Ebraham—Wan Man We Tingting Blong Hem i Stap Daon

Long bigfala san long medel dei, Ebraham i stap sidaon aninit long haos tapolen blong hem, i harem gud long sado blong haos tapolen ya. Taem hem i lukluk longwe, hem i luk tri man oli stap wokbaot. * Wantaem nomo, Ebraham i girap, i resis blong go toktok wetem trifala strenja ya. Hem i talem long trifala blong kam spel smol long haos blong hem mo harem gud wetem hem. Hem i talem long trifala se bambae hem i go karem “smol kakae,” blong trifala i kakae. Be biaen hem i go mekemrere wan bigfala kakae. Hot bred, bata, melek, mo gudfala mit we i sofsof gud. Kakae ya we Ebraham i mekem i soemaot gudfala fasin blong hem blong tekem ol strenja oli kam long haos blong hem. Mo tu i soemaot we Ebraham i wan man we tingting blong hem i stap daon. Bambae yumi lukluk moa long stori ya.—Jenesis 18:1-8.

?MAN WE TINGTING BLONG HEM I STAP DAON I OLSEM WANEM? Man we tingting blong hem i stap daon, i no flas mo i no praod. Hem i tingbaot se ol narafala man oli save mekem sam samting we i gud moa i bitim hem. (Filipae 2:3) Taem ol narafala oli talemaot tingting blong olgeta, hem i lesin long olgeta. Mo hem i glad blong mekem ol smosmol wok blong givhan long narafala.

?EBRAHAM I MEKEM WANEM BLONG SOEMAOT SE TINGTING BLONG HEM I STAP DAON? Ebraham i glad blong mekem wok blong givhan long ol narafala. Olsem yumi tokbaot finis, taem Ebraham i luk trifala strenja ya, wantaem nomo hem i rerem ol samting we oli nidim. Sera, woman blong Ebraham, hem tu i hareap blong rerem kakae. Be yu makem hu i mekem bighaf blong ol wok: Ebraham i girap i resis blong go toktok wetem ol strenja. Hem i talem se bambae oli kam kakae. Hem i resis i go long ples we ol buluk oli stap long hem, i jusumaot wan smol buluk blong oli kakae. Mo hem i karem ol kakae i kam long trifala. Ebraham i no askem ol man blong wok blong hem blong oli mekemrere ol samting ya. Defren olgeta, from we tingting blong hem i stap daon, hem i glad blong mekem eni samting we hem i mas mekem blong rerem kakae ya. Hem i no ting se hem i hae moa long ol narafala nao hem i no save mekem ol wok ya blong givhan long olgeta.

 Taem olgeta we Ebraham i lukaot long olgeta oli talemaot tingting blong olgeta, hem i lesin long olgeta. Baebol i tokbaot sam samting nomo we Ebraham mo Sera tufala i storian tugeta long hem. Be tu taem Baebol i tokbaot se Ebraham i lesin long Sera taem Sera i talemaot tingting blong hem, mo Ebraham i folem tingting blong Sera. (Jenesis 16:2; 21:8-14) Wan taem, tingting we Sera i talem i mekem “Ebraham i harem nogud tumas.” Be Jehova i talem long Ebraham se i gud hem i folem tingting blong Sera. Ale Ebraham i mekem tingting blong hem i stap daon, mo hem i mekem samting we Sera i talem.

?YUMI LANEM WANEM? Sipos tingting blong yumi i stap daon, bambae yumi glad blong mekem wok blong givhan long ol narafala man. Bambae yumi harem gud blong mekem eni samting we yumi save mekem blong narafala i harem gud moa.

Fasin blong yumi blong lesin taem narafala i talemaot tingting blong hem, i save soemaot we tingting blong yumi i stap daon. Yumi waes sipos yumi soemaot long narafala se yumi glad blong harem tingting blong hem. I moa gud yumi mekem olsem i bitim we yumi sakemaot tingting blong hem wantaem nomo, from we yumi no bin tingbaot samting we hem i talem. (Ol Proveb 15:22) Fasin ya blong lesin long tingting blong narafala i givhan bigwan long olgeta we oli wok blong lukaot long narafala. Wan man we nem blong hem John, i wok longtaem olsem wan bos long wan kampani. Hem i talem se: “Mi mi luk se man we i lukaot gud long ol narafala we oli wok aninit long hem, hem i mekem ol man oli harem gud blong talemaot tingting blong olgeta.” Mo John i talem tu se: “I tru, yu mas mekem tingting blong yu i stap daon blong talem se wan wokman blong yu i save wan rod we i moa gud blong mekem wan wok i bitim yu. I no gat man we i save talem se ol tingting blong hem nomo oli gud, nating se hem i bos.”

Sipos yumi folem fasin blong Ebraham blong lesin long ol narafala taem oli talemaot tingting blong olgeta, mo yumi mekem ol smosmol wok blong givhan long olgeta, bambae yumi mekem Jehova i glad. Tru ya, “God i agensem olgeta we oli praod, be long olgeta we tingting blong olgeta i stap daon, hem i stap givhan long olgeta long gladhat blong hem.”—1 Pita 5:5.

[Futnot]