rin’ yooren e girdi’. I par Abraham u lan reb e binaw ni yooren e girdi’ riy e yad ma liyor nga boor mit e liyos. Machane i rin’ e n’en ni be lemnag nib mat’aw ndemtrug ko mang e be lemnag yugu boch e girdi’. Aram fan ni i dugliy ni nge pigpig ngak Jehovah ni ir e Got ni “Th’abi Tolang.”​—Genesis 14:21, 22.

I m’oneg Abraham e pigpig rok ngak e bin riyul’ e Got ko bin ni nge yognag e tayim ni boor ni fan ko chugum. Ke m’agan’ ngay ni nge chuw u Ur nreb e binaw nib fel’ rogon me yan nga daken e ted ya ri be pagan’ ngak Jehovah nra pi’ urngin ban’en nib t’uf rok. Tomuren ni ke yan boor e duw ma rayog ni nge yib ngan’ Abraham boch ban’en nib fel’ ni ke pag u Ur. Machane ke mudugil laniyan’ nra pi’ Jehovah e tin nib t’uf ko tabinaw rok ni gubin ngiyal’. I tay Abraham Jehovah ni ir e En nth’abi ga’ fan ko yafas rok, ere ke mudugil laniyan’ ni nge fol ko thin rok.

MANG E GAD RA FIL RIY? Rayog ni ngad folwokgad rok Abraham ni ke mudugil laniyan’ ni nge fol rok Jehovah ni yugu aram rogon ni tin ni ka bay e girdi’ u toobdad e gathi aram e n’en ni yad be rin’. Ni bod ni be yog e Bible ni piin ni yad be pigpig ngak Jehovah u fithik’ e yul’yul’ e rayog ni nge togopuluw e pi fager ara girdi’ rorad ngorad. (John 15:20) Machane faanra ke mich u wan’dad e n’en ni kad filed u murung’agen Jehovah ma  gad ra yul’yul’ ngak u fithik’ e tayfan.​—1 Peter 3:15.

Ku rayog ni nge pagan’dad ko tin ni ke micheg Got nra pi’ e tin nib t’uf ko piin nriyul’ ni ke michan’rad ngak. Michan’ ni aram rogon e ra pi’ e athamgil nga lanin’dad ni ngad tedan’dad ko tirok Got ban’en ma gathi chugum. (Matthew 6:33) Mu lemnag ko uw rogon ni ke rin’ reb e tabinaw e re n’ey.

Doug nge Becky e bay l’agruw e bitir rorow ma yow baadag ni nga ranow nga reb e binaw nib t’uf e ayuw riy ko machib. Tomuren ni kar fal’egew i gay murung’agen boch ban’en mu ur meybilgow u fithik’ e yul’yul’, mar dugliyew ni ngar rin’ew e n’en ni kar lemnagew. Ke yog Doug ni gaar: “Ba t’uf ni nge par nib mudugil lanin’mow nge yog ni nggu chuwgad e bitir romow ni yugu aram rogon ni dawor gu nanged ko mang e ra buch romad. Machane u m’on ni nggu dugliyew ban’en mug weliyew e ppin rog murung’agen e n’en ni rin’ Abraham nge Sarah. Pagan’ rorow ngak Jehovah nge rogon ni ke ayuwegrow e ireray e n’en ni ke ayuwegmow.”

I weliy Doug murung’agen e yafas rorad ko gin ni ka ranod ngay ko machib ni gaar: “Boor e kanawo’ ni kan tow’athnagrow riy.” Me ulul ngay ni gaar: “Bochan ni ke lich e maruwel nga puluwmow, ma ke yog ni nge yoor ban’en ni nggu rin’ed u taabang ni bod ni nggu warod ko machib, mug sabethingad, mug fafelgad e bitir u taabang. Ke puf rogon e yafas romad.”

Riyul’ ni gathi urngin e girdi’ e rayog ni ngar thilyeged e yafas rorad ni aram rogon. Machane gadad gubin nrayog ni ngad folwokgad rok Abraham ni ngad ted ni liyor ku Got e ba m’on ko yafas rodad me pagan’dad nra ayuwegdad Jehovah. Gad ra rin’ ni aram rogon ma aram e gad be fol ko fare thin nu Bible ni be gaar: “Dab kud tamdaggad ma nge lungudad, ‘I Somol e ir e be ayuwegeg, ere dab gu tamdag.’”​—Hebrews 13:5, 6.

[Box/​Picture on page 7]

Be’ nib Pin nib Fel’ u Wan’ Got ma En Leengiy nib Fel’

Ke leengiy Sarah reb e pumoon nib gel e michan’ rok. Machane re ppin ney e ke dag e ngongol nib fel’. Dalip yay ni be weliy e Bible murung’agen ni ir be’ nib fel’ ni ngan folwok rok, ma pi verse ney e bay fithingan riy. (Isaiah 51:1, 2; Hebrews 11:11; 1 Peter 3:3-6) Yugu aram rogon ni gathi ri boor e thin nu Bible ni be weliy murung’agen Sarah, machane bay fel’ngin nib fel’ nrayog ni ngad filed ban’en riy.

Mu lemnag e n’en ni rin’ Sarah u nap’an ni yog Abraham ngak ni ngar chuwgad u Ur. Gur, ke lemnag ko uw e nga ranod ngay nge mang fan? Ke magafan’ ko tin nib t’uf rorad? Ke kireban’ ni nge pag e pi fager rok nge boch e girdi’ ni bay rogorad, ma de nang ko wuin e rayog ni ngkur mada’gad bayay? Dariy e maruwar riy ni ke yib ngan’ Sarah e pi n’em. Machane ke m’agan’ ngay ni nge chuw u rom ya be pagan’ ngak Jehovah nra tow’athnag.​—Acts 7:2, 3. 

Sarah e gathi kemus ni ir reb e tapigpig rok Jehovah ni ma fol, ya ku ir reb i leengiy nib fel’. De lemnag ni nge fek e liw ko pumoon rok, ya ke athamgil ni nge tayfan, maku be athamgil ni nge ayuweg e pumoon rok ni ir e en ni ma gagiyegnag e tabinaw rorow. Bochan e n’en ni rin’ me par ni ir reb e ppin nib manigil.​—1 Peter 3:1-6.

Gur, ngongol rok Sarah e rayog ni nge ayuweg e piin leengiy e ngiyal’ ney? Reb e ppin ni Jill fithingan ni ke un ko mabgol u lan 30 e duw e ke yog ni gaar: “N’en ni ke rin’ Sarah e ke ayuwegeg ni nge yog ni nggu weliy e n’en ni bay u lanin’ug ko pumoon rog nib puf rogog. Pumoon rog e ir e en lolugen e tabinaw, ma ir e ma dugliy ko mang e ngan rin’. Ma tomuren ni ke dugliy boch ban’en, ma gag e ke milfan ngog ni nggu rin’ e tin rayog rog ni nge yib angin e n’en ni ke dugliy.”

Sana n’en ni th’abi fel’ ni gad ra fil rok Sarah e yugu aram rogon ni ir be’ nib pidorang ma de pag ni nge tolang e lem rok. (Genesis 12:10-13) Ya gubin ngiyal’ ni ma ayuweg e pumoon rok u fithik’ e sobut’an’. Dariy e maruwar riy ni Abraham nge Sarah e ba wu’ i mabgol ni yow ba yul’yul’, ma yow ba sobut’an’, ma yow ma t’ufegew yow, ma ra bagayow ma be ayuweg bagayow.