Hen Kwagh Ken Mkaanem Ma Aôndo

Bibilo Tsengaôron Akaa a ken Hemene?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Akaaôron a profeti a Bibilo la tsengaôron akaa a ken hemen jighilii?

Ka Aôndo Uhembanagee tseegh a lu a tahav mbu tsengan nengen a kwagh u ken hemen vindi vindi ye. (Amoshi 3:7) Ikyav i tesen yô, hii sha ashighe a tsuaa la je, yange tsengaôron kwagh u mve u orgen u i yilan un ér Mesiya, shin Kristu la. Lu u Mesiya ne una va ken tsombor u orjighjigh Aberaham. Una lu orhemen u una na uumace mba ungwan imo i Aôndo vea hide a zua a uma u vough u lun a angev shio la. (Genese 22:18; Yesaia 53:4, 5) Lu u or u i tôndo zwa ér ngu van ne, una due ken Betelehem.—Ôr Mika 5:2.

Yesu lu Mesiya shon. Bibilo yange i tsengaôron ér iniunkwase ia va mar Mesiya shi a laha un kpaa. Bibilo ôr kwagh ne tsa hemba anyom 700 cii ve kwaghôron ne va kure sha mi ye. Lu u una va na uma na sha ci u asorabo a ior kpishi, shi a ii un a mbainyarev imôngo. (Yesaia 7:14; 53:3, 9, 12) Bibilo shi i ôr kwagh hemba anyom 500 ken ijime ér una nyôr ken Yerusalem sha jaki man shi a tee un sha agbenger azurfa 30. Hanma kwagh cii va lu di mimi nahan vough.—Ôr Sekaria 9:9; 11:12.

2. Aôndo tsengan pasen ayange?

Bibilo yange i tsengaôron inyom i Mesiya una va la jighilii, man i̱ ôr kwagh ne anyom kar hemba 500 cii ve Mesiya va ye. Cii man shighe u a va la, i ôron anyom sha ulahadi mbaanyomov, inja na yô, hanma “lahadi” yô, i lu anyom ataankarahar. Yange i tsengaôron ér ulahadi mbara vea lu 7 man ulahadi 62, nahan kohol cii yô a lu ulahadi mbaanyomov 69. Ka anyom 483 je la. Kpa lu hanma shighe nahan anyom ne hii? Sha kwagh u Bibilo i er yô, shighe ne yange hii sha ayange a Nehemia or u civir Aôndo ugen, va ken Yerusalem, va hide hii u maan gar shon la. Yiase i tar u Pershia tese ér lu ken inyom i 455 Cii man Shighe u Yesu la, Nehemia hii u maan gar u Yerusalem ye. (Nehemia 2:1-5) Yange anyom nga karen 483 yô, i er Yesu batisema ken inyom i 29 la, nahan a hingir Mesiya, man kwagh ne lu sha shighe u i tsengaôron ér Mesiya una va la vough.—Ôr Daniel 9:25.

  3. Akaaôron a profeti a Bibilo nga kuren sha mi hegen kpa?

Yesu yange tsengaôron akaa a vesen a aa er sha shighe wase ne yô. Yange tsengaôron kwagh u loho u dedoo u Tartor u Aôndo, u ua va ior mba Aôndo a doo ve ishima la a mpeveryol sha tar jimin cii yô. Tartor la ua tim botar u se lu shimi ne cica cii.—Ôr Mateu 24:14, 21, 22.

Akaaôron a profeti a Bibilo la pase kwagh u ayange a masejime a tar ne vighe vighe. Bibilo pase ér, sha shighe u mzehemen, u i lu inja er tar ma u lu doon a doo ne, ior a gema a lu vihin a vihi tar. Ityav man ijen man ityartenger kua ubombauangev vea na yô, ican ia seer a seer. (Luka 21:11; Mpase 11:18) Ior vea kera wa aeren a dedoo ikyo ga. Ken ashighe a ican ne, mbadondon Yesu vea pase loho u dedoo u Tartor u Aôndo hen akuraior cii.—Ôr Mateu 24:3, 7, 8; 2 Timoteu 3:1-5.

4. Mlu u uumace una va lu ken hemen nena?

Aôndo uhembanagee ngu a akaa a dedoo a á ver sha ci u uumace mba nan jighjigh yô. Yesu Kristu, u a lu Mesiya la, kua ior mba i tsough ve a na imôngo mbara vea tema tor sha, vea gema a hemen tar ne cii. Ka ve ve lu imagh ki Tartor u ú lu gomoti u una hemen anyom dubu la ye. A nder mbakpenev, vea zua a ian i a ôr ve ijir a na ve ishô ér ve kuma u zuan a uma u tsôron yô. Tartor la shi ua bee hanma or u nan lu ker cii angev. Angev man ku ua kera lu ga.—Ôr Mpase 5:10; 20:6, 12; 21:4, 5.

Wea soo u seer zuan a iwanger yô, ôr takerada u Bibilo Tese Ér Nyi Jimi? u i tese foto u ú heen ne, sha peeji 23-25 man peeji 197-201.