Abrahama Hmangaihna Nei Tak Chu

Abrahama chuan a nupui duh tak Sari a sûn a, tawrh thiam har a ti ngei mai. A nupui a vuiliam lai chuan a dam laia an awmdun lai leh hun hlimawm an hman laite chu a hre chhuak uar uar a. Lungngai êm êm insûm zo lovin a ṭap ta a ni. (Genesis 23:1, 2) Abrahama mittui chu zahna thlentu ni lovin, a mize ṭha takte zînga pakhat—a hmangaihna—târ langtu a ni zâwk a ni.

HMANGAIHNA CHU ENG NGE NI? Hmangaihna chu mi dang nêna mi mal inzawmna ṭha tak neih emaw, mi lainatna thûk tak neih emaw a ni a. Hmangaihna nei mi chuan a hmangaihte chunga a rilru put hmang chu thiltih hmangin a târ lang a, chu chu mahni ṭhatna tûr thil chân huam pawhin a ti hial ṭhîn a ni.

ENGTIN NGE ABRAHAMA’N HMANGAIHNA A TAR LAN? Abrahama chuan a chhûngte a hmangaihna a târ lang. Abrahama chu a buai ṭhîn hle ang tih rinhlelh rual a ni lo. Mahse, a chhûngkuate rilru lam leh thlarau lam mamawh chu a ngaihthah ngai lo. Dik takin, Abrahama’n chhûngkaw lû a nih anga Pathian biakna chungchângah hma a hruai tih Jehova ngei chuan a hria a ni. (Genesis 18:19) Chu chang a ni lo, Jehova chuan Abrahama hmangaihna chu chiang takin a sawi lang bawk. Abrahama a biakin, Isaaka chungchângah “i fapa, . . . i hmangaih tak” tiin a sawi a ni.—Genesis 22:2.

Abrahama hmangaihna chu a nupui duh tak, Sari thih chungchângah kan hmuh belh thei a. Abrahama chuan a nupui thi chu a ṭah a ni. Chak tak leh pachang tak ni mah se, a lungngaihna târ lan chu a hreh lo. Abrahama chuan chakna leh nunnêmna mize mawi tak chu a lantîr ve ve a ni.

 Abrahama chuan a Pathian a hmangaihzia a târ lang. A nun pum puiah chu hmangaihna chu a lantîr a. Engtin nge a lantîr? Bible-in 1 Johana 5:3-ah: “Pathian kan hmangaihna chu hei hi a ni, a thupêkte kan zâwm hi,” tih a sawi chu kan hre chhuak mai thei a. Chu hrilhfiahna aṭang chuan Abrahama chu Pathian a hmangaihna kawnga entawn tûr langsâr tak a ni.

Jehova’n thu a pêk apiangin, Abrahama chuan a zâwm nghâl vat zêl a. (Genesis 12:4; 17:22, 23; 21:12-14; 22:1-3) Thupêk zawm a awl leh awl loh chuan kawngro a su lo va, Jehova’n ti tûra a tirh chhan a hriat leh hriat loh lahin kawngro a su hek lo. Abrahama tân chuan chûng chu thil pawimawh a ni lo. Pathianin thil ti tûra a tirh chuan, tih a inhuam a. Abrahama chuan thupêk tin mai chu Jehova a hmangaihna târ lan theihna hun remchâng angin a thlîr a ni.

ENG NGE KAN ZIR TUR CHU? Mi dangte, a bîk takin kan chhûngte chunga lainatna thûk tak târ lanna hmangin Abrahama kan entawn thei a. Nuna nêksâwrnate chuan kan hmangaih takte tâna kan hun an lâk bo chu phal ngai lovin kan entawn thei bawk.

Tih tak zeta Jehova hmangaihna chu kan nei chho tûr a ni a. Chutiang hmangaihna chu kan nunah chakna thiltithei tak a ni thei a ni. Entîr nân, chu hmangaihna chuan Pathian kan tih lâwm theih nâna kan rilru put hmang te, ṭawngkam te, leh nungchangte thlâkthleng tûrin min chêttîr thei a ni.—1 Petera 1:14-16.

Jehova thupêk zawm chu a awlsam reng lo ngei mai. Mahse, Abrahama Ṭanpuitu—“ka ṭhian” tia amah Kotu—chuan min ṭanpui ve ang tih kan chiang thei a ni. (Isaia 41:8) A Thu, Bible chuan: “A tinghetin, a tichak ang che,” tih min tiam si a. (1 Petera 5:10) Abrahama Ṭhian rin tlâk tak hnên aṭanga thutiam phûrawm tak a va ni êm! (w12-E 01/01)

[Phêk 10-naa bâwm]

Ṭah Hi A Pachan Loh Thlâk Em?

Mi tam tak chuan ṭah hi pachan lohna niin an hre ngei ang. Anni chuan Abrahama chu Bible-in lungngaih avânga ṭap anga a sawi lan mi rinawm chak takte zînga pakhat mai a ni tih hriat chu mak an ti hle mai thei. Chûng zîngah chuan Josefa te, Davida te, tirhkoh Petera te, Ephesi khuaa kohhran upate, leh Isua ngei pawh a tel a ni. (Genesis 50:1; 2 Samuela 18:33; Luka 22:61, 62; Johana 11:35; Tirhkohte 20:36-38) Bible chuan ṭah hi a pachan loh thlâk angin a zirtîr lo tih a chiang hle.