Longoka Muna Nkand’a Nzambi

Nga Nkand’a Nzambi Uzayisanga oma ma Kusentu?

Elongi diadi dina ye yuvu ina olenda kiyuvula ye disonga vana olenda sololwela e mvutu za yuvu yayi muna Nkand’a Nzambi. Mbangi za Yave bena ye kiese kia kusasila e mvutu zazi.

1. Ungunza wa Nkand’a Nzambi nga wasikididi?

Nzambi wa Mpungu-ngolo kaka olenda zayisa mambu masikididi mebwa kuna sentu. (Amose 3:7) Kasikil’owu, tuka lubantiku wazayisa e ngiz’a ndiona oyikilwa vo Masia yovo Kristu. Masia mu luvila lwa Abarayama wa nkwa kwikizi kewutukila. Yandi i ntinu osinga vana alembami elau dia vwa zingu kialunga, kiakondwa mayela. (Etuku 22:18; Yesaya 53:4, 5) Masia wasilwa nsilu mu mbanza Beteleme kewutukila.—Tanga Mika 5:2.

Yesu i Masia wasilwa nsilu. Vitila nkama nsambwadi za mvu, Nkand’a Nzambi wasakula vo Masia owutwa kwa mwenze, i bosi osinga vezwa. Ovana moyo andi se kimenga mu kuma kia masumu ma wantu ayingi, ozikwa vamosi y’amvwama. (Yesaya 7:14; 53:3, 9, 12) Vitila nkama tanu za mvu, Nkand’a Nzambi wasakula mpe vo Yesu va ntandu ebuluku kekotela muna Yerusaleme yo yekolwa mu 30 ma palata. Ungunza wau wawonso walungana kikilu.—Tanga Zakariya 9:9; 11:12.

2. Nga Nzambi lumbu yasikididi kayika?

Vitila nkama tanu za mvu, Nkand’a Nzambi wayika mvu wasikididi una Yesu kekituka se Masia. Una Yesu kawutukidi ko, e ntangwa mu tumingu twa mvu yatangilwanga, i sia vo, konso “lumingu” mvu nsambwadi lwazingilanga. Vafwete vioka tumingu 7 ye tumingu 62, i sia vo, tumingu 69 twa mvu, disongele vo mvu 483. Nkia ntangwa kiayantika ekolo kiaki? Nkand’a Nzambi usonganga vo ekolo kiaki kiayantika vava Nekemiya kalwaka muna Yerusaleme yo yantika tungulula e mbanza yayi. Lusansu lwa Aparasi lusonganga vo ekolo kiaki mu mvu wa 455 Vitila Tandu Kieto kiayantika. (Nekemiya 2:1-5) Yesu wavubwa yo kituka se Masia una vavioka mvu 483, i sia vo, muna mvu wa 29 wa Tandu Kieto, muna mvu kikilu wasakulwa.—Tanga Daniele 9:25.

  3. Nga vena ye ungunza wa Nkand’a Nzambi ulungananga o unu?

Yesu wasakula mambu manene mevangama mu lumbu yeto. Ungunza wandi wayika nsangu zambote za Kintinu kia Nzambi ezi zivuvika ntima mia wantu awonso bezolanga Nzambi. Kintinu kiaki kifwasa e nza yayi yambi tuzingilanga.—Tanga Matai 24:14, 21, 22.

Ungunza wa Nkand’a Nzambi usonganga mu mpila yasikididi una usukila e nza ya tandu kiaki. Nkand’a Nzambi wasakula vo vana fulu kia vingila vo mambu masikila mu tandu kiaki kina vo e ngangu za nza mu wokela kaka zina, o wantu beyivisa ntoto. E mpasi mu kuma kia vita, mvengele, nzakama za ntoto ye mayela ziwokela. (Luka 21:11; Lusengomono 11:18) Wantu ke bekala diaka ye fu yambote ko. Mu lumbu yayi yampasi, alandi a Yesu besamuna nsangu zambote za Kintinu kia Nzambi muna zula yawonso.—Tanga Matai 24:3, 7, 8; 2 Timoteo 3:1-5.

4. Nkia mpila zingu bekala kiau o wantu?

Nzambi wa Mpungu-ngolo mambu mayingi mambote kesinga vanga mu kuma kia selo yandi yakwikizi. Yesu Kristu wa Masia, kumosi y’awana basolwa, beyala e nza. Tuka kun’ezulu, bekala muna Kintinu eki kiyala mu kolo ki’ezunda dia mvu. Mafwa mesinga fulwa yo vewa elau dia vwa moyo a mvu ya mvu. Vana ntandu, Kintinu kisukisa mpasi zawonso bemonanga o wantu ova ntoto. Mayela ye lufwa ke lukala diaka ko.—Tanga Lusengomono 5:10; 20:6, 12; 21:4, 5.

Muna zaya mambu makaka, tala muna lukaya lwa 23-25 ye 197-201 lwa nkanda wau una va ndambu. O Nkand’a Nzambi Adieyi Kieleka Kelonganga?