Abraim Laco Ma Obedo Lamar

Cwercwiny omiyo Abraim onongo pe romo diyo cwinye laco laco. Cara, lapal cwinye ma en maro adada oto woko. Tam obwoye woko i kare ma kitye ka yiko Cara. Cwercwiny omiyo Abraim okok ki pig wange. (Acakki 23:1, 2) Kokone-ni onongo pe kele lewic, ento onyuto kit acel maber ma Abraim onongo tye kwede​—mar.

MAR OBEDO GIN ANGO? Mar obedo moko wat macok ki ngat moni kun iwinyo ki i cwinyi. Ngat ma lamar nyuto i ticce kit ma ewinyo kwede pi jo ma emarogi, kadi bed man mitte ni myero en ojal jami mogo.

ABRAIM ONYUTO MAR NINING? Abraim onyuto ni emaro jo me ode. Labongo akalakala, Abraim onongo ticce pol adada. Kadi bed kumeno, en onongo paro pi jo me ode i yo ducu. Ki lok ada, Jehovah oneno ni Abraim macalo lawi ot, telo jo me ode i woro Jehovah. (Acakki 18:19) Pe meno keken, Jehovah bene oloko i kom mar ma Abraim tye kwede. I kare ma tye ka lok ki Abraim, En oloko i kom Icaka ni wodi ma “imaro-ni.”​—Acakki 22:2.

Waromo bene ngeyo mar ma Abraim onongo tye kwede i kare ma Cara, dakone ma en maro-ni oto. Kit ma waneno kwede i acakkine, Abraim okok ki pig wange. Kadi bed ni cwinye onongo tek, lworo pe ogenge kumo. Abraim onyuto tekcwiny kacel ki bedo laco kikome i yo me aura.

Abraim onyuto ni emaro Lubanga. En onyuto mar meno i kare me kwone ducu. Nining? Man poyo wiwa i kom gin ma kicoyo  1 Jon 5:3: “Maro Lubanga en aye gwoko cikke. Dok cikke pe nurowa.” Ma lubbe ki lok man, Abraim oweko lanen maber adada ka odok i lok me maro Lubanga.

Tyen mapol, ka Jehovah ociko Abraim ni otim gin moni, en onongo timo cutcut. (Acakki 12:4; 17:22, 23; 21:12-14; 22:1-3) Lubo cik meno onongo pe peko kono tek nyo yot; dok bene pire pe tek kono Abraim onongo ngeyo gin mumiyo Jehovah penye me lubone nyo pe. Bot Abraim, ngeyo jami magi onongo konye pe. En onongo tye atera ka ce Lubanga mito ni etim gin moni. Abraim oniang ni gin ducu ma Lubanga ociko onongo gimine kare me nyuto marre pi Jehovah.

PWONY ANGO MA WANONGO? Waromo lubo lanen pa Abraim-mi ka wanyuto mar bot jo mukene, tutwalle jo me odiwa. Omyero pe waye lyeto me kwo okwany cawa ma myero wami bot jo ma pigi tek botwa.

Omyero wati matek me dongo mar pi Jehovah i cwinywa. Mar ma kit meno twero gudo kwowa i yo me aura. Me laporre, mar meno twero weko watimo alokaloka i kit cwiny ma watye kwede, lokwa, ki dong kit ma wakwo kwede wek wayom cwiny Lubanga.​—1 Petero 1:14-16.

Wangeyo gire ni pol kare lubo cik pa Jehovah pe yot. Ento watwero bedo ki gen ni Ngat ma okonyo Abraim​—Ngat ma olwongo en ni “larema-ni]”​—bikonyowa bene. (Icaya 41:8, Baibol pa Katoli) Lokke ma en aye Baibul-li cuko cwinywa ni En ‘bimiyowa teko, dok bimiyo wacung matek liking.’ (1 Petero 5:10) Meno pud dong obedo cikke ma gudo cwinywa adada dok a ki bot ngat ma gene, Larem Abraim!

[Bok i pot karatac 10]

Koko Mono Lik ki Co?

Jo mapol gitwero gamone ni meno tye ada. Gitwero bedo ki ur ka guniang ni Abraim ma Baibul oloko i kome ni obedo laco ma cwinye tek dok lagen-ni bene okok ki pigi wange i kare me peko. Jo mukene ma gukok bene tye iye Yucepu, Daudi, lakwena Petero, luelda me kacokke me Epeco ki dong Yecu. (Acakki 50:1; 2 Camuel 18:33; Luka 22:61, 62; Jon 11:35; Tic pa Lukwena 20:36-38) Baibul pe pwonyo ni koko lik ki co.