A Abrahaam ra nonga neba
A Abrahaam ra nonga neba
A Abrahaam pag a Saara a sẽn da nong wʋsgã wa n maana kaalem, hal t’a sũ-sãangã pa tõe n bilg ye. B sẽn wa n mumd kũumã, a Abrahaam lebg n tẽega bũmb ka tɛk b sẽn da maan b sẽn zĩnd ne taabã. Sũ-sãangã sãag-a lame t’a nintãmã tar kiigr bala. (Sɩngre 23:1, 2) Nintãmã pa wilgd t’a raoodã pa waoog ye. Wilgdame t’a nonga a pagã wʋsgo.
WÃN-TO LA NED WILGD T’A NONGA A TAABÃ? Ned sã n nong a to, a wilgda rẽ ne a yel-manesmã la ne a tʋʋm-tʋmdɩ wã. A sakd n tʋma a soab neer yĩnga, baa sã n pa nana.
WÃN-TO LA A ABRAHAAM WILG T’A NONGA A TAABÃ? A wilgame t’a nonga a zakã rãmba. Sãmbg kae t’a Abrahaam da tara tʋʋm wʋsg ye. La baa ne rẽ, a ra yãta sẽk n get b yelle, tɩ b sũur yaa noogo, la a sõngd-b tɩ b tũud Wẽnnaam sõma. Sɩd me, a Zeova meng ra kɩsa sɩd t’a Abrahaam na n lʋɩɩ taoor n zãms a zakã rãmb yẽ noyã. (Sɩngre 18:19) A Zeova pʋd n yeela bũmb sẽn wilgd t’a Abrahaam da nonga neba. A yeelame t’a Izaak yaa a Abrahaam biig ‘a sẽn nonge.’—Sɩngre 22:2.
A Abrahaam sẽn maan to-to a pag a Saara kaalmẽ wã wilgdame me t’a nonga neba. A yãba wʋsgo. A pa tags t’a sẽn yaa raoã, a pa segd n yãb ye. A sẽn maan woto wã wilgdame t’a raoodã ne a nimbãan-zoeerã ra zema taaba.
A Abrahaam wilgame t’a nonga Wẽnnaam. Bũmb nins fãa a sẽn maan a vɩɩmã pʋgẽ wã wilgda rẽ. Bõe yĩng tɩ d yet woto? Tẽeg-y bũmb ning Biiblã sẽn yet 1 Zã 5:3 pʋgẽ wã. B yetame tɩ “Wẽnnaam nonglem yaa tɩ tõnd sak bãmb tõogo.” A Abrahaam sẽn sak Wẽnnaamã wilgdame t’a ra nong-a-la ne a sũur fãa.
Wakat fãa, a Zeova sã n da yeel a Abrahaam t’a maan bũmbu, a sakda tao-tao. (Sɩngre 12:4; 17:22, 23; 21:12-14; 22:1-3) A Zeova sẽn yeel-a t’a maan bũmb ningã yaa toog tɩ pa toogo, a wʋmda a võor t’a pa wʋmd me, pa rẽ n pak-a ye. A sakdame bala. A Abrahaam da miime tɩ wakat fãa a sẽn sak a Zeova noore, wilgdame t’a nong-a lame.
A ABRAHAAM KIBARÃ WILGDA TÕND BÕE? Tõnd me sã n nong neb a taabã, sẽn yɩɩd fãa d zakã rãmba, d rɩkda a Abrahaam togs-n-taare. D pa na n bas tɩ vɩɩmã sẽn lebg toogã kɩt tɩ d pa yãt sẽk n maand bũmb nins d sẽn tog n maan ne d zakã rãmb la d zo-rãmbã ye.
D modg me n nong a Zeova ne d sũur fãa. Rẽ na n sõnga tõnd wʋsgo. Wala makre, rẽ tõe n kɩtame tɩ d toeem d manesmã, la d gũusd ne d goamã sẽn na yɩl n ta Wẽnnaam yam.—1 Pɩɛɛr 1:14-16.
Yaa sɩd tɩ yɩl n sakd a Zeova noyã pa nana wakat fãa ye. La d tõe n kɩsa sɩd t’a Zeova sẽn sõng a Abrahaam la a bool-a t’a zoa wã, a na n sõnga tõnd me. (Ezai 41:8) Biiblã sẽn yaa Wẽnnaam Gomdã pʋgẽ, Wẽnnaam yetame t’a ‘na n paasa tõnd pãng la a kõ tõnd sũ-keelem.’ (1 Pɩɛɛr 5:10) Wẽnnaam sẽn yɩ a Abrahaam zoa hakɩkã sẽn yeel woto wã sɩd kengda pɛlga.
[Zĩ-gũbri, seb-neng 10]
Rao tog n yãbame bɩ?
Wʋsg na n yeelame tɩ rao pa yãbd ye. Tõe tɩ y sã n bãng tɩ Biiblã yetame t’a Abrahaam la wẽn-sakdb a taab yãbame, na n ling-y lame. A Zozɛfe, a Davɩɩde, tʋm-tʋmd a Pɩɛɛre, Efɛɛz tigingã kãsem-dãmbã la a Zezi meng yãbame. (Sɩngre 50:1; 2 Sãmwɛll 18:33; Luk 22:61, 62; Zã 11:35; Tʋʋma 20:36-38) Dẽnd yaa vẽeneg tɩ Biiblã pa wilgd tɩ rao pa tog n yãb ye.
