Abrahamu Ali Uwaicefya

Bushiku bumo Abrahamu aikele mu cintelelwe ce tenti lyakwe, aletuusha ninshi akasuba nakalotoka. Ilyo aloleshe akatalamukila, amwene abaume batatu abatandashi. * Ukwabula ukwikata na ku cani, afumine mwi tenti lyakwe ulubilo mu kubasengela, kabili abebele ukuti baye nankwe kwi tenti pa kuti batuusheko. Abebele ukuti alabapeela “umukate,” lelo apekenye ifya kulya ifingi nga nshi apaali umukate, umukaka uwatikama, umukaka, e lyo ne nama iisuma. Ilyo Abrahamu apekanishishe abeni ifi fya kulya, talangile fye ukuti ali ni kapekape, lelo alangile no kuti ali uwaicefya icine cine, nge fyo twalamona.—Ukutendeka 18:1-8.

BUSHE ISHIWI LYA KUTI UKUICEFYA LYALOLA MWI? Ukuicefya kukanaba ne cilumba. Umuntu uwaicefya alishiba ukuti bambi balimucila muli fimo. (Abena Filipi 2:3) Alakutika ku fyo bambi baletontonkanya, kabili alaitemenwa ukubabombela imilimo iimoneka iya pa nshi.

BUSHE ABRAHAMU ALANGILE SHANI UKUTI ALI UWAICEFYA? Abrahamu alebombela bambi mu kuitemenwa. Nge fyo tulandilepo pa ntendekelo, ilyo Abrahamu amwene abeni batatu, ilyo line fye atendeke ukubapekanishisha ifyo balekabila. Sara, umukashi wakwe bwangu bwangu atendeke ukupekanya ifya kulya. Lelo nga mwamona, uwabombele imilimo iingi ni Abrahamu: E waile ulubilo mu kusengela abeni, e wabebele ukuti alabapeela ifya kulya, e wabutukile ku mukuni no kusalapo inama iya kwipaya, kabili e wapekenye no kuteka ifya kulya apo abeni bali. Taebele ababomfi bakwe ukuti ebo babombe iyi milimo, Abrahamu uwali uwaicefya e wabombele iyi milimo yonse. Talemona kwati alicindeme sana ica kuti teti abombe imilimo ya musango yu.

Abrahamu aleumfwa ku fyalelanda abantu aletungulula. Baibolo yalandapo fye ifinono pa  kulanshanya kwaleba pali Abrahamu na Sara. Lelo, tubelenga imiku ibili muli Baibolo ukuti Abrahamu alikutike ku fyo Sara amwebele kabili alicitile ifyo fine. (Ukutendeka 16:2; 21:8-14) Umuku umo uo Sara aebele Abrahamu ifyo aletontonkanya, “calibipile nga nshi kuli Abrahamu.” Lelo ilyo Yehova alandile nankwe, ukumulondolwela ukuti ifyo Sara amwebele fyali fye bwino, Abrahamu ali-icefeshe no kucita filya fine umukashi wakwe amwebele.

FINSHI TWINGASAMBILILAKO? Nga cine cine twali-icefya, tukalaitemenwa ukubombela bambi. Tukalaumfwa bwino ukubomba apapelele amaka yesu pa kuti bambi basekelemo.

Na kabili kuti twalanga ukuti twaliicefya ku fyo tucita nga ca kuti bambi batweba ifyo baletontonkanya pa fintu fimo. Mu nshita ya kukaana ifyo batweba pa mulandu fye wa kuti tatwafitontonkanyapo, kuti cawama ukumfwa ifyo batweba. (Amapinda 15:22) Ukumfwako na kuli bambi kuti kwaafwa sana abaletungulula. Ba John, abangalila imilimo batile: “Nasanga ukuti kangalila umusuma afwile ukuba muntu uwa kuti abo angalila baleyumfwa abantungwa ukumweba fyonse ifyo baletontonkanya.” Balandile no kuti: “Umuntu afwile ukuba uwaicefya pa kuti alemona ukuti abo angalila kuti bamupandako amano ya kucita ifintu fimo. Takwaba uuli onse, nangu fye ni ulya uwangalila imilimo, uwaishiba fyonse.”

Nga twapashanya Abrahamu pa kukutika ku fyo bambi baletontonkanya pa fintu na pa kubabombela imilimo iimoneka iya pa nshi, Yehova akatutemwa. Na kuba, “Lesa acincintila aba matutumuko, lelo apeela icikuuku cakwe ku baicefya.”—1 Petro 5:5.

[Futunoti]