Abraham​—Un Homber Cu Tabatin Amor

Abraham su dolor ta insoportabel. Sara, su casa stima, a fayece. Segun cu e homber di edad aki ta despedi di su esposa, e ta corda con dushi e cu su casa a biba. Lagrima di tristeza y dolor ta basha for di su wowo. (Genesis 23:1, 2) E lagrimanan aki no ta un señal di debilidad ni motibo di berguensa; mas bien, nan ta evidencia di un excelente cualidad di Abraham​—su amor.

KICO TA AMOR? Amor ta un sintimento di apego of afecto profundo pa un otro persona. Un persona cu ta stima ta demostra su amor cu echo, asta si esey ta rekeri sacrificio.

CON ABRAHAM A DEMOSTRA AMOR? Abraham a stima su famia. Sin duda, Abraham tabata un homber ocupa. A pesar di esey, nunca el a neglisha e necesidad emocional y spiritual di su famia. De echo, Jehova tabatin confianza cu Abraham lo a asumi su responsabilidad como cabes di cas y guia su famia spiritualmente. (Genesis 18:19) Papiando cu Abraham, Jehova a haci mencion specifico di e amor cu Abraham a demostra; el a referi na Isaak como e ‘yu ku Abraham a stima asina tantu.’​—Genesis 22:2, BPK.

Un otro suceso cu ta duna evidencia cu Abraham a stima su famia ta e manera cu el a reacciona ora su esposa stima, Sara, a muri. Abraham a yora Sara su morto masha hopi mes. Maske e tabata un homber fuerte y baronil, e no tabatin berguensa di expresa su tristeza. Abraham a demostra suavidad y fortaleza na un manera balansa.

 Abraham a demostra su amor pa Dios. Henter su bida a mustra cu el a stima Dios. Con asina? Corda kico Bijbel ta bisa na 1 Juan 5:3: “Amor pa Dios ta nifica cu nos ta cumpli cu su mandamentonan.” Di acuerdo cu e definicion ey, Abraham tabata un excelente ehempel di un persona cu a stima Dios.

Cada bes cu Jehova a manda Abraham haci algo, el a obedece di biaha. (Genesis 12:4; 17:22, 23; 21:12-14; 22:1-3) Sea cu e mandamento tabata dificil of facil pa obedece of cu e tabata sa e motibo of no, Abraham semper a obedece Dios. Si, pa Abraham, e factornan ey tabata insignificante. Kico cu Dios tabata kier pa e haci, e tabata dispuesto pa haci. Abraham a mira cada mandamento como un oportunidad pa demostra su amor na Jehova.

LES PA NOS: Nos por imita Abraham mustrando tierno cariño na otro hende, specialmente na nos famia. Y nunca nos mester laga presion di bida pone cu nos no tin tempo pa nos sernan keri.

Ademas, ta bon pa nos cultiva un amor sincero pa Jehova. E amor ey por tin gran influencia riba nos bida. Con asina? E por motiva nos pa cambia nos actitud, nos manera di papia y nos conducta pa asina nos por agrada Jehova.​—1 Pedro 1:14-16.

Ta berdad cu no ta tur biaha ta facil pa obedece Jehova su mandamentonan. Pero nos por tin sigur cu Esun cu a yuda Abraham​—Esun cu a yam’e “mi amigo”​—lo sostene nos tambe. (Isaias 41:8) Ademas su Palabra, Bijbel, ta priminti cu ‘lo e haci nos firme y fuerte.’ (1 Pedro 5:10) Esey ta loke Abraham su bon Amigo a priminti. Esta un promesa maraviyoso!

[Cuadro na pagina 10]

Hende Homber Sa Yora?

Hopi hende ta pensa cu no. Kisas nan lo keda sorprendi ora nan lesa den Bijbel cu Abraham a yora. Pero Bijbel ta menciona varios otro homber fiel cu a yega di yora, por ehempel Jose, David, apostel Pedro, e ancianonan di e congregacion di Efeso y asta Hesus. (Genesis 50:1; 2 Samuel 18:33; Lucas 22:61, 62; Juan 11:35; Echonan 20:36-38) Ta bisto anto cu Bijbel no ta siña cu hende homber no sa yora.