Abrahamu Ali no Kutemwa

Abrahamu aali no bulanda icine cine. Umukashi wakwe Sara, uo atemenwe sana alifwile. Ilyo aleshiika umukashi wakwe, afwile aletontonkanya pa fintu ifingi sana ifyo baleipakisha nankwe ilyo ali umumi. Ilyo ubulanda bwacililemo, Abrahamu alililile. (Ukutendeka 23:1, 2) Abrahamu taumfwile insoni sha kulila. Filya alilile tacalolele mu kuti tali uwashipa, lelo calelanga imibele iisuma iyo akwete iya kutemwa.

BUSHE ISHIWI LYA KUTI UKUTEMWA LYALOLA MWI? Umuntu uwaba no kutemwa aliba ne citemwishi ku bantu banankwe. Ifyo umuntu uwaba no kutemwa acita e filanga ifyo omfwa pa bantu atemwa nangu ca kutila limo pa kuti acite fi alingile ukuipeelesha.

BUSHE ABRAHAMU ALANGILE SHANI UKUTI ALI NO KUTEMWA? Abrahamu alitemenwe ulupwa lwakwe. Ukwabula no kutwishika, Abrahamu alikwete imilimo iingi. Na lyo line, alesakamana ulupwa lwakwe mu fya kwa Lesa na mu fintu fimbi ifyo balekabila. Na kuba, Yehova alishibe ukuti Abrahamu, uwali umutwe wa lupwa, aletungulula ulupwa lwakwe mu fya mapepo. (Ukutendeka 18:19) Ne cacindama sana ca kutila, Yehova alilandile ukuti Abrahamu ali no kutemwa. Ilyo alelanda nankwe, alandile pali Isaki ukuti ‘umwana uo watemwisha.’—Ukutendeka 22:2.

Na kabili kuti twamona ifyo Abrahamu ali no kutemwa ku fyo acitile ilyo umukashi wakwe Sara, uo atemenwe, afwile. Abrahamu alilooseshe umukashi wakwe. Nangu ca kuti ali mwaume washipa kabili uwa bulamba, taumfwile insoni sha kulila. Abrahamu alilangile imibele yonse ibili, ukushipa no kunakilila.

 Abrahamu alitemenwe Lesa wakwe. Fyonse ifyo alecita fyalelanga ukuti alitemenwe Lesa. Mulandu nshi twalandila ifi? Nalimo kuti twaibukisha ifyo Baibolo yalanda pali 1 Yohane 5:3, apatila: “Uku e kutemwa Lesa, ukuti tulekonka amafunde yakwe; kabili amafunde yakwe taya-afya.” Ukulingana ne fi Baibolo yalondolola ukutemwa, kuti twatila Abrahamu alitemenwe sana Lesa pantu alekonka amafunde yakwe kabili tulingile ukumupashanya.

Lyonse fye Abrahamu alecita fyonse ifyo Yehova amweba ilyo line fye. (Ukutendeka 12:4; 17:22, 23; 21:12-14; 22:1-3) Kabili nampo nga ico bamweba ukucita nacikosa nelyo iyo, Abrahamu aleumfwila; kabili nampo nga naishiba icilengele Yehova ukumweba ukucita cimo nelyo iyo, Abrahamu lyonse fye alekonka ifyo bamweba. Icacindeme sana kuli ena kumfwila Lesa. Lesa wakwe nga amweba ukucita cimo, aleitemenwa ukumumfwila. Nga bamweba ukucita cimo, alemona ukuti lishuko lya kulanga ukuti alitemenwe Yehova.

FINSHI TWINGASAMBILILAKO? Kuti twapashanya Abrahamu nga tuletemwa abantu bambi, maka maka balupwa lwesu. Tatulingile ukuleka ifintu fimbi ukutusendela inshita ica kuti twalafilwa no kuba pamo na bantu twatemwa.

Na kabili, tulingile ukwesha na maka ukutemwa Yehova ukufuma pa nshi ya mutima wesu. Ukutemwa Yehova muli uyu musango kuti kwatwafwa nga nshi. Ku ca kumwenako, kuti kwalenga twaalula imibele yesu ne milandile pa kuti tulesekesha Lesa.—1 Petro 1:14-16.

Ukulanda fye icishinka, te lyonse canguka ukumfwila Yehova. Lelo kuti twacetekela ukuti Lesa uwa-afwile Abrahamu, uo aleita ukuti “cibusa wandi,” akatwafwa na ifwe bene. (Esaya 41:8) Icebo ca kwa Lesa, Baibolo, citulaya ukuti: “Akamwikasha, kabili akamukosha.” (1 Petro 5:10) Ala mwandini ubu bulayo Cibusa wa kwa Abrahamu atulaya bulatusansamusha nga nshi!

[Akabokoshi pe bula 11]

Bushe Umwaume Nga Alila Ninshi Tashipa?

Abengi kuti basumina ukuti ee ninshi tashipa. Nalimo kuti bapapa nga baishiba ukuti Baibolo yalilanda pa baume abengi aba maka kabili aba citetekelo abalilile ilyo ifintu fya-afishe. Pali aba paba na Abrahamu. Bambi abalilile ni Yosefe, Davidi, umutumwa Petro, abakalamba ba mu cilonganino ca ku Efese, e lyo na Yesu. (Ukutendeka 50:1; 2 Samwele 18:33; Luka 22:61, 62; Yohane 11:35; Imilimo 20:36-38) Kanshi twamona ukuti, Baibolo taisambilisha ukuti umwaume nga alila ninshi tashipa.