Abrahama—Wanuna La Nga Ni Rirhandzu

Abrahama swi nga ha va swi n’wi tikerile ku tiyiselela nhlomulo. Sara nsati wakwe la rhandzekaka, a a file. Swi tele leswi wanuna loyi a dyuhaleke a a swi ehleketa loko a ri karhi a lahla nghamu yakwe. Leswi a ri ni gome embilwini yakwe, u ririle. (Genesa 23:1, 2) Mihloti yoleyo a yi nga kombisi ku tsana, kambe a yi kombisa yin’wana ya timfanelo letikulu ta Abrahama—ku nga rirhandzu.

I YINI RIRHANDZU? Rirhandzu i ku titwa u ri ekusuhi ni vanhu van’wana ni ku va tsakela swinene. Munhu loyi a nga ni rirhandzu u yi kombisa hi swiendlo ndlela leyi a titwaka ha yona hi vanhu lava a va rhandzaka, hambiloko ku endla tano swi lava leswaku a titsona swo karhi.

XANA ABRAHAMA U RI KOMBISE NJHANI RIRHANDZU? Abrahama u kombise leswaku u rhandza ndyangu wakwe. Handle ko kanakana, Abrahama a a ri wanuna loyi a tshama a khomekile. Kambe, a nga swi honisanga nikatsongo swilaveko swa mintlhaveko kumbe swa moya swa ndyangu wakwe. Entiyisweni, Yehovha u swi vonile leswaku Abrahama a rhangela evugandzerini tanihi nhloko ya ndyangu. (Genesa 18:19) Ku tlula kwalaho, Yehovha u vulavule hi rirhandzu leri Abrahama a a ri na rona. Loko a vulavula na yena, U kombetele eka Isaka tanihi ‘n’wana wa yena loyi a n’wi rhandzaka swinene.’—Genesa 22:2.

Ku tlula kwalaho, hi nga vona rirhandzu ra Abrahama eka ndlela leyi a titweke ha yona hi rifu ra nghamu yakwe leyi rhandzekaka, Sara. Abrahama u n’wi ririle. Kambe hambileswi a a tiyile naswona a ri wanuna la nga ni xivindzi, a a nga chavi ku kombisa gome leri a ri na rona.  Abrahama u kombise leswaku u ni matimba ni ku rhula.

Abrahama u kombise leswaku u rhandza Xikwembu xakwe. Evuton’wini byakwe hinkwabyo u kombise rirhandzu ro tano. Njhani? Hi nga ha tsundzuka leswi Bibele yi swi vulaka eka 1 Yohane 5:3, leyi nge: “Ku rhandza Xikwembu, hi kona ku hlayisa swileriso swa xona.” Hikwalaho ka nhlamuselo yoleyo, Abrahama i xikombiso lexinene xo rhandza Xikwembu.

Nkarhi na nkarhi, loko Yehovha a nyika Abrahama xileriso, a xi yingisa hi ku hatlisa. (Genesa 12:4; 17:22, 23; 21:12-14; 22:1-3) Ku nga khathariseki leswaku xileriso xexo a xi olova kumbe a xi tika ku xi yingisa; a a nga lavi ku tiva leswaku ha yini a n’wi lerisile. Eka Abrahama, timhaka to tano a ti nga ri ta nkoka. Loko Xikwembu xi lava leswaku a endla swilo swo karhi, a tiyimisele ku swi endla. Abrahama a a teka xileriso xin’wana ni xin’wana tanihi nkarhi wo kombisa rirhandzu rakwe eka Yehovha.

I YINI LESWI HI SWI DYONDZAKA? Hi nga tekelela Abrahama hi ku kombisa van’wana rirhandzu, ngopfu-ngopfu swirho swa ndyangu wa hina. A hi fanelanga hi pfumelela mivilelo ya hina ya vutomi yi endla leswaku hi nga vi na wona nkarhi wo va ni vanhu lava hi va rhandzaka.

Hi fanele hi tikarhatela ku hlakulela ku rhandza Yehovha hi timbilu ta hina hinkwato. Rirhandzu ro tano ri nga va ni matimba lamakulu evuton’wini bya hina. Hi xikombiso, ri nga hi susumetela ku cinca langutelo, mavulavulelo ni mahanyelo ya hina leswaku hi tsakisa Xikwembu.—1 Petro 1:14-16.

I ntiyiso leswaku a hi minkarhi hinkwayo swi olovaka ku yingisa swileriso swa Yehovha. Kambe hi nga tiyiseka leswaku Loyi a pfuneke Abrahama—Loyi a n’wi vitaneke “nakulorhi”—u ta hi seketela na hina. (Esaya 41:8) Rito rakwe, ku nga Bibele, ri hi tshembisa leswi: ‘U ta hi tiyisa, a hi nyika ntamu.’ (1 Petro 5:10) Mawaku xitshembiso xo tsakisa lexi humaka eka Munghana wo tshembeka wa Abrahama!

[Bokisi leri nga eka tluka 11]

Xana Loko Wanuna A Rila Swi Kombisa Leswaku U Tsanile?

Vo tala va nga ha hlamula tano. Kumbexana va nga hlamala ku twa leswaku Abrahama a ri un’wana wa vavanuna vo hlayanyana lava nga ni matimba, vo tshembeka lava Bibele yi vulaka leswaku va ririle loko va ri ni gome. Van’wana va katsa Yosefa, Davhida, muapostola Petro, vakulu va le vandlheni ra le Efesa hambi ku ri Yesu. (Genesa 50:1; 2 Samuwele 18:33; Luka 22:61, 62; Yohane 11:35; Mintirho 20:36-38) Swi le rivaleni leswaku Bibele a yi dyondzisi swona leswaku loko wanuna a rila u tsanile.