Tyäˈädë artikulo yëˈë mbudëkëyanëp ets mä mBiiblyë xypyäädët wiˈix yaˈˈatsoojëmbity tijaty mnayajtëëjëp. Ets Pën mtsojkënyëˈajtypy mbäät mëdë Jyobaa tyestiigë xyˈëxpëktë.

1. Yajnaskäjpxë wiˈix meerë tyunäˈäny jyatäˈänyëty

Dios diˈib myëdäjtypy tukëˈëyë mëjää, yëˈëyë naytyuˈuk nyijäˈäp tijaty tunan jatanëp (Amós 3:7). Extëm nˈokpëjtakëm, näämnëmë nety dyajkojˈyë naxwinyëdë jäˈäy ko ojts tnigajpxy jyäˈtäˈänyë Mesías o Kristë diˈib minäämp mä Abrahángë tyëëm yˈääts. Ets ko yëˈë yˈanaˈamaambyë naxwinyëdë jäˈäy diˈib yajjëmbitaampy wäˈäts ets dyajjëgaˈagäˈänyë yuu päˈäm (Génesis 22:18; Isaías 53:4, 5). Dios nan ojts jyënaˈany ko ja Mesías myaxuˈunkˈatäˈäny Belén. (Käjpxë Miqueas 5:2.)

Ja nety tyëgoyˈaty 700 jëmëjt parë Mesías jyäˈtët, ko mä Biiblyë ojts yajnaskäjpxë yajmaxuˈunkˈatäˈänyëty tuˈugë kiixy diˈib kyajnëm tsyëënë mëdë yetyëjk, ko yaˈˈaxëkˈixäˈäny, ko tkuˈoogëyaˈany ja poky kaytyey ets ko nyaxtëkëyaˈany mä mëkjäˈäytyëjk nyaxtëkëdë (Isaías 7:14; 53:3, 9, 12). Ets ja nety tyëgoyˈaty 500 jëmëjt naxy, ko ojts yajnaskäjpxë tyëkëyaˈany Jerusalén burrëkëjxy ets ko yajtoogäˈäny mët 30 platë meeny. Tukëˈëyë yˈadëdääy extëm meerë ojts yajnaskäjpxë. (Käjpxë Zacarías 9:9 etsë 11:12.)

2. ¿Nyaskäjpxëbë Dios näˈä meerë ti tyunäˈäny jyatäˈänyëty?

Ja nety tyëgoyˈaty 500 jëmëjt naxy, ko mä Biiblyë ojts yajnaskäjpxë ti jëmëjt jyäˈtäˈäny ja Mesías. Ja tiempë diˈibë nety naxäämp, sëmäänˈam ojts yajmaytyaˈaky, diˈib jëmbijt jëmëjtˈam. Tuˈukpë “sëmään”, ja tˈandijy jëxtujk jëmëjt. Ets ja ojts yajnaskäjpxë ko nyaxäˈäny jëxtujk sëmään ets ja 62 sëmään, diˈib yaˈˈawijtsmujkp 69 sëmään o 483 jëmëjt. ¿Desde näˈä ojts yajmaytsyootsondaˈaky? Biiblyë jyënaˈany ko jaa mä ja Dios mëduumbë Nehemías jyajty Jerusalén ets ojts tˈagojë ja käjpn. Ets extëm yajnimaytyaˈaky diˈib tuun jäjtë Persia, ja kyaˈay mä jëmëjt 455 mä kyajnëm myinyë Jesus (Nehemías 2:1-5). Jesus ja nyëbejty ko nety të nyaxy 483 jëmëjt, mä ja jëmëjt 29. ¡Meerë extëmë nety të yaˈˈagajpxy! (Käjpxë Daniel 9:25.)

  3. ¿Ja tyam yˈadëy tijaty ojts yajnaskäjpxë?

Jesus ojts tnaskäjpxë tijaty tunan jatanëp mä tyäˈädë tiempë. Ko yajkäjpxwäˈkxäˈäny ja oybyë ayuk diˈib nyimaytyakypy ja Anaˈam Kutujkën, parë yajjotkujkmoˈoyët pënaty tsyojktëbë Dios. Tyäˈädë Anaˈamën yëˈë diˈib yajjëjptëgoyaambyë tyäˈädë axëëkpë jukyˈäjtën. (Käjpxë Matewʉ 24:14, 21, 22.)

Tijaty ojts yajnaskäjpxë mä Biiblyë, yajxon tnimaytyaˈaky tijaty tunan jatanëp mä kyajnëm myiny ja kutëgoˈoyën. Biiblyë nyigajpxypy ko jäˈäy niˈigyë dyajwindëgoyäˈändë Naxwinyëdë oy tjamëdattë madakën parë dyaˈoyëdët. Myëjwindëkëyaˈanyë ayoˈon mët ko jäˈäy tsyiptundë, yˈamääytyëkëyaˈanyë käˈäy ukën, nyaxäˈänyë mëk ujx ets jyaˈˈatäˈänyë mëk päˈäm (Lukʉs 21:11; Diˈibʉ Jatanʉp [Apocalipsis] 11:18). Nan ojts yajnaskäjpxë ko jäˈäy kyaj wintsëˈkën myëët nyekyjyukyˈatäˈändë. Ets ko pënaty pyanëjkxtëbë Jesus, kyäjpxwäˈkxandëp abëtsemy nyaxwinyëdë ja oybyë ayuk diˈib nyimaytyakypy ja Anaˈamën. (Käjpxë Matewʉ 24:3, 7, 8; 2 Timotee 3:1-5.)

4. ¿Ti mbäät tˈawix tjëjpˈixtë naxwinyëdë jäˈäy?

Jyobaa Dios të ttuknibëjtäägë ko mëjwiin kajaa tkunuˈkxäˈäny pënaty mëdoodëp. Mä ja Anaˈam Kutujkën, yajpäädäˈänyë Jesukristë mët tuk grupë jäˈäy diˈib të yajwinˈixtë ets tˈanaˈamäˈändë Naxwinyëdë tuk mil jëmëjt. Ta jyukypyëkäˈändë oˈkpë ets yaˈixët pën nitëjkëdëp ja jukyˈäjtënë winë xëëbë. Niˈamukë jäˈäy yˈagëdäˈägäˈäny, pesë päˈäm etsë oˈkën kyaj nyekyjaˈˈatäˈäny. (Käjpxë Diˈibʉ Jatanʉp 5:10; 20:6, 12; 21:4, 5.)

Pën mˈaknijawëyaampy, ix mä pajina 23-25 etsë 197-201 mä tyäˈädë liibrë, ¿Ti tëyˈäjtën jantsy tukniˈijxëbë Biiblyë?