Käeö seni än Kot we Kapas

Itä ewe Paipel a Oesini usun Mwachkkan?

Ei pworaus a kapas usun ekkewe kapas eis eli ka fen pin eäni me epwe äiti ngonuk ia kopwe tongeni älleani me ie pölüwer lon noum Paipel. Chon Pwäraatä Jiowa ra pwapwa le älisuk le kütta pölüwer.

1. Itä a tichik än Paipel kewe oesini?

Ewe Kot mi Lapalap chök a silei tichikin met epwe fis lon mwachkkan. (Amos 3:7) Ren chök äwewe, seni loom, a fen oesini warotoon ewe emön mi iteni Messaia are Kraist. Ewe Messaia epwe feito seni mwirimwirin Eperiam, ewe mwän mi tüppwöl. Epwe emön sou nemenem mi efisi än aramas mi älleasochis angei ewe feiöch mi fen pöütülo, weween ewe feiöchün manau mi unusöch me ngase seni samau. (Keneses 22:18; Aisea 53:4, 5) Ena Emön mi Pwonetiw epwe feito seni Petleem.​—Älleani Mika 5:2.

A wor pisekin ännet pwe Jises i ewe Messaia. Ewe Paipel a oesini lap seni füpükü ier mwan pwe ewe Messaia epwe uputiw seni emön föpwül esaamwo tori mwän me epwe pwal küna koput. Epwe fangolo manauan fän iten tipisin aramas me epwe peias lon peiasen emön mi pisekisek. (Aisea 7:14; 53:3, 9, 12) Ewe Paipel a pwal apasa lap seni nimepükü ier mwan pwe Jises epwe tolong lon Jerusalem nge epwe wawa emön aas me emön epwe afangemä i ren 30 föün moni silifer. Meinisin tichikin ekkeei oesini ra fen fis.​—Älleani Sekaraia 9:9; 11:12.

2. Itä Kot a tichikin affata ineet epwe pwönüetä an oesini?

Nimepükü ier me mwen pwäloon ewe Messaia, Paipel a fen oesini wesewesen ewe ier epwe pwä. An waroto a kaük ngeni wiiken ier, weween pwe “eü wiik” epwe fisu ier ttaman. Epwe 7 kapach 62 ekkena wiik, weween kapachelaper 69 wiiken ier, are 483 ier. Ineet epwe poputä ällean ena ier 483? Me ren ewe Paipel, a poputä atun nöün Kot we chon angang Nehemia a tori Jerusalem me poputä le aüsefälli ewe telinimw. A nük uruwoon chon Persia lon ewe ier 455 B.C.E. (Nehemia 2:1-5) Jises a papatais usun emön Messaia lon 483 ier mwirin, lon ewe ier Paipel a oesini usun, weween 29 C.E.​—Älleani Taniel 9:25.

 3. Itä än Paipel kewe oesini ra pwönüetä iei?

Jises a oesini mettoch mi fokkun lamot fän iten ach ei fansoun. An we oesini a kapas usun ewe kapas allimen Mwuun Kot, ewe epwe wato ngaselo woon unusen fönüfan ngeni chon tongei Kot. Ena Mwu epwe asopwalo unusen ei otot mi ngaw sia nonnom lon.​—Älleani Mattu 24:14, 21, 22.

Än Paipel kewe oesini ra tichikin äweweei sopwoloon ei otot. Ewe Paipel a pwäraatä pwe aramas repwe angawalo ei fönüfan, nge esap ina met ekkoch ra ekieki pokiten a fen lallapolo tipächemen aramas iei. Repwe lapolo ekkewe riäfföü mi fis ren maun, lengita, chechchechin fönü, me mälapalap. (Luk 21:11; Pwarata 11:18) Aramas resap chüen akkamwöchü ekkewe kapasen emmwen usun manau mi limöch. Lon ekkeei rän mi weires, nöün Jises chon käeö repwe afalafala ewe kapas allim usun Mwuun Kot ngeni aramas meinisin.​—Älleani Mattu 24:3, 7, 8; 2 Timoti 3:1-5.

4. Met epwe fis ngeni aramas lon mwachkkan?

Ewe Kot mi Lapalap a fen akkota ekkewe mettoch mi mürinnö fän iten ekkewe aramas mi tüppwöl. Jises Kraist, ewe Messaia me chokkewe a fen filiretä repwe nemeni fönüfan seni läng. Iir chon ena Mwu epwe nemenem ükükün engeröü ier. Ekkewe mi mälo repwe manausefäl me anganga ar repwe fich le küna manau esemuch. Pwal och, ena Mwu epwe echikara meinisin mi manau lon ena atun. Esap chüen wor samau me mälo.​—Älleani Pwarata 5:10; 20:6, 12; 21:4, 5.

Ren pwal och pworaus, ppii pekin taropwe 25-28 me 228-231 lon ei puk, Met ewe Paipel A Wesewesen Apasa?, mi liosutiw ikeei.