E artíkulo akí ta trata algun pregunta ku kisas bo tin i ta mustra bo unda pa haña e kontestanan den bo Beibel. Si bo ta deseá, Testigunan di Yehova gustosamente lo trata e preguntanan akí ku bo.

1. Beibel su profesianan ta duna detaye spesífiko?

Ta e Dios Todopoderoso so por profetisá en detaye kiko lo sosodé den futuro. (Ámos 3:7) Por ehèmpel, hopi tempu pasá, Dios a profetisá ku e Mesías, òf Kristu, lo a bini na tera i ku lo e tabata desendiente di e hòmber fiel Abraham. E Mesías lo a bira gobernante i, bou di su mando, hende obediente lo bira perfekto atrobe i lo no tin malesa mas. (Génesis 22:18; Isaías 53:4, 5) Dios a profetisá tambe ku e Mesías Primintí lo a nase na Bètlehèm.—Lesa Mikéas 5:2.

Hesus a resultá di ta e Mesías. Mas ku shete siglo adelantá, Beibel a profetisá ku e Mesías lo a nase di un bírgen i ku hende lo a despresi’é. Beibel a bisa tambe ku lo el a duna su bida pa hende por haña pordon di piká, i ku lo el a ser derá huntu ku hende riku. (Isaías 7:14; 53:3, 9, 12) Ademas, mas ku sinku siglo adelantá, Beibel a bisa ku lo el a drenta Herúsalèm riba un buriku i ku nan lo a traishon’é pa 30 pida di plata. Tur esakinan a kumpli en detaye.—Lesa Zakarías 9:9; 11:12.

2. Dios ta profetisá fecha eksakto?

Mas ku sinku siglo adelantá, Beibel a bisa presis na ki aña e Mesías lo a presentá. El a mustra ku e periodo ku ta hiba na yegada di e Mesías lo tabata 69 siman, esta 7 plùs 62 siman. E simannan akí ta simannan di aña; ku otro palabra, kada “siman” ta shete aña. Pues, si nos multipliká e 69 simannan ei ku 7, nos ta yega na un periodo di 483 aña. Awor, na ki tempu e periodo ei a kuminsá? Segun Beibel, el a kuminsá ora Nehemías, Dios su sirbidó, a yega Herúsalèm i a kuminsá rekonstruí e stat. I historia di Persia ta indiká ku e konstrukshon akí a kuminsá na aña 455 promé ku nos era. (Nehemías 2:1-5) Anto presis 483 aña despues, esta na aña 29 di nos era, Hesus a ser batisá i a bira e Mesías.—Lesa Daniel 9:25.

  3. Tin profesia di Beibel ku ta kumpli den nos tempu?

Hesus a profetisá susesonan grandi ku lo tuma lugá den nos tempu. El a profetisá tokante e bon notisia di e Reino di Dios ku lo trese alivio pa hende ku stima Dios. I e Reino ei lo pone un fin na e mundu malbado akí.—Lesa Mateo 24:14, 21 i 22.

Beibel ta profetisá en detaye loke lo sosodé den e último dianan di e era akí. Kontrali na loke hende ta spera di un era di asina tantu desaroyo, Beibel ta profetisá ku hende lo destruí e Planeta Tera. Angustia kousá pa guera, temblor, malesa i skarsedat di kuminda lo oumentá. (Lukas 21:11; Revelashon 11:18) Normanan moral lo bai atras drástikamente. Den e tempu difísil akí, Hesus su siguidónan lo prediká e bon notisia di e Reino di Dios den tur nashon.—Lesa Mateo 24:3, 7 i 8; 2 Timoteo 3:1-5.

4. Kiko lo tin den futuro pa humanidat?

E Dios Todopoderoso tin bon kos prepará pa hende obediente. E Reino di Dios, ku ta konsistí di Hesukristu, e Mesías, i e 144.000 skohínan, lo goberná tera desde shelu pa mil aña. E mortonan lo ser resusitá i lo haña e oportunidat di biba pa semper despues di un huisio hustu. Ademas, e Reino di Dios lo trese alivio pa tur hende. Lo no tin malesa ni morto mas.—Lesa Revelashon 5:10; 20:6 i 12; 21:4 i 5.

Pa mas informashon, wak página 23-25 i 197-201 di e buki Kiko Beibel Ta Siña Realmente? akí.