Abrahán chixku tiku xpaxkinan

Abrahán lu nitlan makgkatsi. Sara, xpuskat tiku lu paxki aku nilh. ¡Max tsukulh lakapastaka tuku tlan akxtum titaxtukgolh akxni nilh xpuskat! Lu nitlan makgkatsi wa xlakata tasa (Génesis 23:1, 2). Ni limaxana xlakata tasama; wata limasiyama akgtum lu tlan tayat nema kgalhi: tapaxkit.

¿TUKU WAMPUTUN TAPAXKIT? Wa tuku makgkatsiyaw xpalakata achatum. Chatum lataman tiku paxkinan limasiya xlakata tuku tlawa, maski wi tuku nalimakgxtakga.

¿LA LIMASIYALH ABRAHÁN UMA TAYAT? Limasiyalh pi xpaxki xfamilia. Maski lhuwa tuku xlakgaya, putum kilhtamaku kuentajtlawalh xtakanajla xfamilia chu nachuna tuku xmakgkatsikgo. Jehová akxilhli pi Abrahán tlan pulalina xwanit chu xkamatliwakglhni xtakanajla xfamilia (Génesis 18:19). Chu Jehová wa pi Abrahán lu xpaxki xkgawasa. Akgtum kilhtamaku akxni xlichuwinama Isaac, Jehová wanilh: «Minkgawasa [...] tiku lhuwa paxkiya» (Génesis 22:2).

Atanu la limasiyalh pi Abrahán xpaxki xfamilia wa tuku tlawalh akxni nilh Sara. Abrahán lakgtasalh xpuskat nema lu xpaxki. Ni lakpuwa pi limaxana pi chatum chixku xtasalh chu chuna xlimasiyalh tuku xmakgkatsi. Xlikana, limasiyalh pi tliwakga xwanit chu na xapaxkina xwanit.

Limasiyalh pi xpaxki Dios. Putum xlatamat chuna limasiyalh. ¿La limasiyalh?  Kalakapastakwi tuku wan 1 Juan 5:3: «Xampi wa yuma liwi lantla napaxkiyaw Dios, mpi natlawayaw ntu wan xlimapakgsin». Chuna la wan uma texto, Abrahán lu liwana limasiyalh pi xpaxki Dios.

Akxni Jehová wi tuku xlimapakgsi, xla tunkun xkgalhakgaxmata (Génesis 12:4; 17:22, 23; 21:12-14; 22:1-3). Ni xʼakxilha komo tuwa xwanit o ni, na ni fuerza xlakaskin pi Dios xwanilh tuku xlakata xtlawalh tuku kskini. Abrahán ni xlakaskinka xʼakxilha uma. Xtlawaputun putum tuku kskinilh Dios; xla xlimasiyaniputun pi xpaxki.

¿TUKU KINKAMASIYANIYAN XLIʼAKXILHTIT? Pi kilipaxkitkan amakgapitsin, liwaka komo kifamiliajkan. Ni lakaskinaw pi tuku anan kkakilhtamaku nakinkamakglhtiyan kilhtamaku nema xlimaklakaskiw xlakata xkatatawilaw kifamiliajkan.

Na kinkamasiyaniyan pi talakaskin xlikana napaxkiyaw Jehová. Uma tapaxkit lu nakinkamakgtayayan kkilatamatkan. Nakinkamakgtayayan xlakata nalakgpaliyaw kintayatkan, chuna la likatsiyaw chu la chuwinanaw xlakata namakgapaxuwayaw Dios (1 Pedro 1:14-16).

Xlikana, min kilhtamaku tuwa nakgalhakgaxmataw xlimapakgsin Dios. Pero liwana katsiyaw pi tiku makgtayalh Abrahán, tiku wanilh «kiamigo», na nakinkamakgtayayan (Isaías 41:8). Biblia kinkawaniyan: «Xla nakamakgtayayan chu nakamatliwakglhan» (1 Pedro 5:10). Lu kakanajlaw tuku kinkawaniyan pi natlawa Jehová, xʼamigo Abrahán.

[Recuadro xla página 10]

¿Nitlan komo lakchixkuwin natasakgo?

Max lhuwa chuna lakpuwankgo. Pero kaks nalilakawana pi Biblia kalichuwinan lakchixkuwin tiku nikxni makgxtakgkgolh Dios chu lakgtliwakgan xwankgonit chu tasakgolh la Abrahán, akxni titaxtukgolh tuku lu tuwa taʼakglhuwit. Kalichuwinaw makgapitsi tiku tasakgolh: José, David, apóstol Pedro, superintendentes xla congregación xalak Éfeso... asta Jesús (Génesis 50:1; 2 Samuel 18:33; Lucas 22:61, 62; Juan 11:35; Hechos 20:36-38). Chuna la akxilhwi, Biblia ni masiya pi lakchixkuwin ni xlitasatkan.