Katak Jãn Naan In Anij

Baibõl̦ eo Ej Ke Kwal̦o̦k kõn Ta ko Renaaj Wal̦o̦k ilo Raan ko Im̦aan?

Katak in ej uwaake jet kajjitõk ko me bõlen ekkã am̦ kajjitõk kaki. Im ej kwal̦o̦k eoon ko kwõmaroñ lo uwaak in kajjitõk kein ie ilo Baibõl̦ eo am̦. Ri Kõnnaan ro an Jeova renaaj lukkuun m̦õn̦õn̦õ in kõmel̦el̦eik uwaak kein ñan eok.

1. Kanaan ko ilo Baibõl̦ rej ke kwal̦o̦k tipdikin men ko me renaaj wal̦o̦k?

Anij eo Ekajoor Bõtata wõt emaroñ loe ta ko renaaj wal̦o̦k ilo raan ko rej pãd im̦aan. (Amos 3:7) Ñan waanjoñak, jãn iien ko jinoin ear kanaan kõn juon armej me enaaj itok, etan ej Messaia, ak Kũraij. Messaia in enaaj itok jãn bwijjin em̦m̦aan eo etiljek Ebream. Im enaaj ri tõl eo me enaaj kõm̦m̦an bwe armej ro me rej pokake ren bar bõk juon mour eweeppãn im ejjel̦o̦k nañinmej. (Jenesis 22:18; Aiseia 53:4, 5) Im armej in me kar kallim̦ur kake enaaj kar itok jãn jikin eo etan Betleem.​—Riit Maika 5:2.

Ear alikkar bwe Jijej ej Messaia eo. Elõñl̦o̦k jãn 700 iiõ ko m̦oktal̦o̦k, Baibõl̦ eo ear kanaan bwe Messaia eo enaaj l̦otak jãn juon kõrã bõjin, im armej ro renaaj kõjdate. Enaaj mej kõn jerawiwi ko an armej otemjej im enaaj kallib ilo lõb ko an ro rem̦weiie. (Aiseia 7:14; 53:3, 9, 12) Bareinwõt, Baibõl̦ eo ear kanaan elõñl̦o̦k jãn 500 iiõ ko m̦oktal̦o̦k bwe enaaj uwe ioon juon to̦o̦ñke im del̦o̦ñe Jerusalem. Im ear bar kanaan bwe renaaj ketak e kõn 30 m̦õttan jelba. Aolep tipdikin kanaan kein rar jejjet im wal̦o̦k.​—Riit Zekaraia 9:9; 11:12.

2. Anij ej ke kwal̦o̦k ñããt eo kanaan ko renaaj wal̦o̦k?

Elõñl̦o̦k jãn 500 iiõ ko m̦oktal̦o̦k, Baibõl̦ eo ear kanaan kõn ñããt eo enaaj wal̦o̦k Messaia eo. Joñan aitokõn an naaj armej ro kõttar ñan iien eo enaaj itok Messaia eo ej 49 iiõ im 434 iiõ ko. Ñe jej kobaiki nõmba kein ippãn doon, enaaj wal̦o̦k 483 iiõ ko. Ñããt eo iien in ear jinoe? Ekkar ñan Baibõl̦ eo, ear wal̦o̦k ilo iien eo ri karejar eo an Anij Nihimaia ear tõkãkl̦o̦k ilo Jerusalem im jino kalõk jikin eo. Ilo bwebwenato ko an Ri Põrsia kõn iien ko etto, ej kalikkar bwe iien in kar iiõ eo 455 m̦okta jãn Kũraij. (Nihimaia 2:1-5) Im 483 iiõ tokãlik, Jijej ear peptaij ãinwõt Messaia eo, im iien in ear jejjet im wal̦o̦k ilo iiõ eo 29.​—Riit Daniel 9:25, UBS.

  3. Kanaan ko ilo Baibõl̦ eo rej ke jejjet kitieer kiiõ?

Jijej ear kanaan kõn men ko raorõk im renaaj wal̦o̦k ilo iien kein ad. Ear kwal̦o̦k kõn nuuj eo em̦m̦an kõn Aelõñ in Anij me enaaj bõktok jeraam̦m̦an ko ñan armej ro otemjej ipel̦aakin lal̦ me rej yokwe Anij. Aelõñ in an Anij enaaj kajem̦l̦o̦k aolep men ko renana ilo jukjuk im pãd in jej jokwe ie.​—Riit Matu 24:14, 21, 22.

Kanaan ko ilo Baibõl̦ eo rej kwal̦o̦k ilo tipdik kõn ta ko renaaj wal̦o̦k ilo jem̦l̦o̦kinl̦o̦k jukjuk im pãd in. Armej ro rej ba bwe ewõr men ko rem̦m̦anl̦o̦k im tõprak ko ilo raan kein, bõtab Baibõl̦ eo ej ba bwe armej ro renaaj ko̦kkure lal̦ in. Jorrããn ko me rej itok jãn tarin̦ae, ñũta, m̦akũtkũt lal̦, im nañinmej ko rel̦l̦ap renaaj l̦apl̦o̦k wõt. (Luk 21:11; Revelesõn 11:18) Enaaj lukkuun nanal̦o̦k m̦wilin armej. Ilo iien kein relukkuun renana, rũkal̦oor ro an Jijej renaaj kwal̦o̦k kõn nuuj eo em̦m̦an kõn Aelõñ in Anij ilo aelõñ otemjej.​—Riit Matu 24:3, 7, 8; 2 Timote 3:1-5.

4. Ta eo enaaj wal̦o̦k ñan armej ilo raan ko rej pãd im̦aan?

Ewõr men ko rem̦m̦an jãn Anij eo Ekajoor Bõtata ñan armej ro rej tiljek ñan e. Jijej Kũraij ak Messaia eo, im ro em̦õj an kããlõt er renaaj pãd ilañ im tõl armej ro me renaaj mour ijin ioon lal̦ in. Renaaj irooj ilo Aelõñ eo ak kien eo ium̦win 1,000 iiõ ko. Ro rar mej renaaj bar mour im renaaj katak ñan aer maroñ bõk jeraam̦m̦an eo ñan mour indeeo. Bareinwõt, ilo Aelõñ in me armej ro renaaj mour ium̦win enaaj kejmour aolep ro im renaaj mour ilo iien in. Mej enaaj jako im enaaj ejjel̦o̦k bar nañinmej.​—Riit Revelesõn 5:10; 20:6, 12; 21:4, 5.

Ñan lo mel̦el̦e ko jet, jouj im lale bok eo me taitõl̦ in ej wal̦o̦k tuanmoon, Ta Eo Baibel Ej Lukkun Katakin? ilo peij 23-25 im 197-201.