Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Espesipiko ba ang mga tagna sa Bibliya?

Ang Labing Gamhanang Diyos lang ang detalyadong makatagna sa umaabot. (Amos 3:7) Pananglitan, sukad pa kaniadto siya nagtagna na sa pag-abot sa usa nga gitawag ug Mesiyas, o Kristo. Ang Mesiyas maggikan sa matinumanong tawo nga si Abraham. Siya mahimong magmamando kinsa magpahinabong ang masinugtanong katawhan makapahimulos pag-usab sa panalangin sa hingpit nga kinabuhi nga walay sakit. (Genesis 22:18; Isaias 53:4, 5) Kining Sinaad nga Usa maggikan sa Betlehem.—Basaha ang Miqueas 5:2.

Si Jesus napamatud-an nga mao ang Mesiyas. Kapin sa 700 ka tuig nga abante, ang Bibliya nagtagna nga ang Mesiyas ipanganak sa usa ka ulay ug pagatamayon. Iyang ihalad ang iyang kinabuhi alang sa mga sala sa daghan, ug siya igalubong kauban sa mga dato. (Isaias 7:14; 53:3, 9, 12) Gitagna usab sa Bibliya, kapin sa 500 ka tuig nga abante, nga siya mosulod sa Jerusalem sakay sa usa ka asno ug siya budhian sa kantidad nga 30 ka pirasong plata. Ang tanang detalye natuman gayod.—Basaha ang Zacarias 9:9; 11:12.

2. Ang Diyos ba magtagna ug mga petsa?

Kapin sa 500 ka tuig nga abante, gitagna sa Bibliya ang eksaktong tuig sa pag-abot sa Mesiyas. Giihap ang panahon sa iyang pag-abot pinaagig mga semana sa mga tuig, nga nagpasabot nga ang matag “semana” maoy pito ka tuig ang gidugayon. Adunay 7 ug 62 ka semana, nga mototal ug 69 ka semana sa mga tuig. Kana maoy 483 ka tuig. Kanus-a nagsugod ang maong yugto? Sumala sa Bibliya nagsugod kana sa dihang ang alagad sa Diyos nga si Nehemias miabot sa Jerusalem ug misugod sa pagtukod pag-usab sa siyudad. Ang kasaysayan sa Persia nagpetsa niana nga 455 B.C.E. (Nehemias 2:1-5) Si Jesus nabawtismohan ingong Mesiyas 483 ka tuig sa ulahi, sa tuig 29 C.E., sumala gayod sa gitagna.—Basaha ang Daniel 9:25.

  3. Natuman ba karon ang mga tagna sa Bibliya?

Si Jesus nagtagna ug dagkong panghitabo sa atong panahon. Ang iyang tagna naghisgot sa maayong balita sa Gingharian sa Diyos nga magpahinabog kahupayan sa mga tawong nahigugma sa Diyos. Taposon sa Gingharian ang tibuok daotang sistema sa mga butang nga atong gipuy-an.—Basaha ang Mateo 24:14, 21, 22.

Ang mga tagna sa Bibliya detalyadong naghubit sa kataposang yugto sa presenteng sistema sa mga butang. Gipadayag sa Bibliya nga sukwahi sa gidahom niining panahon sa pag-uswag, ang mga tawo magadaot sa yuta. Mograbe ang kagul-anan nga gipahinabo sa gubat, kanihit sa pagkaon, linog, ug pagdagsang sa mga sakit. (Lucas 21:11; Pinadayag 11:18) Ang moral nga mga sukdanan mahugno. Niining malisod nga panahon, ang mga sumusunod ni Jesus magsangyaw sa maayong balita sa Gingharian sa Diyos sa tanang kanasoran.—Basaha ang Mateo 24:3, 7, 8; 2 Timoteo 3:1-5.

4. Unsay kaugmaon sa katawhan?

Ang Labing Gamhanang Diyos nag-andam ug maayong mga butang alang sa matinumanong katawhan. Si Jesu-Kristo, ang Mesiyas, kauban sa iyang mga pinili, magmando sa yuta gikan sa langit. Sila ang mga hari sa Gingharian nga magmando sa usa ka libo ka tuig. Ang mga patay banhawon ug may kahigayonan nga hukmang takos sa kinabuhing dayon. Dugang pa, ayohon sa Gingharian ang tanang tawo nianang panahona. Wala nay sakit ug kamatayon.—Basaha ang Pinadayag 5:10; 20:6, 12; 21:4, 5.

Alang sa dugang impormasyon, tan-awa ang panid 23-25 ug 197-201 sa librong Unsay Tinuod nga Gitudlo sa Bibliya? nga gipakita dinhi.