Abrahán kyaj tnekyjawë pën japë jyot jyäˈäwën. Pes ja nyëdoˈoxy Sara, diˈib mëk tsyejpy, të yˈooky. ¡Ets mä jam tˈijxtëgoyanë, ta tjamyajtstäˈäy wiˈix oy të jyukyˈattë! Mëk ja jäj jëmuˈumën diˈib jyäˈäwëp, pääty jyantsy tyëjkë jëëy yaxpë (Génesis 23:1, 2). Kyaj ttsoytyuˈunjäˈäwë ko jyëëy yaxy, yëˈë yajnigëxëˈk ja tsojkën diˈib myëdäjt.

¿TI YˈANDIJPY TSOJKËN? Yëˈë ko jantsy oy nayjäˈäwëm mët tuˈugë jäˈäy o ko nmëyujëm. Tuˈugë jäˈäy diˈib tsojkp, ja dyajnigëxeˈeky mä tijaty tyuumpy oy näˈäty tsyiptakxëty.

¿WIˈIXË ABRAHÁN DYAˈIJXË TSOJKËN? Ko dyajnigëxeˈky ko tsyejpyë fyamilyë. Oy kajaa tuunk tnikëjxmˈäjty, xëmë tkuentˈäjtyë fyamilyë parë jotkujk nyayjawëdët ets parë oy yˈitët mëdë Dios. Jyobaa pyëjkë kuentë ko Abrahán oy tnigëbäjkˈatyë fyamilyë ets ko pyudëjkëp parë myëdunëdët (Génesis 18:19). Ets nan ojts tˈanëëmë ko mëk ja yˈuˈunk ttseky. Pes tëgok, ko Jyobaa tmaytyakyë Isaac, ta tˈanmääy: “Yëˈë Isaac, mëdiˈibë oy xytsyokyën” (Génesis 22:2, Mʉgoxpʉ ja̱ noky mʉdiˈibʉ jyaayʉn Moisés).

Jatëgok mä Abrahán dyaˈijxë ko tsyejpyë fyamilyë, ja ko Sara yˈoˈky ets tnijëëy tniyaxy. Kyaj wyinmääy ko tsoytyuˈun ko tuˈugë yetyëjk tyëkët jëëy yaxpë. Yëˈë yajnigëxëˈk ja tsojkën, per nanduˈun ja jotmëkˈäjtën.

 Ojts dyaˈixyëty ko tsyojkë Dios. Nuˈun ja xyëë jyukyˈäjtën, yajnigëxëˈkë tyäˈädë tsojkën. ¿Wiˈix? 1 Fwank 5:3 jyënaˈany: “Ko ntsojkëm ja Dios, nguytyuˈunëmë naty yëˈë yˈanaˈamën”. Extëm yajnimaytyaˈagyë tsojkën, Abrahán yäjk tuˈugë oybyë ijxpajtën mä wiˈix mbäät ntsojkëmë Dios.

Abrahán pojënë ttuuny ko Jyobaa ti tyukˈanaˈamë (Génesis 12:4; 17:22, 23; 21:12-14; 22:1-3). Kyaj dyajtëëy tiko tyukˈaneˈemyëty o ko tsip duˈun ttunët, kyaj yëˈë ojts tmëmay tmëdäjy. Tyunandääy tijatyë Dios tim tukˈanaˈamë parë ttukˈijxy ko tsyejpy.

¿TI XYTYUKNIˈˈIJXËM? Ko tsojkëp nyaˈijxëmë tsojkënë mëdë nmëguˈukˈäjtëm, ets mas pën yëˈë nfamilyëˈäjtëm. Kyaj naˈijxëm etsë tyäˈädë jukyˈäjtën xypyëjkëm kajaa tiempë ets waanë jeˈeyë nˈakˈyajwëˈëmëm parë jiiky mëguˈuk.

Diˈib ja tuk peky xytyukniˈˈijxëm, yëˈë ko jëjpˈam ets nyajkajaajëmë tsojkënë mä Jyobaa. Pesë tyäˈädë tsojkënë myëdäjtypyë mëkˈäjtën, mbäät xypyudëjkëm parë nyajtëgäjtsëmë jukyˈäjtën, jot winmäˈäny etsë käjpx maytyakën extëm mbäät xykyupëjkëmë Dios (1 Peedrʉ 1:14-16).

Tsiptakp parë nmëmëdoˈojëm tijatyë Dios xytyukˈanaˈamëm. Per mbäät nˈijtëm seguurë ko Jyobaa xypyudëkëyäˈänëm extëm tpudëjkë Abrahán, diˈib tyij “nmëtnaymyaayëbëts” (Isaías 41:8). Biiblyë twandaˈaky: “Yëˈë myaˈitëdëp täˈtspeky, yëˈë myaˈitëdëp mëk” (1 Pedro 5:10, Traducción del Nuevo Mundo). Pääty, nˈokmëbëjkëm extëmë Jyobaa xytyukwandakëm, diˈib mëdë Abrahán nyaymyaayë.

[Rekuäädrë mëdë dibujë diˈib miimp mä pajina 10]

¿Axëëk ko yetyëjk jyëˈëy yäˈäxtë?

Mayë jäˈäy mbäät wyinmaytyë ko axëëk. Per waˈan mëjˈixy mëjmëdoy tjawët ko Biiblyë myaytyakypyë yetyëjk diˈib jotmëk ijttë ets jëëy yaxtë ko tpattë amay jotmay, extëmë Abrahán. Nan yajmaytyakpë José, David, apostëlë Pedro, mëjjäˈäytyëjk diˈib mä ja naymyujkën diˈib Éfeso ets axtë Jesus (Génesis 50:1; 2 Samuel 18:33; Lukʉs 22:61, 62; Fwank 11:35; Apostʉlʉty 20:36-38). Extëm yä nˈijxëm, Biiblyë kyaj jyënaˈany ko kyaj mbäädë yetyëjk jyëˈëy yäˈäxtë.