Iburahimu Mũthuri Warĩ na Wendo

Iburahimu e na ihooru inene mũno. Sara, mũtumia wake endete mũno nĩ akuĩte. Mũthuri ũcio mũkũrũ aiyũrĩtwo nĩ meciria maingĩ ma maũndũ mega megiĩ mũtumia wake. Nĩ ũndũ wa kũingĩhĩrũo nĩ ihooru, nĩ araita maithori. (Kĩambĩrĩria 23:1, 2) Maithori ma Iburahimu mationanirie atĩ ndaarĩ na hinya ũndũ angĩaconokire, ithenya rĩa ũguo moonanirie ĩmwe ya ngumo iria njega biũ aarĩ na cio—wendo wake.

WENDO NĨ KĨĨ? Wendo nĩ kũigua ũrĩ na ũkuruhanu wa hakuhĩ mũno na mũndũ. Mũndũ ũrĩ na wendo onanagia na ciĩko ũrĩa aiguaga kwerekera arĩa endete, o na angĩkorũo gwĩka ũguo nĩ gũkũbatarania eime.

IBURAHIMU ONANIRIE WENDO NA NJĨRA IRĨKŨ? Iburahimu nĩ onanirie atĩ nĩ eendete famĩlĩ yake. Hatarĩ nganja, Iburahimu nĩ aakoragwo na mĩhang’o mĩingĩ. O na kũrĩ ũguo, gũtirĩ hingo aagaga kũhingia mabataro ma famĩlĩ yake ma ngoro-inĩ kana ma kĩĩroho. Ma nĩ atĩ, nginya Jehova we mwene nĩ onaga atĩ Iburahimu arĩ mũtwe wa famĩlĩ nĩ aamĩtongoragia maũndũ-inĩ ma kĩĩroho. (Kĩambĩrĩria 18:19) Makĩria ma ũguo, Jehova oigire ĩmwe kwa ĩmwe atĩ Iburahimu aarĩ na wendo. Aahũthĩrire ciugo, “mũrũguo . . . ũcio wendete mũno,” akĩaria na Iburahimu ũhoro wĩgiĩ Isaaka.—Kĩambĩrĩria 22:2.

Makĩria ma ũguo, no tuone wendo wa Iburahimu kũringana na ũrĩa aaiyũkirie gĩkuũ gĩa Sara, mũtumia wake ũrĩa eendete mũno. Iburahimu nĩ aarĩrire nĩ ũndũ wake. O na gũtuĩka aarĩ mũthuri warĩ na hinya na ũcamba, ndeetigĩrire kuonania ihooru. Iburahimu nĩ onanirie ngumo njega ya ũũmĩrĩru na ũhooreri.

 Iburahimu nĩ onanirie atĩ nĩ eendete Ngai wake. Mũtũũrĩre wake wothe woonanagia atĩ nĩ eendete Ngai. Na njĩra irĩkũ? No tũririkane ũrĩa Bibilia yugaga thĩinĩ wa 1 Johana 5:3: “Amu kwenda Ngai nĩ atĩrĩ, nĩ tũmenyagĩrĩre maathani make.” Kũringana na ũtaarĩria ũcio, Iburahimu aarĩ kĩonereria kĩega harĩ kwenda Ngai.

Hĩndĩ ciothe Jehova ahe Iburahimu watho mũna, Iburahimu aawathĩkagĩra atekũrĩa marĩgu. (Kĩambĩrĩria 12:4; 17:22, 23; 21:12-14; 22:1-3) Iburahimu ndaamakaga kana watho nĩ mũhũthũ kana nĩ mũritũ kũũrũmĩrĩra; o na ndaatindaga akĩenda kũmenya gĩtũmi kĩa Jehova kũmũũria arũmĩrĩre watho mũna. Harĩ Iburahimu itũmi ta icio itiarĩ cia bata mũno. Aakoragwo eharĩirie gwĩka ũrĩa Ngai wake eendaga eke. Iburahimu onaga watho o wothe ũrĩ mweke wa kuonania wendo wake harĩ Jehova.

TŨRERUTA ATĨA? No twĩgerekanie na Iburahimu na njĩra ya kwenda andũ arĩa angĩ, na makĩria andũ a famĩlĩ citũ. Tũtingĩenda o na hanini kũreka mĩhang’o ya mũtũũrĩre ĩhũthĩre mahinda maitũ mothe marĩa tũngĩkorũo hamwe na arĩa twendete.

Ningĩ nĩ wega twĩrutanĩrie kwenda Jehova kuuma ngoro-inĩ citũ. Wendo ta ũcio no ũtũteithie mũno mĩtũũrĩre-inĩ itũ. Kwa ngerekano, no ũtũteithie gwĩka ũgarũrũku mĩerekera-inĩ itũ, mĩario-inĩ itũ, na mĩthiĩre-inĩ itũ nĩguo tũkenagie Ngai.—1 Petero 1:14-16.

Ma nĩ atĩ ti hingo ciothe gwathĩkĩra watho wa Ngai ũkoragwo ũrĩ ũndũ mũhũthũ. Ĩndĩ tũrĩ na ma atĩ Ũrĩa waateithirie Iburahimu—Ũrĩa wetire Iburahimu “mũrata wakwa”—o na ithuĩ nĩ arĩtũteithagia. (Isaia 41:8) Kiugo gĩake, Bibilia, kĩĩranagĩra ũũ: ‘Ngai arĩmũikaragia mũrũmĩte wega, ma amwĩkagĩre hinya.’ (1 Petero 5:10) Na githĩ kĩu ti kĩĩranĩro gĩa gũcanjamũra ngoro kuuma kũrĩ Mũrata ũcio mwĩhokeku wa Iburahimu!

[Mbica karatathi ka 10]

Hihi nĩ Ũũru Mũndũrũme Kũrĩra?

Aingĩ no macokie ĩĩ. No magege kũmenya atĩ Iburahimu aarĩ ũmwe wa arũme maarĩ na hinya na ehokeku arĩa Bibilia ĩgwetete atĩ nĩ maarĩrire hĩndĩ ĩrĩa maarĩ hatĩka-inĩ. Angĩ nĩ hamwe na Jusufu, Daudi, mũtũmwo Petero, athuri a kĩũngano kĩa Efeso, na nginya Jesu we mwene. (Kĩambĩrĩria 50:1; 2 Samueli 18:33; Luka 22:61, 62; Johana 11:35; Atũmwo 20:36-38) Hatarĩ nganja, Bibilia ndĩrutanaga atĩ nĩ ũũru mũndũrũme kũrĩra.