Kpep N̄kpọ To Ikọ Abasi

Ndi Bible Esitịn̄ Ini Iso?

Ibuotikọ emi obụp mme mbụme emi ẹkemede ndidi emesibụp n̄ko, onyụn̄ owụt ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Ndi Bible esitịn̄ nnennen nnennen se iditịbede?

Ata Ọkpọsọn̄ Abasi kpọt ekeme nditịn̄ nnennen nnennen se iditịbede ke ini iso. (Amos 3:7) Ke uwụtn̄kpọ, enye ama etetịn̄ toto ko eset ke Messiah, m̀mê Christ eyedi; ke enye edito ubon Abraham emi ekedide asan̄autom imọ. Enye ama etịn̄ n̄ko ete ke Messiah emi edidi andikara emi edinamde mbon oro ẹkopde item ẹkeme ndifiak n̄kodu mfọnmma uwem emi owo ndomokiet mîdidọn̄ọke aba. (Genesis 22:18; Isaiah 53:4, 5) Ẹkedọhọ ke Messiah emi edito Bethlehem.—Kot Micah 5:2.

Jesus ekedi Messiah emi. Bible ama etetịn̄, ke se ibede isua 700 mbemiso Jesus amanade, ete ke eyenan̄wan emi mîfiọkke erenowo ediman Messiah, ye nte ke ẹyesịn Messiah emi ke ndek; n̄ko ke enye ayakpa man obiom idiọkn̄kpọ ediwak owo, ndien ke ẹyebụk enye ye mbon inyene. (Isaiah 7:14; 53:3, 9, 12) Bible ama etetịn̄ n̄ko, ke se ibede isua 500 mbemiso emi etịbede, ete ke Messiah ayawat ke uman ass odụk Jerusalem, ke ẹyenyụn̄ ẹda enye ẹnọ ke mbak silver 30. Kpukpru emi ẹma ẹsu.—Kot Zechariah 9:9; 11:12.

2. Ndi Abasi esisiak ata ata isua emi n̄kpọ editịbede?

Bible ama asiak ata ata isua emi Messiah edidide ke se ibede isua 500 mbemiso enye edide. Bible ọkọdọhọ ke “urua itiaba ye urua ata ye iba,” oro edi, urua 69, emi ẹdide usen 483, ẹyebe mbemiso Messiah edi. Usen kiet ke ntịn̄nnịm ikọ Bible emi ada aban̄a isua kiet. Ke ntre, usen 483 ẹdidi isua 483. Edi ini ewe ke ẹketọn̄ọ ndibat isua emi? Bible owụt ke ekedi ke ini emi Nehemiah asan̄autom Abasi ekedide edisịm Jerusalem, ọtọn̄ọ ndibọp obio oro. Ndien mbụk mbon Persia owụt ke emi ekedi ke isua 455 M.E.N. (Nehemiah 2:1-5) Edieke itọn̄ọde ke isua 455 M.E.N. ibat isua 483, oro edida nnyịn ikesịm isua 29 E.N., kpa isua emi Jesus akanade baptism akabade edi Messiah.—Kot Daniel 9:25.

 3. Ndi mme ntịn̄nnịm ikọ Bible ke ẹsu idahaemi?

Jesus ama etịn̄ ke ikpọ n̄kpọ ẹyetịbe ke eyo nnyịn emi. Enye ama etịn̄ ke ẹyekwọrọ eti mbụk Obio Ubọn̄ Abasi, emi edinamde mbon emi ẹmade Abasi ẹbọ emem ke ofụri ererimbot. Obio Ubọn̄ emi oyosobo idiọk ererimbot emi efep.—Kot Matthew 24:14, 21, 22.

Mme ntịn̄nnịm ikọ Bible ẹtịn̄ kpukpru se iditịbede ke akpatre ini editịm n̄kpọ emi. Enye ama etịn̄ ke mme n̄kpọ emi owo mîkpodorike-dori enyịn ke ẹkpetịbe ke eyo ntatenyịn emi ẹyetịbe; ọdọhọ ke mme owo ẹyebiat isọn̄ emi, ye nte ke mme afanikọn̄ oro ẹsisan̄ade ye ekọn̄, akan̄, unyekisọn̄, ye ndiọi udọn̄ọ, ẹyenen̄ede ẹsọn̄ ubọk. (Luke 21:11; Ediyarade 11:18) Bible ama ọdọhọ n̄ko ke mme owo ididaha aba mme edumbet Abasi idu uwem, ye nte ke mme anditiene Jesus ẹyekwọrọ eti mbụk Obio Ubọn̄ Abasi ke kpukpru idụt kpa ke ndiọkeyo emi.—Kot Matthew 24:3, 7, 8; 2 Timothy 3:1-5.

4. N̄kpọ editie didie ye nnyịn ke ini iso?

Ata Ọkpọsọn̄ Abasi ọyọdiọn̄ mbon n̄kopitem. Jesus Christ, kpa Messiah, ye ndimek ikọt esie ẹyetie ke heaven ẹkara isọn̄ emi ke tọsịn isua. Ẹyenam mme akpan̄kpa ẹset, ndien se mmọ ẹdinamde oyowụt m̀mê mmọ ẹdot ndidu uwem ke nsinsi. N̄ko, Obio Ubọn̄ emi ayanam udọn̄ọ okụre kpukpru owo. Udọn̄ọ ye n̄kpa idinyụn̄ idụhe aba.—Kot Ediyarade 5:10; 20:6, 12; 21:4, 5.

Edieke oyomde ndifiọk n̄kpọ en̄wen, kot page 23-25 ye 197-201 ke n̄wed Nso ke Bible Enen̄ede Ekpep?, emi okụtde mi.