Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Espesipiko bala ang mga tagna sa Biblia?

Ang Labing Gamhanan nga Dios lamang ang makatagna ukon makasugid sing eksakto sang palaabuton. (Amos 3:7) Halimbawa, gintagna niya ang pag-abot sang Mesias, ukon Cristo. Ang Mesias mangin kaliwat sang matutom nga si Abraham. Mangin manuggahom sia, kag paagi sa iya matigayon sang matinumanon nga mga tawo ang perpekto nga kabuhi nga wala sing balatian. (Genesis 22:18; Isaias 53:4, 5) Ining Isa nga Ginsaad magahalin sa Betlehem.—Basaha ang Miqueas 5:2.

Napamatud-an nga si Jesus amo ang Mesias. Sobra 700 ka tuig antes sini, gintagna sang Biblia nga matawo ang Mesias sa isa ka ulay kag yagutaon sia. Ihatag niya ang iya kabuhi para sa sala sang mga tawo, kag ilubong sia upod sa mga manggaranon. (Isaias 7:14; 53:3, 9, 12) Sobra 500 ka tuig antes sini, ginsugid man sang Biblia nga magasulod sia sa Jerusalem nga nagasakay sa asno kag luiban sia kabaylo sang 30 ka bilog nga pilak. Natuman ini tanan.—Basaha ang Zacarias 9:9; 11:12.

2. Ginatagna bala sang Dios ang mga petsa?

Sobra 500 ka tuig antes nag-abot ang Mesias, gintagna sang Biblia ang eksakto nga tuig sang iya pag-abot. Ang panahon antes sia nag-abot gin-isip subong semana sang mga tuig, nga nagapahangop nga ang tagsa ka “semana” may kalawigon nga pito ka tuig. May ara 7 ka semana kag dayon 62 ka semana—sa kabilugan, 69 ka semana sang mga tuig, nga katumbas sang 483 ka tuig. San-o ini nagsugod? Suno sa Biblia, nagsugod ini sang ang alagad sang Dios nga si Nehemias nag-abot sa Jerusalem para tukuron liwat ang siudad. Ginapakita sang kasaysayan sang Persia nga natabo ini sang 455 B.C.E. (Nehemias 2:1-5) Eksakto 483 ka tuig sang ulihi, sang 29 C.E., ginbawtismuhan si Jesus bilang Mesias.—Basaha ang Daniel 9:25.

  3. Nagakatuman bala subong ang mga tagna sang Biblia?

Gintagna ni Jesus ang importante nga mga hitabo sa aton panahon. Isa sini amo ang maayong balita sang Ginharian sang Dios, nga magadala sing daku nga kaayuhan sa mga tawo nga nagahigugma sa Dios. Dulaon sang Ginharian ang tanan nga kalautan subong.—Basaha ang Mateo 24:14, 21, 22.

Detalyado nga gintagna sang Biblia ang mga hitabo sa katapusan nga mga adlaw. Nagsiling ini nga samtang nagauswag ang kalibutan, gub-on sang mga tawo ang duta. Magadugang ang problema nga resulta sang inaway, kakulang sing pagkaon, mga linog, kag mga balatian. (Lucas 21:11; Bugna 11:18) Maganubo ang moral sang mga tawo. Sa sining mabudlay nga panahon, iwali sang mga sumulunod ni Jesus ang maayong balita sang Ginharian sang Dios sa tanan nga pungsod.—Basaha ang Mateo 24:3, 7, 8; 2 Timoteo 3:1-5.

4. Ano ang palaabuton sang mga tawo?

Pakamaayuhon sang Labing Gamhanan nga Dios ang mga matutom sa iya. Ang Mesias nga si Jesucristo kag ang mga pinili amo ang magahuman sang Ginharian nga magagahom sa duta sa sulod sang isa ka libo ka tuig. Ang mga patay banhawon, dayon hukman sila kon bagay sila nga magkabuhi sing wala katapusan. Dugang pa, dulaon sang Ginharian ang balatian kag kamatayon.—Basaha ang Bugna 5:10; 20:6, 12; 21:4, 5.

Para sa dugang nga impormasyon, basaha ang pahina 23-25 kag 197-201 sini nga libro, Ano Gid ang Ginatudlo Sang Biblia?.