Funda Elizwini Lakazimu

IBhayibhili Ilibikezela Kusesengaphambili Ikusasa Na?

Isihlokwesi siphakamisa iimbuzo okungenzeka ukhe wazibuza yona bese sitjengisa lapho ungafumana khona iimpendulo eBhayibhilinakho. AboFakazi BakaJehova bazokuthabela ukucoca nawe ngeempendulwezi.

1. Iimporofido zeBhayibhili zinembile?

NguZimu uMninimandla woke kwaphela ongakwazi ukubona ikusasa ngokupheleleko kusesengaphambili. (Amosi 3:7) Isibonelo, kusukela esikhathini esadlulako, wabikezela ukufika kwaloyo obizwa bona nguMesiya namtjhana uKrestu. UMesiya bekazokuba sizukulwana sendoda ethembekileko u-Abrahama. Bekazokuba mbusi ozokwenza kukghoneke ngabantu abathembekileko bona bafumane iimbusiso zokuphila okupheleleko okunganakho ukugula. (Genesisi 22:18; Isaya 53:4, 5) OThenjisiweko lo gade azokuvela eBethlehema.—Funda uMika 5:2.

UJesu wazibonakalisa anguMesiya. Ngaphezu kweemnyaka ema-700 kusesengaphambili, iBhayibhili yabikezela bona uMesiya uzokubelethwa yintombi begodu uzokudelelwa. Uzokunikela ngokuphila kwakhe ngebanga lezono zabanengi, begodu uzokubulungwa neenjinga. (Isaya 7:14; 53:3, 9, 12) IBhayibhili godu yabikezela ngaphezu kweemnyaka emakhulu amahlanu ngaphambili bona uzokungena eJerusalema akhwele udumbana nokobana uzokukghatjhelwa ngeempaparwana zesiliva ezima-30. Yoke imininingwana leyo yazaliseka.—Funda uZakariya 9:9; 11:12.

2. UZimu uzibikezela kusesengaphambili na iinkhathi zezenzakalo?

Ngaphezu kweemnyaka emakhulu amahlanu kusesengaphambili, iBhayibhili yabikezela umnyaka onqophileko wokuvela kwakaMesiya. Isikhathi esingaphambi kokufika kwakhe samedwa ngeemveke zeemnyaka, okutjho bona “iveke” ngayinye beyiyimnyaka elikhomba ubude. Bekuzokuba ngu-7 ahlanganiswe neemveke ezinjalo ezima-62, okwenza iimveke zeemnyaka ezima-69. Lokhu kulingana neemnyaka ema-483. Isikhathi seemnyaka le sathoma nini? NgokweBhayibhili, isikhatheso sathoma lokha inceku kaZimu uNehemiya neyifika eJerusalema begodu ithoma ukwakha umuzi kabutjha. Umlando wePheresiya utjengisa bona umnyaka loyo bekungu-455 B.C.E. (Nehemiya 2:1-5) UJesu wabhabhadiswa njengoMesiya eemnyakeni eyi-483 ngemva kwalokho, ngomnyaka ka-29 C.E., ngaso isikhathi esabikezelwako.—Funda uDanyela 9:25.

  3. Iimporofido zeBhayibhili ziyazaliseka njenganje?

UJesu waporofida ngezenzakalo eziqakathekileko ezizokwenzeka esikhathini sethu. Isiporofido sakhe sakhuluma ngeendaba ezimnandi zoMbuso kaZimu, ozokuletha itjhaphuluko yephasi mazombe ebantwini abathanda uZimu. UMbuso lo uzokuletha isiphelo kilo loke iphasi lakaSathana elimbeli esiphila kilo.—Funda uMatewu 24:14, 21, 22.

Iimporofido zeBhayibhili ziyihlathulula ngokupheleleko imininingwana yesikhathi sokuphela kwephasi lakaSathaneli. IBhayibhili iveza bona ngokuphambene nalokho okulindelekileko esikhathini setuthukwesi, abantu bazokutjhabalalisa iphasi. Ukugandeleleka okubangelwa yizipi, ukutlhayela kokudla, ukusikinyeka kwephasi nokurhatjheka kwamalwelwe kuzokwanda. (Luka 21:11; ISambulo 11:18) Abantu angekhe basaziphatha kuhle. Esikhathini esibudisesi, abalandeli bakaJesu bazokutjhumayela iindaba ezimnandi zoMbuso kaZimu kizo zoke iintjhaba.—Funda uMatewu 24:3, 7, 8; 2 KuThimothi 3:1-5.

4. Lizokuba njani ikusasa lesintu?

UZimu uMninimandla woke ubabekele izinto ezihle abantu abathembekileko. UJesu Krestu, uMesiya, kunye nabakhethiweko bakhe, bazokubusa iphasi basezulwini. Bakha urhulumende wezulwini, ozokubusa iimnyaka eyikulungwana. Abafileko bazokuvuswa begodu bazokuba nethuba lokwahlulelwa bona bayakufanelekela na ukuphila okungapheliko. Ngaphezu kwalokho, uMbuso lo uzokulapha boke ezabe baphila ngesikhatheso. Ukugula nokufa angekhe kusaba khona.—Funda ISambulo 5:10; 20:6, 12; 21:4, 5.

Bona ufumane imininingwana engeziweko, qala amakhasi 23-25 namakhasi 197-201 sencwadi le Khuyini Kwamambala Okufundiswa YiBhayibhili?, etjengiswe la.