Aperaamo—O se Tagata Alofa

Ua tau lē mafai e Aperaamo ona tatali lona faanoanoa, ona ua maliu lana avā pele o Sara. E anoanoaʻi mafaufauga lelei ua manatua e le tamā matua, a o faamavae atu i si ana avā pele. A o faateleina lona faavauvau, na iʻu ina tagi auē ma maligi ai ona loimata. (Kenese 23:1, 2) O loimata, o le faailoga lenā o se tasi o ona uiga sili ona mataʻina o le alofa, ae e lē o se mea e māsiasi ai.

O LE Ā LE ALOFA? O le alofa, o se faalogona loloto māfana i le tagata. O se tagata alofa, e faaalia i ana gaoioiga ona lagona e faatatau i ē e pele iā te ia, e tusa lava po o lona faia faapea e manaʻomia ai se faataulaga.

NA FAAPEFEA ONA FAAALIA E APERAAMO LE ALOFA? Na faaalia e Aperaamo le alofa i lona aiga. E mautinoa o Aperaamo o se tamā pisi. Peitaʻi, e leʻi galo iā te ia faalogona ma manaʻoga faaleagaga o lona aiga. O le mea moni, na silafia e Ieova, o Aperaamo o le ulu o se aiga na taʻimua i le faia o la latou tapuaʻiga. (Kenese 18:19) E le gata i lea, na taʻua patino e Ieova le alofa o Aperaamo. Ina ua fetalai atu iā Aperaamo, na ia taʻua Isaako o le ʻatalii e te alofa faapelepele i ai.’—Kenese 22:2.

E tatou te iloa atili foʻi le alofa o Aperaamo i le auala na ia gaoioi ai, i le taimi o le maliu o lana avā pele o Sara. E ui o Aperaamo o se tane malosi, ae na tagiauē o ia ma e leʻi mā e faaali lona faavauvau. Sa faaalia e Aperaamo uiga matagofie e pei o le lototele ma le agamalu.

 Sa faaalia e Aperaamo e alofa i lona Atua. Sa faaalia lenā alofa i lona olaga atoa. E faapefea? Atonu ua faamanatu mai ai iā i tatou le mea o loo taʻua i le Tusi Paia i le 1 Ioane 5:3: “O le alofa lenei i le Atua, ia tatou tausi i ana poloaʻiga.” O lenā faamatalaga, ua faamaonia ai le avea o Aperaamo o se faaaʻoaʻoga mataʻina o le alofa i le Atua.

Na vave ona usitaʻi Aperaamo i taimi uma lava na avatu ai faatonuga e Ieova. (Kenese 12:4; 17:22, 23; 21:12-14; 22:1-3) E leʻi afāina iā Aperaamo pe na faigatā pe na faigofie le faatonuga; pe na malamalama foʻi i māfuaaga o faatonuga a Ieova. E leʻi tāua iā Aperaamo lona iloa o māfuaaga. Afai e finagalo lona Atua e fai se mea, e lotomalie o ia e fai. Na manatu Aperaamo i faatonuga taʻitasi, o se avanoa e faaalia ai lona alofa iā Ieova.

O Ā NI LESONA MO I TATOU? E mafai ona tatou faaaʻoaʻo iā Aperaamo i le faaalia o faalogona māfana i isi, aemaise lava o tatou tauaiga. Aua lava neʻi faatagaina popolega o le olaga e faoa le taimi e tatau ona faaalu ma ē e sili ona pele iā i tatou.

E lelei foʻi ona tatou atiaʻe se alofa loloto mo Ieova. O lenā alofa, o se mana malosi lea i o tatou olaga. O se faaaʻoaʻoga, e mafai ona uunaʻia ai i tatou e suia o tatou uiga, tautala, ma amio, ina ia faafiafia ai le Atua.—1 Peteru 1:14-16.

O le mea moni, e lē faigofie i taimi uma ona usiusitaʻi i faatonuga a Ieova. Ae e mautinoa, o le a lagolagoina pea i tatou e Lē na fesoasoani iā Aperaamo, o Lē na taʻua o ia o “laʻu uō.” (Isaia 41:8) Ua folafola mai i lana Afioga le Tusi Paia: “E na te faamausalīina ma faamalosia outou.” (1 Peteru 5:10) Maʻeu se faamāfanafanaga faagaeeloto mai i lenā Uō maufaatuatuaina a Aperaamo!

[Pusa i le itulau 11]

Po o se Vaivaiga o se Tamāloa le Tagi?

E toʻatele e tali mai ioe. Atonu e latou te teteʻi pe a iloa o Aperaamo, o se tasi o le toʻatele o tane faamaoni ma le galulue mamafa, o loo faamatalaina i le Tusi Paia na tagi i le taimi o ona mafatiaga. O isi e aofia ai Iosefa, Tavita, le aposetolo o Peteru, o toeaina i le faapotopotoga i Efeso, ma e oo lava iā Iesu. (Kenese 50:1; 2 Samuelu 18:33; Luka 22:61, 62; Ioane 11:35; Galuega 20:36-38) E manino mai la, e lē o aʻoaʻoina i le Tusi Paia o se vaivaiga o se tamāloa le tagi.