Nong Pwony Ki I Lok Pa Lubanga

Baibul Mono Tito pi Jami ma Bitimme i Anyim?

Pwony man nyamo lapeny mogo ma gwok nyo ibedo ka tamogi dok nyutti ka ma itwero kwano iye lagamgi ki i Baibulli. Lucaden pa Jehovah cwinygi bibedo yom me nyamo lagam magi kwedi.

1. Lok pa lunebi me Baibul mono gicobbe i wange nitap?

Lubanga Won Twer Ducu aye ma ngeyo gin ma bitimme i anyim. (Amoc 3:7) Me labolle nicakke con en otito pi bino pa ngat ma gibilwongone ni Meciya, nyo Kricito. En otito ni Meciya bibedo lakwaro Abraim ma obedo lagen. Meciya bibedo laloc ma bimiyo dano ma lugen ginongo mot me kwo ma roc pe iye labongo two. (Acakki 22:18; Icaya 53:4, 5) Ngat ma Lubanga ocikke pire-ni onongo bibino kun a ki i Beterekem.​—Kwan Mika 5:2.

Meciya ma kitito pire-ni obedo Yecu. Pi mwaki makato miya abiro kulu, Baibul oloko wacon ni anyaka ma peya ongeyo laco aye binywalo Meciya dok dano bikwero Meciya woko. En bimiyo kwone pi koko jo mapol ki i balgi dok bene kibiyikke i kin lulonyo. (Icaya 7:14; 53:3, 9, 12) Baibul dok bene oloko con mwaki makato miya abic kulu ni en bidonyo i Jerucalem kun nongo tye i wi kana dok ni kibimiye me aneka pi cul me cekel 30 me ryal. Gin magi ducu ma kitito con gurwatte litap calo gidog jereken.​—Kwan Jekaria 9:9; 11:12.

2. Lubanga mono tito mwaka ma gin moni bitimme iye?

Ma pud odong mwaki miya abic anyim, Baibul otito mwaka kikome ma Yecu bidoko Meciya. Nicakke i kare meno onongo kikwano nino ma tye i cabit ento nongo cung pi mwaka, dok cabit acel nongo tye mwaka abiro. Onongo cabit 7 bikato med iye cabit 62 mukene, ma man ducu dong bibedo cabit 69 ma nino me cabit acel acel cung pi mwaka. Ka kitimo curane ci dong bedo mwaki 483 kulu. Mwaki meno kono dong gicako kwanone awene? Baibul nyuto ni kicako kwanone i kare ma Nekemia latic pa Lubanga oo kwede i Jerucalem ci ocako gero gang meno odoco. Coc me tekwaro pa jo Percia nyuto ni ocakke i mwaka 455 K.M.P. (Nekemia 2:1-5) Yecu onongo batija ci odoko Meciya i mwaka 29 K.M., ka icako kwanone cakke i mwaka 455 K.M.P. ci inongo ni otero mwaki 483, ma ocobbe i wange nitap.​—Kwan Daniel 9:25.

  3. Lok pa lunebi me Baibul mono tye ka cobbe i kare-ni?

Yecu otito jami ma pigi tego ma bitimme i karewa-ni. Lokke macalo lanebi otito pi kwena maber me Ker-ri ma bikelo kwo labongo peko bot dano ma gimaro Lubanga i wi lobo lung. Ker-ri bikelo agikki me lobo man ma wakwo iye-ni.​—Kwan Matayo 24:14, 21, 22.

Lok pa lunebi me baibul otito kore ki kore kit ma piny bibedo kwede i kare me agikki me lobo man. Baibul nyuto ni i kare ma nongo dano gitamo ni lobo myero odong iye-ni, dok nongo dano gibalo lobo abala aye. Ayelayela calo lweny, kec, oyengyeng, ki two gibimedde ameda. (Luka 21:11; Niyabo 11:18) Tim pa dano bidoko col. En i kare man ma kwo tek-ki lulub kor Yecu gibitito kwena maber me Ker pa Lubanga bot rok ducu.​—Kwan Matayo 24:3, 7, 8; 2 Temceo 3:1-5.

4. Anyim me kwo pa wan dano bibedo ningo?

Won Twer Ducu tye ki yub maber pi wan dano. Yecu Kricito ma en aye Meciya kacel ki jone ma kiyerogi, gibiloyo lobo ki i polo. Gin bibedo jo ma loyo gamente me Ker-ri ma biloc pi mwaki alip acel. Jo muto kibicerogi dok gibingolo kop i wigi me neno ka gupore me nongo kwo ma pe tum nyo pe. Medo i kom meno bene, Ker-ri bicango two woko ducu i kom jo ma kwo i kare meno. Two ki to dong bibedo pe matwal.​—Kwan Niyabo 5:10; 20:6, 12; 21:4, 5.

Pi ngec mukene, nen pot karatac 23-25 ki 197-201 i buk me Baibul Mono Ada Pwonyo Gin Ango? kiketo calle eni.