Abraham​—Enyene Ima

Abraham enen̄ede ofụhọ. Edima an̄wan esie akpa. Akanieren emi eti nte uwem ekenemde mmọ mbiba. Mfụhọ iyakke enye eme, ntre, enye atua eseme. (Genesis 23:1, 2) Eyet emi iwụtke ke Abraham edi mbe, edi akam owụt kiet ke otu nti edu esie—oro edi, ima.

NSO IDI IMA? Ima edi ata ediye edu emi adiande mme owo ọtọkiet. Owo emi enyenede ima esinanam owụt adan̄a nte imade owo idem ekpededi emi atak enye n̄kpọ.

DIDIE KE ABRAHAM OKOWỤT KE IMENYENE IMA? Abraham ama owụt ke imama ubon imọ. Nnyịn imọfiọk ke Abraham ama esinyene ediwak n̄kpọ ndinam, edi emi ikakpanke enye ndise mban̄a ubon esie ke kpukpru usụn̄. Ke nditịm ntịn̄, Jehovah ama okụt ke enye enen̄ede ada ubon esie usụn̄ ke n̄kpọ Abasi. (Genesis 18:19) Ke adianade do, Jehovah ama akam ọdọhọ ke Abraham enyene ima. Enye ọkọdọhọ Abraham ke ‘Isaac edi eyen emi enye enen̄erede ama.’—Genesis 22:2.

Nte Abraham akanamde n̄kpọ ke ini Sarah edima an̄wan esie akpade owụt n̄ko ke enye ama enyene ima. Abraham ama atua eseme. Kpa ye oro Abraham ekedide eren uko, bụt ikanamke enye nditua. Enye ama owụt ke erenowo ekeme nditua eyet.

Abraham ama owụt ke imama Abasi. Nte enye okodude uwem ama owụt ke enye ama Abasi. Ntak emi idọhọde ntre? Idịghe ọmọfiọk se Bible etịn̄de ke 1 John 5:3. Itien̄wed  oro ọdọhọ ke ‘ndima Abasi ọwọrọ ndinịm mme ewụhọ esie.’ Ndien Abraham ama anam emi ndiwụt ke imenen̄ede ima Abasi.

Abraham ama esisọsọp anam se ededi oro Jehovah ọdọhọde enye anam. (Genesis 12:4; 17:22, 23; 21:12-14; 22:1-3) Inamke n̄kpọ m̀mê se Jehovah ọdọhọde enye anam emem m̀mê imemke; edide enye ọfiọk ntak emi Jehovah ọdọhọde enye anam n̄kpọ m̀mê ifiọkke; kpukpru oro ikebeheke enye. Se ikakam ibehede enye ekedi ndinam se Jehovah ọdọhọde. Edieke edide Abasi esie akam ọdọhọ enye anam n̄kpọ, esịt ekesinenem enye ndinam. Abraham ekesida se ededi oro Abasi ọdọhọde enye anam nte ifet ndiwụt adan̄a nte imade Abasi.

NSO KE EMI EKPEP NNYỊN? Nnyịn imekeme ndikpebe Abraham ke ndima mme owo akpan akpan mbonubon nnyịn. Nnyịn ikpedehedei iyak nsịn̄ede uwem emi anam ifre enyịn iban̄a mbonima nnyịn.

Nnyịn n̄ko ikpenyene ndika iso n̄kpep ndima Jehovah ke ofụri esịt. Utọ ima emi eyenen̄ede otụk se ededi oro inamde. Ke uwụtn̄kpọ, edieke inen̄erede ima Abasi, nnyịn iyọdiọn̄ọ nte idude uwem, nte itịn̄de ikọ man inam esịt esie enem.—1 Peter 1:14-16.

Imọfiọk ke isimemke utom kpukpru ini ndinam se Abasi ọdọhọde. Edi imenen̄ede inịm ke Enye emi akan̄wamde Abraham, onyụn̄ okotde enye “ufan mi,” ayan̄wam nnyịn n̄ko. (Isaiah 41:8) Ikọ esie, kpa Bible, ọn̄wọn̄ọ ke enye ‘ayanam nnyịn isọn̄ọ ida, onyụn̄ anam ikop idem.’ (1 Peter 5:10) Ndi ikọ ata edima Ufan Abraham emi idọn̄ke fi esịt?

[Ekebe ke page 11]

Ndi Erenowo Ekeme Nditua Eyet?

Ediwak owo edibọrọ baba. Edi idem ekeme ndikpa mmọ ndifiọk ke owo nte Abraham emi ekedide eren uko ama atua eyet ke ini n̄wan esie akakpade. N̄ko, ke Bible asiak iren uko en̄wen emi ẹketuade eyet. Mmọ ẹsịne Joseph, David, apostle Peter, mbiowo Esop Ephesus, ye Jesus emi akakam edide Eyen Abasi. (Genesis 50:1; 2 Samuel 18:33; Luke 22:61, 62; John 11:35; Utom 20:36-38) Omokụt do ke Bible idọhọke ke erenowo ikemeke nditua eyet.