Abraham​—Man i Gat Pasin Laikim

Abraham i pilim bikpela bel sori. Gutpela meri bilong em, Sara, i dai pinis. Taim em i planim Sara, em i wok long tingim bek ol gutpela memori bilong tupela. Bel sori bilong em i kamap bikpela tru na aiwara bilong em i pundaun. (Stat 23:1, 2) Em i no sem long krai na dispela i kamapim klia wanpela gutpela pasin tru bilong Abraham—em pasin laikim.

PASIN LAIKIM EM WANEM SAMTING? Pasin laikim em pasin bilong givim bel tru long narapela na pas gut tru wantaim em. Man i save kamapim pasin laikim bilong em long rot bilong ol samting em i mekim bilong helpim ol narapela, maski em i mas daunim sampela laik bilong em yet long mekim olsem.

OLSEM WANEM ABRAHAM I SOIM OLSEM EM I GAT PASIN LAIKIM? Abraham i soim olsem em i laikim tru famili bilong em. Oltaim Abraham i gat planti wok bilong mekim. Tasol maski i olsem, em i save tingim tru wok bilong em long helpim famili long stap amamas na stap strong long bilip. Na Jehova yet i luksave olsem Abraham i go pas long mekim wok lotu insait long famili. (Stat 18:19) Jehova i tokaut stret olsem Abraham i gat pasin laikim. Taim Jehova i toktok long Abraham, Em i kolim Aisak olsem “pikinini . . . yu laikim em tumas.”—Stat 22:2.

Yumi inap pilim gutpela pasin laikim bilong Abraham long pasin em i bin mekim long taim gutpela meri bilong em Sara i dai. Abraham i krai sori long em. Maski em i gat strong na em i man tru, em i no sem long krai bilong soim bel hevi bilong em. Abraham i gat strong na gutpela pasin isi, na dispela tupela pasin i poroman gut.

 Abraham i soim olsem em i laikim God bilong em. Em i kamapim pasin laikim long laip olgeta bilong em. Olsem wanem em i mekim olsem? Yumi ken tingim tok Baibel i mekim long 1 Jon 5:3, olsem: “Pasin bilong laikim God i olsem, yumi bihainim ol lo bilong en na ol lo bilong en i no givim hevi long yumi.” Long dispela tok yumi ken save olsem, Abraham i stap nambawan gutpela piksa long pasin bilong laikim tru God.

Taim Jehova i givim tok long Abraham, oltaim Abraham i redi long bihainim. (Stat 12:4; 17:22, 23; 21:12-14; 22:1-3) Maski em isi o hatwok long bihainim tok, o em i no save long as na Jehova i askim em long mekim wanpela samting, oltaim em i redi long bihainim tok. Taim God i laik em i mekim wanpela samting, em i save amamas tasol long mekim. Abraham i tingim dispela olsem rot bilong soim olsem em i laikim tru Jehova.

YUMI KISIM WANEM SKUL LONG DISPELA? Yumi ken bihainim pasin bilong Abraham long rot bilong tingim gut ol arapela, na moa yet em ol wanfamili. Yumi no ken larim ol liklik hevi i pasim yumi long tingim gut ol manmeri yumi laikim ol tru.

Yumi mas kamapim pasin bilong laikim tru Jehova. Dispela pasin laikim i gat bikpela strong long stiaim laip bilong yumi. Olsem, em inap kirapim yumi long mekim sampela senis long tingting, toktok, na pasin bilong yumi bambai God i ken orait long yumi.—1 Pita 1:14-16.

Yumi ken tok, em i no isi long bihainim tok bilong Jehova long olgeta taim. Tasol yumi ken save tru olsem Man husat i bin helpim Abraham—em Man husat i kolim Abraham olsem “pren bilong mi”—em bai redi long helpim yumi tu. (Aisaia 41:8) Baibel i tok promis olsem: “Em bai strongim yupela na mekim yupela i sanap strong.” (1 Pita 5:10) Tru tumas, em i gutpela tok promis tru i kam long gutpela Pren bilong Abraham!

[Blok long pes 11]

Yu Ting Man i No Gat Strong Sapos Em i Krai?

Planti man bai tok yes. Ating ol bai kirap nogut long kisim save olsem Baibel i tok Abraham na sampela narapela man husat i stap strong long bilip ol i bin krai long taim bilong hevi. Sampela bilong ol em Josep, Devit, aposel Pita, na ol elda bilong kongrigesen long Efesus, na Jisas tu. (Stat 50:1; 2 Samuel 18:33; Luk 22:61, 62; Jon 11:35; Aposel 20:36-38) Olsem na Baibel i kamapim klia olsem maski man i gat strong, i no gat rong long em i krai.