Eparama​—Na Turaga Dauloloma

E sega ni kinoca rawa o Eparama na levu ni nona rarawa ni sa mai takali na watina lomani o Sera. Ni buluti Sera tiko, e nanuma lesu na veika totoka erau marautaka ena veigauna sa oti. E tuturu sara ga na wainimatana ena levu ni vusolo ni lomana. (Vakatekivu 23:1, 2) Qori e sega ni ivakaraitaki ni malumalumu se madua, e ivakaraitaki ga ni dua na itovo talei i Eparama​—na loloma.

NA CAVA NA LOLOMA? Na loloma e vakavotui kina na titobu ni nodrau veitaleitaki e rua se na nodrau veidredreti, erau veivolekati tale ga. Ena laurai na nona loloma e dua ena ka e cakava me baleti ira e lomana, se mani vakacava na levu ni ka ena vakayalia kina.

A VAKARAITAKA VAKACAVA O EPARAMA NA NONA LOLOMA? A vakaraitaka ena ka e cakava ni lomana na nona vuvale. E macala ga ni turaga osooso o Eparama. Ia a sega ni vakawalena na veika eratou vinakata na nona vuvale vaka kina na nodratou bula vakayalo. A raica sara ga o Jiova ni cakava o Eparama nona itavi vakaulunivale me liutaka na nodratou sokalou vakavuvale. (Vakatekivu 18:19) E bibi sara ni tukuna o Jiova ni dauloloma o Eparama. Ni vosa vei Eparama, a tukuna ni o Aisake e ‘luvena lomani.’​—Vakatekivu 22:2.

E laurai tale ga na nona loloma o Eparama ena sala e rarawataka kina na takali i Sera na watina lomani. A yasovaki koya. E turaga kaukaua o Eparama, ia e sega ni madua ni vakaraitaka nona lolosi. E totoka dina ni laurai ruarua vua na kaukaua kei na yalomalua.

A vakaraitaka o Eparama ena ka e cakava ni lomana na Kalou. A laurai qori ena nona bula taucoko. E dina vakacava qori? Eda na rairai nanuma lesu na ka e tukuni ena 1 Joni 5:3: “Qo na ibalebale ni noda lomana na Kalou, meda muria na nona ivunau, ia e sega ni icolacola bibi na nona ivunau.” Ni vakasamataki na ka e tukuni qori, e vakasakiti kina na nona lomani Jiova o Eparama.

A dau talairawarawa o Eparama vei Jiova ena gauna kece e vakaroti koya kina ena ka me cakava. (Vakatekivu 12:4; 17:22, 23; 21:12-14; 22:1-3) E sega ni kauaitaka se mani rawarawa se dredre na ivakaro; a sega tale ga ni kauaitaka vakalevu me kila na vuna a kerea kina o Jiova me cakava e dua na ka. A sega ni bibi sara vei Eparama me kila na ka va qori. Ke vinakata na Kalou me cakava e dua na ka, a yalorawarawa o Eparama me cakava. A raica o Eparama me ivakaraitaki ni nona lomani Jiova na nona muria na ivakaro kece.

NA CAVA EDA VULICA KINA? Eda rawa ni vakatotomuria na nona dauloloma o Eparama, vakabibi vei ira na noda lewenivuvale. Meda kua ni vakalaiva na lomaocaoca ni bula qo me vakalatilati ena gauna eda vakayagataka vei ira eda lomana.

E bibi me vu tale ga mai lomada na noda lomani Jiova. Na loloma va qori ena yaga sara ena noda bula. Kena ivakaraitaki, e rawa ni uqeti keda meda veisautaka na noda rai, ivosavosa kei na noda itovo meda vakamarautaka kina na Kalou.​—1 Pita 1:14-16.

E macala ga ni na sega ni rawarawa noda muria na ivakaro i Jiova. Ia meda nuidei ni na tokoni keda tale ga o koya a vukei Eparama—⁠a vakatokai koya me ‘wekana’ se nona itokani. (Aisea 41:8) E yalataka o Jiova ena nona Vosa ni na ‘vakataudeitaki keda, ena vakaukauataki keda’ tale ga. (1 Pita 5:10) E veivakacegui dina na ka e yalataka na itokani nuitaki qori i Eparama!

 [Kato ena tabana e 11]

Era Dau Tagi ga na Yalewa

E levu era nanuma ni dina qori. Ia era na rairai kurabui nira kila ni o Eparama e dua ga vei ira na turaga yalodina qai yaloqaqa e tukuna na iVolatabu nira tagi ena gauna era rarawa kina. Qori e wili kina o Josefa, Tevita, na yapositolo o Pita, o ira na qase ni ivavakoso mai Efeso vaka kina o Jisu. (Vakatekivu 50:1; 2 Samuela 18:33; Luke 22:61, 62; Joni 11:35; Cakacaka 20:36-38) E sega ni kaya na iVolatabu ni nodra ivakarau ga na yalewa mera tagi.