Aberahama—E taata here

Mea fifi roa no Aberahama ia faaoromai i te pohe o ta ˈna vahine here, o Sara. A huna ˈi oia ia ˈna, te haamanaˈo nei paha teie upoo utuafare paari i te mau taime maitai putapû e rave rahi ta raua i ora na. No to ˈna mauiui rahi, tahe mai nei to ˈna roimata. (Genese 23:1, 2) E ere roa ˈtu te reira i te mea haama. E faaiteraa papu râ teie mau roimata o te hoê huru maitai nehenehe mau o Aberahama: to ˈna here.

EAHA TE HERE? Te here, o te hoê ïa huru aau te itehia i roto i te hoê taairaa piri roa. E faaite te hoê taata i teie huru maitai i nia i te feia ta ˈna e here ra na roto i te mau ohipa ta ˈna e rave, noa ˈtu e e titauhia ia haapae o ˈna ia ˈna iho.

MEA NAFEA ABERAHAMA I TE FAAITERAA I TO ˈNA HERE? Ua faaite o Aberahama e ua here o ˈna i to ˈna utuafare. Noa ˈtu e mea rahi ta Aberahama ohipa, ua haapao noa oia i te mau huru aau e i te mau hinaaro pae varua o to ˈna utuafare. Inaha, ua ite maitai Iehova e te aratai ra iho â o Aberahama i to ˈna utuafare i roto i te haamoriraa. (Genese 18:19) Ua faahiti roa atoa Iehova i to Aberahama here ma te faataa ia Isaaka mai te tamaiti ta ˈna e here ra.—Genese 22:2.

E ite-maitai-atoa-hia to Aberahama here a pohe ai ta ˈna vahine here ra o Sara. Ua oto o Aberahama ia ˈna. Aita o ˈna i haama i te faaite i to ˈna mauiui. Mea itoito o Aberahama, e mea mǎrû atoa râ.

Ua faaite o Aberahama e ua here o ˈna i  to ˈna Atua. O ta ˈna ïa i faaite i te roaraa o to ˈna oraraa. E haamanaˈo anaˈe na i ta te Bibilia e parau ra i roto i te Ioane 1, 5:3: “Teie hoi te hinaaro i te Atua, o te haapao i ta ˈna ra parau.” Ia au i teie faataaraa, e hiˈoraa faahiahia mau ïa to Aberahama hinaaro, aore ra here, i te Atua.

Ia horoa Iehova i te faaueraa ia Aberahama, oioi o ˈna i te pee i te reira. (Genese 12:4; 17:22, 23; 21:12-14; 22:1-3) No ˈna, aita e faufaa ia ite e e faaueraa ohie anei ia pee aore ra aita, e no te aha Iehova i ani ai ia ˈna ia auraro. Ia hinaaro to ˈna Atua ia rave o ˈna i te tahi ohipa, ua ineine oia i te na reira. No ˈna, ua riro te faaueraa taitahi ei ravea no te faaite i to ˈna here ia Iehova.

EAHA TE HAAPIIRAA E HUTI MAI? E pee anaˈe i te hiˈoraa o Aberahama ma te faaite i to tatou here ia vetahi atu, i te mau melo iho â râ o to tatou utuafare. Noa ˈtu e mea fifi te oraraa, e faataa noa anaˈe i te taime no te feia ta tatou e here ra.

Mea maitai atoa ia atuatu i te here haavare ore ia Iehova, e puai rahi hoi te reira i roto i to tatou oraraa. Ei hiˈoraa, e turai teie here ia tatou ia taui i to tatou huru e haerea e ta tatou huru paraparau ia oaoa te Atua.—Petero 1, 1:14-16.

Parau mau, e ere noa i te mea ohie ia auraro i ta Iehova mau faaueraa. Ia papu râ ia tatou e e turu mai Tei tauturu ia Aberahama e Tei pii ia ˈna “tau hoa” ia tatou atoa. (Isaia 41:8) Te fafau ra ta ˈNa Parau, te Bibilia, e e ‘faaetaeta mai e e haapapu o ˈna ia outou.’ (Petero 1, 5:10) Auê ïa parau fafau mahanahana mau no ǒ mai i teie Hoa papu o Aberahama!

[Tumu parau tarenihia i te api 10]

Mea haama anei no te hoê tane ia taˈi?

Mea rahi te pahono e e. E maere paha ratou i te ite e taa ê atu ia Aberahama, mea rahi te tane itoito e te haapao maitai ta te Bibilia e faahiti ra tei taˈi i te mau taime ahoaho. O Iosepha te tahi, Davida, te aposetolo Petero, te mau matahiapo o te amuiraa no Ephesia e o Iesu atoa. (Genese 50:1; Samuela 2, 18:33; Luka 22:61, 62; Ioane 11:35; Ohipa 20:36-38) Papu maitai ïa e aita te Bibilia e haapii ra e mea haama no te hoê tane ia taˈi.