Si Abraham—Tawong Mahigugmaon

Halos dili maantos ni Abraham ang iyang kaguol. Ang iyang minahal nga asawa, si Sara, namatay. Daghan kaayo siyag mahandom bahin sa iyang asawa samtang iya kining gipahiluna sa lubnganan. Sa iyang pagbangotan, siya mihilak. (Genesis 23:1, 2) Wala niya kana ikaulaw. Hinunoa, gipakita niana ang usa sa maayong mga hiyas ni Abraham—ang iyang gugma.

UNSA ANG GUGMA? Ang gugma maoy mainitong pagbati o lalom nga pagmahal. Ipasundayag sa tawong mahigugmaon ang iyang pagbati ngadto sa iyang gimahal, bisan pag ang paghimo niana nagkinahanglag sakripisyo.

GIUNSA PAGPAKITA NI ABRAHAM ANG GUGMA? Gipakita ni Abraham nga iyang gihigugma ang iyang pamilya. Sa walay duhaduha, si Abraham puliki nga tawo. Apan, wala gayod niya pasagdi ang emosyonal o espirituwal nga panginahanglan sa iyang pamilya. Gani, nakita mismo ni Jehova nga si Abraham nanguna sa pagsimba ingong ulo sa pamilya. (Genesis 18:19) Dugang pa, gihisgotan ni Jehova sa dayag ang gugma ni Abraham. Sa pagpakigsulti kang Abraham, Iyang gitawag si Isaac ingong “anak nga imong gihigugma pag-ayo.”—Genesis 22:2.

Dugang pa natong makita ang gugma ni Abraham sa iyang reaksiyon sa kamatayon sa iyang minahal nga asawa, si Sara. Siya nagminatay alang kaniya. Bisag lig-on, wala siya magpanuko sa pagpakita sa iyang kaguol. Timbang kaayo ang pagpasundayag ni Abraham sa iyang kalig-on ug pagkamabination.

Gipakita ni Abraham nga iyang gihigugma ang Diyos. Gipasundayag niya ang maong  gugma sa tibuok niyang kinabuhi. Sa unsang paagi? Atong mahinumdoman ang giingon sa 1 Juan 5:3: “Kini ang kahulogan sa paghigugma sa Diyos, nga atong bantayan ang iyang mga sugo.” Pinasukad niana, si Abraham maoy talagsaong panig-ingnan sa paghigugma sa Diyos.

Sa matag higayon nga si Jehova magsugo kang Abraham, si Abraham motuman dayon. (Genesis 12:4; 17:22, 23; 21:12-14; 22:1-3) Wala niya igsapayan kon ang sugo sayon ba o lisod tumanon; o kon nahibalo siya o wala sa hinungdan nga gisugo kana ni Jehova. Para kang Abraham, dili na kana hinungdanon. Kon may isugo kaniya ang Diyos, andam siyang mosunod niana. Giisip niya ang matag sugo nga kahigayonan sa pagpasundayag sa iyang gugma kang Jehova.

UNSAY MGA LEKSIYON NIINI KANATO? Atong masundog si Abraham pinaagi sa pagpakitag gugma sa uban, ilabina sa membro sa atong pamilya. Dili gayod nato tugotan nga tungod sa kapit-os sa kinabuhi, mawad-an tag panahon sa atong mga minahal.

Hinungdanon usab nga atong ugmaron ang kinasingkasing nga gugma kang Jehova. Kana nga gugma makaimpluwensiya gayod sa atong kinabuhi. Pananglitan, kini makatukmod kanato nga magbag-o sa atong tinamdan, sinultihan, ug panggawi aron pahimut-an ang Diyos.—1 Pedro 1:14-16.

Tinuod, dili kanunayng sayon ang pagtuman sa mga sugo ni Jehova. Apan makaseguro kita nga ang Usa nga mitabang kang Abraham—ang Usa nga nagtawag kaniya nga “akong higala”—andam usab motabang kanato. (Isaias 41:8) Ang iyang Pulong, ang Bibliya, nagsaad: “Siya magpalig-on kaninyo, siya magpakusgan kaninyo.” (1 Pedro 5:10) Pagkamakapadasig kana nga saad gikan nianang kasaligang Higala ni Abraham!

[Kahon sa panid 11]

Huyang ba ang Lalaking Mohilak?

Daghan ang moingong oo. Tingali mahibulong sila sa pagkasayod nga si Abraham maoy usa sa daghang lig-on ug matinumanong mga lalaki nga gihisgotan sa Bibliya nga mihilak panahon sa kagul-anan. Ang uban mao si Jose, David, apostol Pedro, ang mga ansiyano sa kongregasyon sa Efeso, ug bisan si Jesus. (Genesis 50:1; 2 Samuel 18:33; Lucas 22:61, 62; Juan 11:35; Buhat 20:36-38) Tin-aw, ang Bibliya wala magtudlo nga huyang ang lalaking mohilak.