Abraamu: Sran m’ɔ klo sran’n

Abraamu i yi Sara m’ɔ klo i kpa’n w’a saci. Abraamu siman wie se. Kɛ bé síe bian oke sɔ’n i yi’n, wafa nga ɔ nin i be trannin laa’n, ɔ kpɛnkpɛn i klun. I yi’n i wie’n m’ɔ wluwluli i wun’n ti’n, ɔ sunnin kpa. (Bo Bolɛ 23:1, 2) Sunlɛ m’ɔ sunnin’n kleman kɛ ɔ timan yasua sran. Naan i sɔ’n ti’n, ɔ fata kɛ ɲannzuɛn kun i. Sanngɛ ɔ yi i sran klolɛ dan’n, m’ɔ ti i nzuɛn ɲɛnmɛn kpa kun ekun’n i nglo.

?KƐ BE SE KƐ SRAN KUN KLO SRAN’N I BO’N YƐLE BENIN? Kɛ sran kun klo sran kun’n i awlɛn o sran sɔ’n i su tankaan. Yɛ like ng’ɔ ko yo naan w’a kle kɛ ɔ klo i’n, kannzɛ i yolɛ’n ti kekle sɛ’n, saan ɔ́ yó.

?WAFA SƐ YƐ ABRAAMU KLELI KƐ Ɔ KLO SRAN ƆN? Abraamu kleli kɛ ɔ klo i awlobofuɛ mun. Abraamu i su junman’n sɔnnin. Sanngɛ, i ɲin w’a kpaman i awlobofuɛ’m be su le. Wafa ng’ɔ ko yo naan be wun w’a yo be fɛ’n, naan kusu’n be nin Ɲanmiɛn be afiɛn w’a mantan kpa’n, ɔ nian nun yoli i kpa. I kpa’n, Ɲanmiɛn sulɛ nun’n, siɛ nga be dun be awlobofuɛ’m be ɲrun mmua’n, Zoova bɔbɔ si kɛ be nun kun yɛle Abraamu. (Bo Bolɛ 18:19) Asa kusu’n, Zoova kannin Abraamu i sran klolɛ’n i ndɛ. Yɛle kɛ, kɛ ɔ́ kán Izaaki i ndɛ klé Abraamu’n, i waan Izaaki ti Abraamu ‘i wa kunngba b’ɔ klo i kpa’n.’​—Bo Bolɛ 22:2.

Kɛ Abraamu i yi Sara wuli’n, wafa nga i wun fa yoli i’n maan e kwla wun i sran klolɛ’n ekun. Ɔ sunnin i yi’n. Kannzɛ ɔ ti yasua sran’n, i yi’n i sunlɛ’n w’a yomɛn i ɲannzuɛn. Abraamu kleli kɛ ɔ ti yasua sran naan i kunngba’n ti wɛtɛɛfuɛ.

 Abraamu kleli kɛ ɔ klo Ɲanmiɛn. I kaan nun lele m’ɔ́ fá wú’n, ninnge ng’ɔ yoli be’n be kwlaa kle sɔ. Sa nga ti yɛ e se sɔ’n yɛle kɛ Biblu’n kɛn i 1 Zan 5:3 nun kɛ: “Nyanmiɛn i klolɛ’n yɛlɛ kɛ e fɛ i ndɛ’n su.” I sɔ kusu yɛ Abraamu yoli ɔ. Ɔ maan Ɲanmiɛn i klofuɛ’m be nun dan kun yɛle Abraamu.

Kɛ Zoova se Abraamu kɛ ɔ yo like kun’n, ɔ ka lɛ yo. Ɔ yoli i sɔ kpɛ sunman. (Bo Bolɛ 12:4; 17:22, 23; 21:12-14; 22:1-3) Sɛ like nga i waan ɔ yo’n, i yolɛ’n ti kekle annzɛ ɔ ti pɔpɔ o, i lifuɛ’n timan Abraamu cinnjin. Asa kusu’n, ɔ seman kɛ san fii ɔ́ sí sa nga ti yɛ Zoova seli i kɛ ɔ yo like sɔ’n ka naan w’a yo. I liɛ ng’ɔ si i’n, yɛle i yolɛ. Kusu kɛ ɔ́ yó i sɔ’n, ɔ yo i aklunjuɛ su. I ɲrun’n, ɔ ti kɛ Zoova w’a mɛn i blɛ naan ɔ kle kɛ ɔ klo i sa.

?NGUE YƐ I KWLAA SƆ’N KLE E Ɔ? Kɛ Abraamu sa’n, maan e klo e wiengu’m be kpa. I li e awlobofuɛ mun yɛ ɔ fata kɛ e klo be kpa ɔ. Ɔ fataman kɛ e nian mɛn mɔ w’a kete yɛ’n ti naan e ɲin kpa e awlɛn su sran’m be su.

Ɔ ti cinnjin kpa ekun kɛ e mian e ɲin e klo Zoova kpa tra laa’n. Sɛ e klo i’n, i sɔ’n mán e wunmiɛn kpa. I wie yɛle kɛ, i sɔ’n yó maan é káci e aeliɛ’n nin e ijɔlɛ wafa’n naan Ɲanmiɛn i klun w’a jɔ e wun.​—1 Piɛr 1:14-16.

I yo, nán titi yɛ Zoova i mmla’m be su nantilɛ’n ti pɔpɔ ɔ. Sanngɛ e kwla lafi su kɛ Ɲanmiɛn m’ɔ ukali Abraamu’n, m’ɔ flɛli i ‘min janvuɛ’n,’ ɔ́ súan e bo wie. (Ezai 41:8) Biblu’n m’ɔ ti i nuan ndɛ’n seli kɛ: “Ɔ́ yó maan amún jrán kekle, ɔ́ wlá amun fanngan, ɔ maan amun wun su usu-man amun.” (1 Piɛr 5:10) Nanwlɛ, ndɛ sɔ mɔ Abraamu i janvuɛ kpa’n kannin’n, ɔ wla fanngan dan o!

[Kuku, bue 10]

?Yasua nin sunlɛ fataman?

Sran kpanngban bé tɛ́ su kɛ ɛɛn. Sanngɛ sɛ be ti i kɛ nán Abraamu kunngba yɛ Biblu’n waan ɔ sunnin ɲrɛnnɛn blɛ nun’n, naan yasua sran bɔbɔ kpa nga be ti seiinfuɛ’n be nun kpanngban be sunnin wie’n, ɔ́ bó be nuan. I Zozɛfu o, i Davidi o, i akoto Piɛli o, i Efɛzi lɔ asɔnun kpɛnngbɛn mun o, i Zezi bɔbɔ o, be kwlaa be sunnin. (Bo Bolɛ 50:1; 2 Samiɛl 19:1; Lik 22:61, 62; Zan 11:35; Sa Nga Be Yoli’n 20:36-38) Ndɛ’n ti weiin. Biblu’n seman kɛ yasua sunman.