Wĩrute Kuumana na Kiugo Kĩa Ngai

Hihi Bibilia nĩ Yarathĩte Ũhoro wa Mahinda Marĩa Maroka?

Gĩcunjĩ gĩkĩ kĩrĩ na ciũria hihi wanoria na nĩ kĩronania harĩa ũngĩona macokio ma ciũria icio thĩinĩ wa Bibilia yaku. Aira a Jehova no makenere kwarĩrĩria macokio macio hamwe nawe.

1. Hihi Bibilia nĩ ĩtaarĩirie morathi mayo cara rũkũ?

No Ngai Mwene Hinya Wothe ũngĩhota kũmenya maũndũ mothe megiĩ mahinda marĩa maroka. (Amosi 3:7) Kwa ngerekano-rĩ, kuuma o hĩndĩ ya tene nĩ aarathĩte ũhoro wa gũũka kwa Mesia, kana Kristo. Mesia angĩkoimana na rũciaro rwa mũthuri mwĩhokeku Iburahimu. Nĩwe ũngĩgaakorũo arĩ mũtongoria ũrĩa ũngĩgaateithia andũ athĩki magĩe rĩngĩ na irathimo cia muoyo mũkinyanĩru matarĩ na mĩrimũ. (Kĩambĩrĩria 22:18; Isaia 53:4, 5) Mesia ũcio Weranĩirũo angĩkoima itũũra-inĩ rĩa Bethilehemu.—Thoma Mika 5:2.

Jesu nĩwe watuĩkire Mesia. Makĩria ma mĩaka magana mũgwanja mbere, Bibilia nĩ yarathĩte atĩ Mesia angĩgaciarũo nĩ mũirĩtu thingi na nĩ angĩkanyũrũrio. Nĩ angĩkaaruta muoyo wake nĩ ũndũ wa mehia ma andũ aingĩ, na angĩgathikwo hamwe na itonga. (Isaia 7:14; 53:3, 9, 12) Ningĩ makĩria ma mĩaka magana matano mbere, Bibilia nĩ yarathĩte atĩ Mesia angĩkaingĩra Jerusalemu aikarĩire ndigiri na atĩ nĩ angĩgakunyanĩrũo nĩ ũndũ wa icunjĩ 30 cia betha. Maũndũ macio gũtirĩ o na ũmwe ũtaahingire.—Thoma Zekaria 9:9; 11:12.

2. Hihi Ngai nĩ arathĩte ũhoro wa mahinda?

Makĩria ma mĩaka magana matano mbere, Bibilia nĩ yarathĩte mwaka ũrĩa Mesia angĩaguũranĩirio. Mbere ya kũguũranĩrio gwake, mahinda nĩ maataragwo marĩ ciumia cia mĩaka, ũguo nĩ kuuga atĩ o “kiumia” kĩarũgamagĩrĩra mĩaka mũgwanja. Kũngĩarĩ na ciumia 7 ta icio kuongerera ingĩ 62, ciothe cikahinga ciumia 69 cia mĩaka. Ĩyo nĩ mĩaka 483. Mĩaka ĩyo yambĩrĩirie rĩ? Kũringana na Bibilia, mĩaka ĩyo yambĩrĩirie rĩrĩa Nehemia ndungata ya Ngai aakinyire Jerusalemu na akĩambĩrĩria gwaka rĩngĩ itũũra rĩu. Kũringana na historĩ ya Perisia, kwarĩ mwaka wa 455 M.M.M. (Nehemia 2:1-5) Jesu aabatithirio arĩ ta Mesia mĩaka 483 thutha ũcio, mwaka-inĩ wa 29 Mahinda Maitũ (M.M.), o ihinda rĩrĩa rĩarathĩtwo.—Thoma Danieli 9:25.

 3. Hihi morathi ma Bibilia nĩ marahinga?

Jesu nĩ aarathĩte atĩ nĩ kũrĩ maũndũ ma bata mangĩgakorũo magĩkĩka mahinda-inĩ maitũ. Ũrathi wake nĩ wagwetete ũhoro ũrĩa mwega wa Ũthamaki wa Ngai, Ũthamaki ũrĩa ũkaarehe ũhurũko thĩinĩ wa thĩ yothe kũrĩ andũ arĩa mendete Ngai. Ũthamaki ũcio nĩ ũkaaniina mũtabarĩre ũyũ wothe mũũru wa maũndũ.—Thoma Mathayo 24:14, 21, 22.

Morathi ma Bibilia nĩ mataaragĩria cara rũkũ ũrĩa mũtabarĩre ũyũ wa maũndũ ũgaathira. Bibilia nĩ yaguũrĩtie atĩ andũ mangĩgaakorũo makĩananga thĩ, ngũrani na ũrĩa kũngĩrĩgĩrĩrũo thĩinĩ wa mũtabarĩre ũyũ ũrĩ na ũthii wa na mbere. Mathĩna marĩa marehagwo nĩ mbaara, ũnyihu wa irio, ithingithia, na mĩrimũ mĩũru nĩ mangĩkongerereka. (Luka 21:11; Kũguũrĩrio 11:18) Mĩtugo nĩ ĩngĩgatororokia. Mahinda-inĩ maya maritũ, arũmĩrĩri a Jesu mangĩgakorũo makĩhunjia ũhoro ũrĩa mwega wa Ũthamaki wa Ngai ndũrĩrĩ-inĩ ciothe.—Thoma Mathayo 24:3, 7, 8; 2 Timotheo 3:1-5.

4. Mahinda marĩa maroka ma andũ magaakorũo matariĩ atĩa?

Ngai Mwene Hinya Wothe nĩ aigĩire andũ arĩa ehokeku maũndũ mega. Jesu Kristo, ũrĩa Mesia, marĩ hamwe na arĩa ake aamũre, marĩ igũrũ nĩ magaathamakaga thĩ. Acio nĩo thirikari ya Ũthamaki, ĩrĩa ĩgaathamaka mĩaka ngiri ĩmwe. Arĩa makuĩte nĩ makaariũkio maheo mweke wa gũcirithio nĩguo maheo muoyo wa tene na tene. Makĩria ma ũguo, Ũthamaki nĩ ũkaahonia arĩa othe magaakorũo muoyo. Mĩrimũ na ikuũ itigaakorũo kuo rĩngĩ.—Thoma Kũguũrĩrio 5:10; 20:6, 12; 21:4, 5.

Nĩgetha wone ũhoro makĩria, rora karatathi ka 23-25 na ka 197-201 thĩinĩ wa ibuku rĩrĩ rĩonanĩtio haha Bibilia Ĩrutanaga Atĩa Kũna?