Longuka na Ndinga ya Nzambi

Keti Biblia Kebikulaka Makwisa?

Disolo yai kepesaka bamvutu na bangyufula yina ziku nge meyulaka mpi kemonisaka kisika nge lenda baka bamvutu na Biblia na nge. Bambangi ya Yehowa tasepela na kutadila bamvutu yango ti nge.

1. Keti bambikudulu ya Biblia kele ya sikisiki?

Kaka Nzambi Nkwa Ngolo Yonso muntu lenda zaba makwisa. (Amosi 3:7) Mumbandu, tuka ntama yandi tubilaka kukwisa ya Mesia to Kristu. Mesia tavanda mutekolo ya Abrahami muntu ya kwikama. Yandi tavanda ntwadisi yina tasala nde bantu ya bulemfu kuvanda ti luzingu mosi ya kukuka mpi ya kukonda maladi. (Kuyantika 22:18; Yezaya 53:4, 5) Mesia yai ya Lusilu tabutuka na Betelemi.​—Tanga Mishe 5:1.

Yezu vandaka Mesia yango. Biblia bikulaka bamvula kuluta nkama nsambwadi nde Mesia tabutuka na mwese mpi bantu mingi tamenga yandi. Yandi tapesa luzingu na yandi sambu na bantu mingi mpi bo tazika yandi kisika mosi ti bamvwama. (Yezaya 7:14; 53:3, 9, 12) Biblia bikulaka bamvula kuluta nkama tanu nde, Yezu takota na Yeruzalemi na zulu ya mpunda mpi nde bo tateka yandi na mbongo ya bibende 30. Mambu yina yonso lunganaka.​—Tanga Zakaria 9:9; 11:12.

2. Keti Nzambi kebikulaka badati?

Bamvula kuluta nkama tanu na ntwala, Biblia kubikulaka mvula yina Mesia zolaka kumonana. Biblia tubilaka bamvula yina yandi kwisaka bonso, bamposo ya bamvula disongidila nde konso “mposo” vandaka nsungi ya bamvula nsambwadi. Bamposo yango zolaka kuvanda 7 yika 62, na kimvuka bamposo 69 ya bamvula. Yo zolaka kuvanda bamvula 483. Bamvula yai yantikaka inki ntangu? Na kutadilaka Biblia, nsungi ya bamvula yina yantikaka ntangu Nehemia nsadi ya Nzambi kumaka na Yeruzalemi mpi yantikaka na kutunga dyaka mbanza yina. Masolo ya ntama ya insi Persia kemonisa nde bisalu ya kutunga yantikaka na mvu 455 N.T.B. (Nehemia 2:1-5) Yezu bakaka mbotika mpi kumaka Mesia na nima ya bamvula 483 disongidila na mvu 29 T.B, ntangu yina Biblia kubikulaka.​—Tanga Daniele 9:25.

  3. Keti bambikudulu ya Biblia kelungana bubu yai?

Yezu bikulaka nde mambu ya mpasi tasalama na bilumbu na beto. Mbikudulu na yandi tubilaka nsangu ya mbote ya Kimfumu ya Nzambi yina tanata ndembikilu na bantu yonso yina kezolaka Nzambi. Kimfumu yina tafwa ngidika yonso ya mbi ya beto kezinga.​—Tanga Matayo 24:14, 21, 22.

Bambikudulu ya Biblia ketubila mambu yonso yina tasalama na nsuka ya ngidika ya bima yai ya mbi. Biblia kumonisaka nde, na kuswaswana ti mutindu bantu fwete sala mambu na nsungi ya bamvula, bo tabebisa ntoto. Bampasi yina bitumba, nzala, kunikana ya ntoto mpi maladi kenataka takuma mingi. (Luka 21:11; Kusonga 11:18) Bantu tavanda dyaka ve ti bikalulu ya mbote. Na bilumbu yai ya mpasi, balongoki ya Yezu tasamuna nsangu ya mbote ya Kimfumu ya Nzambi na bansi yonso.​—Tanga Matayo 24:3, 7, 8; 2 Timoteo 3:1-5.

4. Makwisa ya bantu tavanda inki mutindu?

Nzambi Nkwa-Ngolo Yonso mebumbilaka bantu ya kwikama mambu ya mbote. Yezu Kristu Mesia, tatwadisa ntoto kumosi ti bapakulami tuka na zulu. Bo kesala Kimfumu yina tayala na nsungi ya bamvula funda mosi. Bafwa tafutumuka mpi tabaka dibaku ya kuzinga mvula na mvula. Dyaka, Kimfumu yai tabelula bantu yonso. Maladi mpi lufwa tavanda dyaka ve.​—Tanga Kusonga 5:10; 20:6, 12; 21:4, 5.

Sambu na kuzaba mambu mingi, tala balutiti 23-25 mpi 197-201 ya mukanda yai, Inki Biblia Kelongaka Mpenza?