Si Abraham—Tawong May Pagkamoot

Haros dai makaya ni Abraham an kamondoan nia. Nagadan an namomotan niang agom na si Sara. Mantang nagpapaaram, nagigirumdoman kan gurang nang lalaking ini an kadakol na maogmang pangyayari sa buhay ninda. Nagluluha sia mantang naggagrabe an kamondoan. (Genesis 23:1, 2) An mga luhang iyan dai nanggad dapat ikasupog, kundi pinapatunayan kaiyan an saro sa pinakamagagayon na karakteristiko ni Abraham—an pagkamoot.

ANO AN PAGKAMOOT? Iyan pakamate nin mainit asin personal na pagkagusto o hararom na pagpadangat. Ipinapaheling nin mamomoton na tawo paagi sa ginigibo nia kun ano an saiyang saboot dapit sa mga namomotan nia, dawa pa nangangaipo iyan nin personal na pagsasakripisyo.

PAANO SI ABRAHAM NAGPAHELING NIN PAGKAMOOT? Ipinaheling nia na namomotan nia an saiyang pamilya. Daing duda na sia sibot na tawo. Pero, dai nia noarin man pinabayaan an emosyonal o espirituwal na pangangaipo kan pamilya nia. Sa katunayan, aram mismo ni Jehova na, bilang payo nin pamilya, pinangenotan ni Abraham an pagsamba sa saiya. (Genesis 18:19) Saro pa, malinaw na sinambit ni Jehova an dapit sa pagkamoot ni Abraham. Sa pakikipag-olay ki Abraham, inapod Nia si Isaac bilang an aki na ‘namomotan mong’ marhay.—Genesis 22:2.

Orog pa niatong maririsa an pagkamoot ni Abraham sa nagin reaksion nia kan magadan an namomotan niang agom na si Sara. Tinangisan sia ni Abraham. Dawa ngani makosog an boot asin tunay na lalaki, dai sia natakot na ipaheling an grabeng kamondoan. Ikinapaheling nia an magayon na kombinasyon nin kosog nin boot asin kabootan.

 Ipinaheling nia na namomotan nia an saiyang Dios. Maheheling sa bilog niang pamumuhay an siring na pagkamoot. Taano man? Tibaad nagigirumdoman niato an sinasabi kan Biblia sa 1 Juan 5:3: “Ini iyo an pagkamoot nin Dios, na kita magotob kan saiyang magña togon.” Basado sa kahulogan na iyan, si Abraham pambihirang halimbawa nin pagkamoot sa Dios.

Sa kada pagtao ni Jehova nin pagboot, nagsunod tolos si Abraham. (Genesis 12:4; 17:22, 23; 21:12-14; 22:1-3) Bakong mahalaga sa saiya kun baga pasil o depisil sunodon an pagboot; ni mahalaga man kun taano ta ipinapagibo iyan ni Jehova. Para sa saiya, iyan bakong importante. Kun may ipinapagibo an Dios, andam siang gibohon iyan. Para ki Abraham, an kada pagboot oportunidad na ipaheling an pagkamoot ki Jehova.

ANO AN MGA LEKSION PARA SA SATO? Maaarog niato si Abraham paagi sa pagpaheling sa iba nin mainit na pagpadangat, lalo na sa mga kapamilya niato. Dai niato noarin man totogotan na maagaw kan mga kahaditan sa buhay an panahon na para sa mga namomotan niato.

Marahay man na pataluboon niato an odok sa pusong pagkamoot ki Jehova. An siring na pagkamoot puedeng magin mapuersang motibasyon sa buhay niato. Halimbawa, makakapahiro iyan sa sato na bagohon an satong pag-iisip, pagtaram, asin paggawe tanganing mapaogma an Dios.—1 Pedro 1:14-16.

Totoo, bako pirmeng pasil an pagsunod sa mga pagboot ni Jehova. Pero, makakasierto kita na an Saro na nagtabang ki Abraham—an Saro na inapod sia na “sakuyang katood”—yaon tanganing suportaran man kita. (Isaias 41:8) An Tataramon nia, an Biblia, nanunuga: ‘Sia maparigon asin mapakosog sa saimo.’ (1 Pedro 5:10) Nakakaogma nanggad na panuga hale sa mapagkakatiwalaan na Katood na iyan ni Abraham!

[Kahon sa pahina 11]

Kaluyahan daw Para sa Lalaki an Paghibi?

Dakol an masimbag nin iyo. Tibaad magngalas sinda kun maaraman ninda na si Abraham saro sana sa nagkapirang lalaki na makosog an boot asin maimbod na, oyon sa Biblia, naghibi sa panahon nin kapurisawan. Kaiba dian si Jose, David, apostol Pedro, an kamagurangan na lalaki sa kongregasyon sa Efeso, pati na si Jesus. (Genesis 50:1; 2 Samuel 18:33; Lucas 22:61, 62; Juan 11:35; Guibo 20:36-38) Malinaw nanggad na dai itinotokdo kan Biblia na kaluyahan para sa lalaki an paghibi.