Abraiau Omulume Woluembia

Abraiau ankho waihamenua unene komutima. Sara omukai wae onthyolwa, wankhia. Putyina Abraiau aihila omukai wae upopia nokuhinangela ovipuka ovinyingi. Tyina oluihamo luliyawisa unene momutima, umomesa ononkhuka. (Gênesis 23:​1, 2) Ononkhuka ombo kambulekesa okuti watopa, mahi mbulekesa otyituwa tyimwe otyiwa tya Abraiau​—⁠oluembia.

OLUEMBIA OITYI? Oluembia okankhenda ine eholelo omunthu akala nalio namukuavo, ohole itunda momutima. Omunthu woluembia ulingila ovipuka oviwa vana ehole, alo umwe tyina tyihapepukile.

OÑGENI ABRAIAU ALEKESILE OKUTI UNA OLUEMBIA? Abraiau walekesile okuti uhole ombunga yae. Tyotyili, Abraiau ankho una ovilinga ovinyingi. Mahi, nalumwe ayekelepo okutekula ombunga yae mopalutu no mopamphepo. Jeova wetyimuene okuti Abraiau ankho uhongolela nawa ombunga yae mefendelo. (Gênesis 18:​19) Haunene, Jeova wapopile konthele yoluembia lwa Abraiau. Oe wapopila Abraiau okuti Isake “omona uhole unene.”​—⁠Gênesis 22:⁠2.

Tupu tupondola okutala oluembia lwa Abraiau monkhalelo akala etyi omukai wae onthyolwa, Sara ankhia. Abraiau wemulilile unene. Namphila ankho omulume wakola, oe kakalele nohonyi yokulekesa okuti waihamenua. Abraiau walekesile nawa okuti wapama nokuna omutima omuwa.

Abraiau walekesile okuti uhole Huku. Walekesa ohole oyo mokueenda kuomuenyo wae auho. Ñgeni ngotyo? Hamwe tuhinangela etyi Ombimbiliya ipopia mu 1 João 5:3: “Ohole na Huku ihangununa okutavela ovitumino viae.” Onondaka ombo, mbulekesa nawa okuti Abraiau ongeleka onene yohole na Huku.

Apeho, tyina Jeova ankho aavela Abraiau ovitumino, oe uvitavela liwa-liwa. (Gênesis 12:4; 17:​22, 23; 21:​12-14; 22:​1-3) Abraiau ankho apeho utavela tyilinge otyitumino tyapepuka ine katyapepukile, namphila ankho Abraiau ketyii omokonda yatyi Jeova emutuma okutyilinga. Ku Abraiau ovipuka ovio ankho kaviesukisile. Inkha Huku yae ankho uhanda alinge tyimwe, utyilinga nehambu. Abraiau ankho utala kese tyitumino ngatyina omphitilo yokulekesa ohole yae ku Jeova.

OTYO TYITULONGESA TYI? Onthue tuhetekela Abraiau mokukala noluembia olunene na vakuetu, haunene vomombunga yetu.Tuhayekei nalumwe omasukalalo omuenyo atepulule omuvo tukala navana tuhole.

Tupu tuesukisa okulinga ononkhono opo tukale nohole onene na Jeova. Ohole oyo ipondola okuhongolela omuenyo wetu. Ipondola okutulunda okupilulula ovituwa vietu, nonkhalelo yetu yokupopia opo tuhambukiswe Huku.​—⁠1 Pedro 1:​14-16.

Tyotyili, okutavela ovitumino via Jeova hapeho tyapepuka. Mahi tupondola okukala nonthumbi yokuti Una wakuatesileko Abraiau, Una wemuihanene okuti “epanga liange”, tupu metukuatesako. (Isaías 41:⁠8) Ondaka Yae, Ombimbiliya ilaa okuti: “Oe memupamesa nawa, oe memukolesa.” (1 Pedro 5:​10) Oo omulao umwe uhambukiswa unene walingwa Nepanga lia Abraiau liayumbwa onthumbi!

 [Okakasa pefo 11]

Inkha Omulume Ulila Otyo Tyilekesa Okuti Watopa?

Ovanyingi vakumbulula okuti otyili. Hamwe vapondola okuhuva inkha velilongesa okuti Abraiau o umwe, povalume vekolelo Ombimbiliya ipopia okuti walilile pomuwo wononkhumbi. Ovakuavo valilile o Jose na David, na apostolu Petulu novakulu vewaneno mo Efesu, alo umwe Jesus. (Gênesis 50:1; 2 Samuel 18:33; Lucas 22:​61, 62; João 11:35; Atos 20:​36-​38) Tyotyili, Ombimbiliya kailongesa okuti omulume okulila tyilekesa okuti watopa.