Aborahama—Monna yo a Nago le Lerato

Aborahama o palelwa ke go kgotlelela manyami a gagwe. Mosadi wa gagwe yo a rategago, Sara, o hwile. Aborahama yo a tšofetšego o tlelwa ke dikgopolo tše dintši tše rategago ge a dutše a mmoloka. Ge a dutše a mo hlokofalela, o ntšha megokgo. (Genesi 23:1, 2) Go e na le go lebelela megokgo e le e mmakelago dihlong, megokgo yeo e nea bohlatse bjo bo bonagalago bja se sengwe sa dika tše botse tšeo Aborahama a bego a ena le tšona—lerato la gagwe.

LERATO KE ENG? Lerato ke maikwelo a borutho goba a tseneletšego a bontšhwago motho yo mongwe. Motho yo a nago le lerato o bontšha ka ditiro gore o ikwa bjang ka bao a ba ratago, gaešita le ge se se ka nyaka gore motho a ikgafe.

ABORAHAMA O ILE A BONTŠHA LERATO BJANG? Aborahama o ile a bontšha gore o rata lapa la gagwe. Ga go pelaelo gore Aborahama e be e le monna yo a swaregilego. Lega go le bjalo, le ka mohla ga se a ka a hlokomologa dinyakwa tša maikwelo le tša moya tša lapa la gagwe. Ge e le gabotse, Jehofa ka boyena o ile a lemoga gore Aborahama o be a etelela lapa la gagwe pele borapeding bjalo ka hlogo ya lapa. (Genesi 18:19) Go oketša moo, Jehofa o ile a bolela ka go lebanya ka lerato la Aborahama. Ge a be a bolela le Aborahama, Jehofa o boletše ka Isaka e le “morwa . . . yo o mo ratago.”—Genesi 22:2.

Re ka kgona go bona lerato la Aborahama tseleng yeo a ilego a arabela ka yona lehung la mosadi wa gagwe yo a bego a mo rata, Sara. Aborahama o ile a mo llela. Gaešita le ge e be e le monnatia, ga se a ka a boifa go bontšha bohloko  bjoo a bego a bo kwa. Aborahama o ile a bontšha go ba yo matla le yo bonolo.

Aborahama o bontšhitše gore o be a rata Modimo. Bophelo bja gagwe ka moka o ile a bontšha lerato le bjalo. Bjang? Mohlomongwe re ka gopotšwa seo Beibele e se bolelago go 1 Johane 5:3 ge e re: “Se ke seo lerato la Modimo le se bolelago, gore re boloke ditaelo tša gagwe.” Go ya ka tlhaloso yeo, Aborahama e bile mohlala o mobotse kudu wa motho yo a ratago Modimo.

Nako le nako ge Jehofa a be a mo nea ditaelo, Aborahama o be a ekwa gateetee. (Genesi 12:4; 17:22, 23; 21:12-14; 22:1-3) O be a ekwa go sa šetšwe gore taelo e be e le bonolo goba e le thata go e latela; e bile go be go se na taba gore Aborahama o be a tseba lebaka la gore Jehofa a mo laele go e latela goba a sa le tsebe. Aborahama o be a sa tshwenyege ka dilo tšeo. Ge Modimo wa gagwe a be a nyaka gore a dire selo se itšego, o be a ikemišeditše go se dira. Aborahama o be a lebelela taelo e nngwe le e nngwe e le sebaka sa go bontšha gore o rata Jehofa.

RE ITHUTA ENG? Re ka ekiša Aborahama ka go bontšha ba bangwe lerato, kudukudu ditho tša malapa a rena. Le ka mohla ga re nyake go dumelela dikgateletšo tša bophelo di re amoga nako ya go ba le bao re ba ratago kudu.

Gape re dira gabotse ge re hlagolela lerato la go rata Jehofa. Lerato le bjalo le ka ba le tutuetšo e matla maphelong a rena. Ka mohlala, le ka re tutueletša gore re dire diphetogo boemong bja rena bja kgopolo, tseleng yeo re bolelago ka yona le boitshwarong, e le gore re thabiše Modimo.—1 Petro 1:14-16.

Ke therešo gore go kwa ditaelo tša Jehofa ga se ka mehla go lego bonolo. Eupša re ka kgodišega gore Yo a thušitšego Aborahama—Yena yo a mmiditšego “mogwera wa ka”—le rena o tla re thekga. (Jesaya 41:8) Lentšu la gagwe, Beibele, le holofetša ka gore: “O tla le tiiša, o tla le matlafatša.” (1 Petro 5:10) A kholofetšo e ruthetšago pelo gakaakaang e tšwago go Mogwera yo a botegago wa Aborahama!

[Lepokisi go letlakala 11]

Na Banna ga ba Swanela go Lla?

Ba bantši ba ka araba ka gore ee. Mohlomongwe ba tla makatšwa ke go tseba gore Aborahama e be e fo ba yo mongwe wa banna ba mmalwa ba mafolofolo le ba botegago bao Beibele e hlalosago gore ba ile ba lla dinakong tša tlalelo. Ba bangwe ba akaretša Josefa, Dafida, moapostola Petro, bagolo ba phuthego ya Efeso, gotee le Jesu. (Genesi 50:1; 2 Samuele 18:33; Luka 22:61, 62; Johane 11:35; Ditiro 20:36-38) Go molaleng gore Beibele ga e rute gore banna ga se ba swanela go lla.