Eperiam, Emön Mwän mi Tong

A kon watte letipetaan Eperiam, pun pwülüwan we mi ächengicheng Sara a mälo. A wor chommong minen ächechchem mi mürinnö usun Sara lon ekiekin ei mwän mi chinnap Eperiam atun epwele peiaseni. Atun a lallapolo an riäfföü lon letipan, iwe, a kechiw. (Keneses 23:1, 2) Än Eperiam kechiw esap ina eü minen ässäw, nge chönün mesan a änneta eü me lein napanapen Eperiam kewe mi fokkun mürinnö, ina an tong.

MET WEWEEN TONG? Tong a wewe ngeni eü ririöch mi alollool are än emön fokkun efich are sani pwal emön. Emön aramas mi tong a pwäraalo meefian ngeni chokkewe a tonger ren an kewe föfför, inaamwo ika epwe pennükü pwisin mochenin.

IFA USUN EPERIAM A PWÄRAATÄ TONG? Eperiam a pwäri pwe a tongei chon an famili. Esor tipemwaramwar pwe a chommong wisen Eperiam. Nge, ese fokkun tunalo osupwangen an famili lon pekin memmeef me lükü. Ina minne, Jiowa a küna pwe Eperiam a föri pwüngün wisan möküren famili le emmweniir lon ar fel. (Keneses 18:19) Nge, Jiowa a pwal fos usun än Eperiam tong. Iei alon Jiowa ngeni Eperiam usun Aisek: “Noum we at . . . ewe ka fakkun tongei.”​—Keneses 22:2, Ewe Kapasen God.

Sia pwal tongeni meefi än Eperiam tong ren napanapan atun pwülüwan we mi ächengicheng Sara a mälo. Eperiam a ngüngüres ren an kechiw woon Sara. Inaamwo ika i emön mwän mi pöchökkül me tipepwora, nge ese pireir le pwäraalo an letipeta. Eperiam a pwäri mürinnöön iir me ruu ekkeei napanap, pöchökkül me letip pwetete.

 Eperiam a pwäri pwe a tongei an we Kot. Lon unusen manauan a pwäri ena esin sokkun tong. Ifa usun? Eli sia chechchemeni met Paipel a apasa lon 1 Jon 5:3: “Iei weween ewe tongen Kot, pwe sipwe alleasochisi an kewe alluk.” Me ren ena äwewe, Eperiam i ewe leenien äppirü mi sokkolo mürinnöön fän iten tong ngeni Kot.

Fansoun meinisin Jiowa a ngeni Eperiam eü allük, a mwittir le älleasochisi. (Keneses 12:4; 17:22, 23; 21:12-14; 22:1-3) Ika Jiowa a ereni an epwe föri och mettoch, ese lifilifil ika mi mecheres are weires are ese kon lien weweiti ewe popun, nge ika ina met Kot a mochen an epwe föri, a chök tipemecheres le föri. Eperiam a ekieki pwe eü me eü än Jiowa kewe allük ina eü alen an epwe pwäri an tong ngeni.

IKKEFA EKKEWE LESEN FÄN ITACH? Sia tongeni äppirü Eperiam ren ach eäni tong mi alollool ngeni ekkewe ekkoch, äkkäeüin ngeni chon ach famili. Sisap mut ngeni ekkewe mettoch mi aosukosuka manauach ar repwe atai ach fansoun ngeni chokkewe sia kon tonger.

Sipwe küna feiöch ika sia pwal ämääraatä ach tongei Jiowa seni letipach. Ena sokkun tong a fokkun tongeni siwili manauach. Äwewe chök, a tongeni amwökütükich le föri siwil lon ach ekiek, kapas, me föfförüch ren ach sipwe apwapwaai Kot.​—1 Piter 1:14-16.

Pwüngün, esap iteiten fansoun meinisin epwe mecheres ach sipwe älleasochisi än Jiowa kewe allük. Nge sia lükülük pwe Ewe a älisi Eperiam me Ewe a kör ngeni i “chiechiei” epwe pwal älisikich. (Aisea 41:8) Än Kot we Kapas, ewe Paipel a pwonei pwe Kot epwe ‘anükücharakich o apöchöküla letipach.’ (1 Piter 5:10) A ifa me mürinnöön ena pwon me ren Chiechien Eperiam we mi alükülük!