Di Longe o Mak’â Nzambi

O Kuila o Bibidia i Xinda o Hádia?

O mbandu íii, ia-nda tambuijila o ibhuidisu iê, ia-nda kulondekesa se kuebhi ku u tena ku sanga o itambuijilu mu Bibidia iê. O Jimbangi ja Jihova, a mesena kiavulu ku di longa o itambuijilu íii n’ie.

1. O kuila o ikanenu ia Bibidia ia kidi?

O Nzambi Muteni-ia-Ioso, muéne ngó u tena kuzuela ihi ia-nda bhita ku hádia. (Amoji 3:7) Mu kifika, tundé ku dimatekenu muéne ua kanena kuila kueji kuíza muthu eji mu ixana mu dijina dia Mexiia, mba Kristu. Muéne ueji kala mbutu ia diiala dia kixikanu, Mbalahamu. Ueji kala nguvulu ueji bhangesa o athu mu ixi ku tambula o mabesá a ku kala ni muenhu ua iuka sé ku kata. (Dimatekenu 22:18; Izaia 53:4, 5) O Muthu a mu Kanena ueji tunda mu Beleme.—Tanga Mikeia 5:2.

Jezú ua londekesa kuila muéne o Mexiia. Mu ku bhita 700 a mivu, ndenge, o Bibidia ia kanene kiá kuila, o Mexiia eji mu vuala ku muhatu muzeletete, ni kuila athu keji mu xikina. Muéne ueji bhana o muenhu uê phala ku futa o kituxi kia athu, ni ku mu funda mu mbila ia jimvuama. (Izaia 7:14; 53:3, 9, 12) O Bibidia ia kanene ué kuila mu ku bhita 500 a mivu, ndenge, muéne ueji bokona mu Jeluzaleme ku thandu a bulu, ni kuila eji mu sumbisa mu 30 a phalata. O ikanenu ioso ia lungu ni muéne ia dikumbidila.—Tanga Zakadiia 9:9; 11:12.

2. O kuila Nzambi ua xindi o jithembu?

Kua bhitile kiá 500 ja mivu, tundé kia kanena o Bibidia o muvu ueji moneka o Mexiia. O thembu ieji bhixila, a i kondala mu jisemana ja mivu, ilombolola kuila, kala “semana,” ia tenene sambuadi dia mivu. Kueji kala 7 dia jisemana, se tu bandekesa-ku dingi 62 a jisemana, ieji tenesa 69 a jisemana ja mivu. I tenesa 483 a mivu. O ji konda jiji ja mateka thembu kuxi? Kála ki tanga o Bibidia, o thembu íii ia mateka kioso o selevende ia Nzambi, Nehemiia kia tula mu Jeluzaleme, iu ua mateka ku tunga dingi o mbanza. O musoso ua Pélesa ulondekesa kuila kiki kia bhiti ku muvu ua 455 A. K. K. (Nehemiia 2:1-5) Jezú a mu batizala, iu ua kituka Mexiia ku muvu ua 483 a mivu, ku pholo ku muvu ua 29 K.K.—Tanga Daniiele 9:25.

  3. O kuila o ikanenu ia Bibidia ia mu dikumbidila?

Jezú ua kanene izulukutu iavulu ieji bhita mu thembu ietu. Mu ikanenu iê, muéne ua kanena o njimbu iambote ia Utuminu ua Nzambi, ueji bheka ku tululuka ku athu a zola Nzambi. O Utuminu ua Nzambi ua-nda bheka o dizubhilu dia mundu iú ua iibha.—Tanga Matesu 24:14, 21, 22.

O ikanenu ia Bibidia izuela ia lungu ni dizubhilu dia mundu iú ua iibha. O Bibidia ilondekesa kuila, mu veji dia athu ku kala ni ukexilu ua tululuka, ene eji zanga o ixi. O mavuua ene mu bheka o ita, o nzala, o itungutu ia ixi, ni mauhaxi eji dimendala dingi. (Luka 21:11; Dijingunuinu 11:18) Athu keji belesela dingi o itumu. Mu jithembu jiji ja bhonzo, o akaiedi a Jezú eji boka o Utuminu ua Nzambi mu jixi joso.—Tanga Matesu 24:3, 7, 8; 2 Timote 3:1-5.

4. Ihi ia-nda bhita ni athu ku hádia?

O Nzambi Muteni-ia-Ioso, ua bhake ima iambote phala o athu oso a belesela. Jezú Kristu, o Mexiia, ni akunji’ê, a-nda tumina mu ixi. Ene a-nda kala mu Utuminu ua-nda nangenena midi ia mivu. O athu afú kiá, a-nda ku a fukununa, a-nda ku a fundisa phala ku kala ni muenhu ua kalelaku. O Utuminu ua-nda saka athu oso. O mauhaxi ni kalunga, ka-nda kala-ku dingi.—Tanga Dijingunuinu 5:10; 20:6, 12; 21:4, 5.

Phala kuijiia dingi, tanga o jimbandu ja 23-25, ni jimbandu ja 197-201 ja divulu didi. Mu Kidi Ihi i Longa o Bibidia?