Abraham​—A Chad el Uleba Bltikerreng

A Abraham a kmal dikea lsebechel el kilmeklii a kngtil a rengul. A betik er a rengul el bechil er a Sara a mla mad. Me sel taem er a lolakl er ngii e ngmillatk a betok el ungil el tekoi el ledilak el meruul el terung. Me a klou el kngtil a rengul a rullii me ngmocha mereberebet a iuechel a medal. (Genesis 23:1, 2) Ngdimlak el merur el lmangel, e tia el omerellel a ulechotii a ta er a kot el ungil el blekerdelel a Abraham, el ngii a bltkil a rengul.

NGERANG A BLTIKERRENG? A bltikerreng a blekeradel el rullii a chad el mo melechesuar a kmes el deleuill er ngii el obengkel a tang. A chad a ochotii el kmo ngbetik a rengul er a rebebil el oeak a omerellel, e tiang a sebechel el mo meringel er ngii, engdi ngkongei el rullii e le ngbltkil a rengul a uchul.

NGMILEKERANG A ABRAHAM ER A LOLECHOLT ER A BLTIKERRENG? A Abraham a ulechotii el kmo ngmle betik a rengul er a telungalek er ngii. Ngulterekokl el kmal mle mechesang el chad. Engdi ngmle kerekikl aike el lousbech a telungalek er ngii el kirel a tekoi er a klechad me a dirrek el tekingel a Dios. Me a Jehovah a ulemes er a Abraham el ua bdelul a delengchokl el ulemekrael er a telungalek er ngii el kirel a omengull. (Genesis 18:19) Me a lmuut el tang, a Jehovah a mle bleketakl el mesaod er a bltkil a rengul a Abraham. Me sera longedecheduch er ngii, e ngmillekoi el kirel a Isak el kmo ng ‘di tal ngelekem, el betik a rengum er ngii.’​—Genesis 22:2.

Ngsebeched el lmuut el mo melechesuar sel bltkil a rengul a Abraham er sera lemad a betik er a rengul el Sara. Nglilangel el kmal mlo klou a lengelel. Alta e ngmle mesisiich a rengul, engdi ngdimlak lemerur el olecholt er a kngtil a rengul. Me a omerellel a ulechotii el kmo ngmle mesisiich el chad engdi ngmedemedemek a rengul.

 A Abraham a ulechotii el kmo ngmle betik a rengul er a Dios. Chelsel a klengar er ngii e ngulechotii a chouaisei el bltikerreng. El okiu a ngera el rolel? Ngsebeched el mo melatk a tekoi el ngar er a 1 Johanes 5:3 el kmo: “Tial tekoi el kmo, ngbetik a rengud ra Dios, a melekoi ra bo dolab a llechul. E ngiil llechul a diak le meringel.” Me tiaikid el omesodel a bltikerreng a ochotii el kmo a Abraham a mera el mle ungil el kerebai el kirel a bltikerreng el mo er a Dios.

A Abraham a mle blechoel el mereched el olengesenges aike el tekoi el lolengit er ngii a Jehovah el mo meruul. (Genesis 12:4; 17:22, 23; 21:12-​14; 22:1-3) Ngdimlak lultuil er a kmo ngmle meringel me a lechub e ngbeot el tekoi, e dimlak a ultutelel el bo lodengelii a uchul me a Jehovah a oldurech er ngii. Ngar er a osengel e ngdimlak a ultutelel el lolatk a chouaika el tekoi. A lsekum a Dios a soal a bo loruul er a tekoi, e ngmle kltmokl el mo meruul er ngii. Me ngulemes a bek el tekoi el mle kirel el mo meruul el ua letechellel el ochotii a bltkil a rengul el mo er a Jehovah.

NGERANG A KLUBELED EL DENGAI ER TIANG? Ngsebeched el oukerebai er a Abraham sel doubltikerreng el mo er a rebebil, el ileakl el sel doruul er ngii el mo er a rechad er a blid. Ngkmal diak el soad el mechei a ngii di el omelsemai er a klengar me bo lengesengesii a temed el obengterir tirke el betik er a rengud.

Ngdirrek el kired el omekeroul er a bltkil a rengud el mo er a Jehovah. Chouaitia el bltikerreng a sebechel el mo mesisiich el tekoi er a chelsel a klengar er kid. El uaitiang, ngsmisichid el mo melodech a blekerdeled, cheldechedechad, me a omerelled me bo el sebeched el odeuir a rengul a Dios.​—1 Petrus 1:14-​16.

Me nguaisei, engdi a blekongesenges er kid el mo er a tekingel a Jehovah a diak el beot el tekoi. Engdi ngulterekokl a rengud el kmo Ngike el ullengeseu er a Abraham, el Ngii a ulemekedong er a Abraham el kmo ng “sechelik,” a mo ngosukid. (Isaia 41:8) A Tekingel el Biblia a tibir el kmo: Ngmo “sisichemiu, e rullemiu el mo diak molmesim.” (1 Petrus 5:10) Ngmera el klou el ongelaod tia el telbiil el mla er ngika el kot el kmeed el Sechelil a Abraham!

[Baks el ngar er a 10 el llel]

Ngolechotel a Chelitechetul a lsekum a Sechal a Lmangel?

A rebetok a omdasu el uaisei. Engdi nglocha mo mechas a rengrir a bo lodengei el kmo a Abraham a ta er tirke el mesisiich, e blak a rengrir el chad el Biblia a mesaod er tir el kmo te lilangel er a taem er a ringel. Uldimukl er tirka el chad a Josef, David, apostol el Petrus, remechuodel er a ongdibel er a Efesus, me a dirrek el Jesus. (Genesis 50:1; 2 Samuel 18:33; Lukas 22:61, 62; Johanes 11:35; Rellir 20:36-​38) Me ngbleketakl el kmo a Biblia a diak lolisechakl el kmo ngolechotel a chelitechetul a sechal a lsekum e nglmangel.