Abraham—Ehemplo han Daku nga Gugma

Haros diri maantos ni Abraham an kasubo tungod han kamatay han iya hinigugma nga asawa, hi Sara. Han hirani na ilubong ito, damu hinduro nga malipayon nga panhitabo an nabalik ha iya hunahuna. Samtang nagtitikaduro an iya kasakit, hiya nagtangis. (Genesis 23:1, 2) Kondi waray niya ito ikaawod, ngan ito nga mga luha nagpapamatuod han usa han iya pinakamaopay nga kalidad—gugma.

ANO AN GUGMA? An gugma amo an mapaso o hilarom nga pagbati. Iginpapakita han mahigugmaon nga tawo ha iya gios kon ano an iya inaabat para ha iya hinigugma, bisan kon nagkikinahanglan ito hin pagsakripisyo.

HA ANO NGA PAAGI NAGPAKITA HI ABRAHAM HIN GUGMA? Iginpakita ni Abraham nga hinigugma niya an iya pamilya. Waray ruhaduha sagipo hiya, pero waray niya igbalewaray an ira emosyonal ngan espirituwal nga panginahanglan. Ngani, nakita mismo ni Jehova an iya pagpanguna sugad nga ulo han pamilya ha ira espirituwalidad. (Genesis 18:19) Dugang pa, dayag nga gin-unabi ni Jehova an gugma ni Abraham. Han nakiistorya hiya kan Abraham, gintawag niya hi Isaak nga “an imo anak . . . nga imo hinihigugma.”—Genesis 22:2.

Makikita liwat naton an gugma ni Abraham ha iya reaksyon han mamatay an iya hinigugma nga asawa. Nagnguyngoy hiya han mamatay ito. Bisan kon marig-on ngan lalaki, waray hiya mahadlok pagpakita hin kasubo. Timbang nga nagpakita hiya hin karig-on ngan pagbati depende ha sitwasyon.

 Iginpakita ni Abraham nga hinigugma niya an iya Dios. An iya bug-os nga kinabuhi nagpapakita hito. Ha ano nga paagi? Bangin mahinumdoman naton an siring han 1 Juan 5:3: “Ini an gugma han Dios, nga pagtumanon ta an iya mga sugo.” Uyon hito, hi Abraham susbaranan gud ha pagpakita hin gugma ha Dios.

Ha kada panahon nga ginsusugo ni Jehova hi Abraham, nasunod dayon hiya. (Genesis 12:4; 17:22, 23; 21:12-14; 22:1-3) Diri hiya nagtatagad kon makuri o masayon an sugo, o kon maaram hiya o diri han rason han iginsusugo ni Jehova. Para ha iya, diri ito importante. Kon may-ada ginsusugo an Dios, andam hiya pagsugot. Ginhuhunahuna niya nga higayon ito ha pagpakita han iya gugma kan Jehova.

ANO NGA MGA LEKSYON AN ATON MAHIHIBAROAN? Masusubad naton hi Abraham pinaagi ha pagpakita hin mapaso nga pagbati ha iba, labi na ha aton pamilya. Diri gud naton tutugotan an kakurian nga magin rason nga mawad-an hin panahon ha mga tawo nga importante ha aton.

Sadang liwat kita mangalimbasog pagkultibar hin sinsero nga gugma kan Jehova. Ito nga gugma mahimo makaimpluwensya ha aton. Pananglitan, makakaaghat ito ha pagbag-o han aton disposisyon, panyakan, ngan panggawi basi mapalipay an Dios.—1 Pedro 1:14-16.

Tinuod, usahay diri masayon an pagsunod ha sugo ni Jehova. Kondi makakasarig kita nga an Usa nga nagbulig kan Abraham—an Usa nga nagtawag ha iya nga “akon sangkay”—mabulig liwat ha aton. (Isaias 41:8) An Iya Pulong, an Biblia, nagsasaad: “[Hiya] magpaparig-on, ngan magpapakusog ha [imo].” (1 Pedro 5:10) Makalilipay gud ito nga saad tikang ha masasarigan nga Sangkay ni Abraham!

[Kahon ha pahina 11]

Makakaiban ba ha Pagkalalaki an Pagtangis?

Damu an mabaton hin oo. Kondi bangin mahipausa hira ha paghibaro nga hi Abraham usa la han pipira han marig-on ngan matinumanon nga kalalakin-an nga gin-unabi ha Biblia nga nagtangis ha panahon han kasub-anan. An iba amo hira Jose, David, apostol Pedro, an mga tigurang ha kongregasyon han Efeso, ngan bisan hi Jesus. (Genesis 50:1; 2 Samuel 18:33; Lukas 22:61, 62; Juan 11:35; Buhat 20:36-38) Matin-aw, diri igintututdo han Biblia nga makakaiban ha pagkalalaki an pagtangis.