Pathian Thu Aṭangin Inzir Rawh

Bible-in Hma Lam Hun Tûr A Hrilh Lâwk Em?

He thuziak hian i lo ngaihtuah mai theih zawhnate zâwtin, i Bible-a a chhânna i hmuh theihna laite a târ lang a. Jehova Thuhretute chuan chûng chhânnate sawipui che chu an châk hle a ni.

1. Bible hrilh lâwknate chu a chipchiar em?

Pathian Engkimtitheia chauhvin hma lam hun chu akip akawiin a hmu lâwk thei a. (Amosa 3:7) Entîr nân, hmân lai aṭang tawhin Messia, a nih loh leh Krista tia koh tuemaw lo lan tûr thu a sawi lâwk a. Chu Messia chu mi rinawm Abrahama thlah aṭanga lo chhuak tûr a ni. Ani chu thuâwih mihringte hnêna natna awm tawh lohna nun ṭha famkima malsâwmna neihtîr leh theitu tûr rorêltu a ni ang. (Genesis 22:18; Isaia 53:4, 5) Chu Thutiama chu Bethlehem khua aṭanga lo chhuak tûr a ni.—Mika 5:2 chhiar rawh.

Chu Messia chu Isua hi a ni a. A hma kum 700 aia tamah Bible chuan Messia chu nula thianghlim hrin a nih tûr thu leh mite hmusit a nih tûr thu te, mi tam tak sualna aia a nun a pêk tûr thu leh mi hausa bula phûm a nih tûr thute a lo sawi lâwk tawh a. (Isaia 7:14; 53:3, 9, 12) A hma kum 500 aia tamah sabengtung chunga chuanga Jerusalem-a a luh tûr thu leh tangka 30 leka hralh a nih tûr thu pawh a sawi lâwk bawk. Chûngte chu akip akawiin a thleng famkim vek a ni.—Zakaria 9:9; 11:12 chhiar rawh.

2. Pathian chuan thil lo thlen hun leh nî tûrte chu a sawi lâwk em?

A hma kum 500 chuangah Bible chuan Messia lo lan tûr kum chiah chu a sawi lâwk a. A lo lan hun tûr chu kum hapta anga chhût a ni a, “hapta” tin chu kum sarih zêla rei a ni. Chûng hapta 7 leh 62 belh khâwm chu kum hapta 69 chiah a ni a. Chu chu kum 483 nên a intluk chiah a ni. Chu mi kum reizâwng chu engtik aṭangin nge a inṭan? Bible sawi dân chuan, Pathian chhiahhlawh Nehemia Jerusalem-a a lo thlen a, khawpui a sak ṭhat ṭan leh aṭang khân a inṭan a. Persia chanchin ziakna chuan chu mi kum chu B.C.E. 455-na niin a sawi a ni. (Nehemia 2:1-5) Chu mi hnu kum 483-na, C.E. 29 chuan Isua’n Messia angin baptisma a chang ta chiah a ni.—Daniela 9:25 chhiar rawh.

 3. Bible hrilh lâwknate tûnah a thleng famkim mêk em?

Isua chuan kan hun laia thil thleng tûr pawimawh takte a sawi lâwk a. Chutah chuan Pathian hmangaihtute tâna khawvêl puma thawvenna thlentu tûr Pathian Lalram chungchâng a sawi a ni. Chu Lalram chuan kan chênna khawvêl kal hmang suaksual zawng zawng hi a rawn titâwp vek ang.—Matthaia 24:14, 21, 22 chhiar rawh.

Bible chuan he khawvêl kalhmang tâwpna chungchâng chu chipchiar takin a sawi lâwk a. Khawvêl hian hma a sâwn zêl ang tih rinna nêna inkalh takin mite’n lei hi an tichhe zâwk ang tih Bible chuan a sawi lâwk a ni. Indona avâng te, ṭâm avâng te, lirnghîng avâng te, leh hrilêng avângtea lungngaihna a pung ang a. (Luka 21:11; Thu Puan 11:18) Nungchang tehna pawh a tla hniam bawk ang. Tin, hêng hun khirh takahte hian Isua hnungzuitute chuan hnam zawng zawng hnênah Pathian ram chanchin ṭha an hrilh ang.—Matthaia 24:3, 7, 8; 2 Timothea 3:1-5 chhiar rawh.

4. Mihringte hma lam hun tûr chu eng nge ni?

Pathian Engkimtitheia chuan mi rinawmte hnênah thil ṭha tam tak a pe dâwn a. Isua Krista, Messia leh a mi thlante chuan vân aṭangin lei chungah ro an rêl ang. Anni chuan Lalram sawrkârna an din ang a, kum sângkhat chhûng ro an rêl ang. Mitthite pawh an lo nung leh ang a, chatuana nung tlâk an nih leh nih loh fiah theihna hun ṭha pêk an ni ang. Chu bâkah, Lalram chuan chuta mite natna zawng zawng a tidam tawh ang a, natna leh thihna a awm leh tawh lo vang.—Thu Puan 5:10; 20:6, 12; 21:4, 5 chhiar rawh. (w12-E 01/01)

Hriat tam lehzual nân Bible Zirtîrna Dik Tak Chu Eng Nge Ni? tih lehkhabu phêk 23-25-na leh phêk 197-201-na hi en ang che.